1-сонли мактабда “Бу менинг ўзлигим, ғурур, номусим, Конституциям – олий Қомусим!” шиори остида байрам тадбири ўтказилди

Мамлакатимиз халқи севиб нишонлайдиган байрамлар кўп. Ҳар бир байрамнинг ўз тарихий аҳамияти, халқимиз ҳаётида тутган беқиёс катта ўрни бор. 8 декабрь – Ўзбекистон Республикаси Конституцияси қабул қилинган сана эса ўзбекистонликлар учун мукаммал қомусий бахт, эрк ва адолатнинг ҳақиқий тантанаси, энг азиз ва қадрли байрам сифатида якдиллик билан нишонланади. Давлат ва жамоат ташкилотларида, таълим-тарбия муассасаларида сана муносабати билан “Конституция билимдонлари”, “Қомусимиз - бахтимиз”, “Конституциямизни ўрганамиз”, “Бахт-иқбол ва келажагимиз кафолати” мавзуларида кўрик-танловлар, давра суҳбатлари, заковат беллашувлари ўтказилади.

Конституциямиз қабул қилинган кун арафасида, жорий йилнинг 6 декабрь санасида Манғит шаҳридаги 1-сонли умумтаълим мактабида ҳам маънавий-маърифий, адабий-мусиқий байрам тадбири бўлиб ўтди. Дид билан безатилган мактаб фаоллар залида Конституциямизни мадҳ этувчи шиорлар, деворий газеталар, сиёсий адабиётлар, мактаб ўқувчиларининг Конституция ҳақидаги билимларини ўзида мужассам этган маърузалар, иншолар, ижодий ишлар кўргазмаси  ташкил этилди.

Тадбир аввалида она Ватан, истиқлол, тинчлик ва дўстликни тараннум этувчи жўшқин куй садолари остида саҳнага маънавий-маърифий ва адабий-бадиий кеча иштирокчилари кириб келишди. Иштирокчилар она Ватанни мадҳ этувчи шеърлар айтишди. Шундан сўнг, Ўзбекистон мадҳияси янграб, барча, шу жумладан тадбирда иштирок этаётган ўқитувчилар, ўқувчи-ёшлар, уларнинг ота-оналари ҳам мағрур туриб Ўзбекистон мадҳиясига жўр бўлиб куйладилар.

Бошловчилар Конституциямиз қабул қилинганининг 31 йиллиги ҳамда Янги таҳрирдаги Конституцияга киритилган ўзгаришлар, мамлакатимизда рўй бераётган демократик жараёнлар ҳамда янгиланган Конституциямизнинг халқимизни келажак сари руҳлантириб тургувчи тенгсиз қудрати, қонун устуворлиги, бағрикенглик, ҳуқуқий тенглик ва адолат тамойиллари ҳақида бири-биридан таъсирли шеърлар ўқидилар.

Шунингдек, ўқувчи-ёшлар ўртасида янгиланган Конституциямизнинг 155та моддаси ва ундаги 434та норманинг аҳамияти, халқимиз ҳаётида тутган ўрни юзасидан викторина саволларига тез, аниқ ва пухта жавоб бериш бўйича беллашув ҳам ўтказилди. “Янгиланган Конституциямиз ҳақида нималарни биласиз?” деган саволга  ўқувчи-ёшлар дадил ва тезкорлик билан жавоб бердилар. Хусусан, Конституциянинг 1-моддаси 15-, 5-, ва 31-моддалари ҳақида ўқувчилар мукаммал фикр юритишиб, ўзларининг Конституция билимдонлари эканликларини амалда намоён этдилар.

Тадбир давомида ўқувчи-ёшлар халқ эрки, озодлик, бахт, тинчлик, тенглик, дўстлик ва миллатлараро тотувликни мадҳ этувчи шеърлар, ашулалар ижро этишди. Жўшқин куй-қўшиқларга монанд рақслари билан  тадбир меҳмонларига кўтаринки кайфият улашдилар.

Тадбир якунида “Бу – менинг ўзлигим, ғурур, номусим, Конституциям – олий Қомусим!” шиори остида “Ҳеч кимга бермаймиз сени, Ўзбекистон!” қўшиғини жўр бўлиб куйладилар.

Бўлиб ўтган байрамона тадбир барчага завқ-шавқ бағишлади.

Муҳаббат Қодирова,

1-сонли мактабнинг тарих фани ўқитувчиси.