ТЎЛҚИН ОВУЛИДА МАҲАЛЛА, МАКТАБ ВА ОИЛА ҲАМКОРЛИГИДА ЁШЛАРГА “ОММАВИЙ МАДАНИЯТ”НИНГ ЗАРАРЛИ ТАЪСИРИ ТУШУНТИРИЛМОҚДА
Ёшларнинг таълим-тарбиясида оила ва таълим муассасаси билан биргаликда маҳалланинг ҳам ўрни, таъсири катта. Халқ орасидаги “Маҳалла – ҳам ота, ҳам она” деган гап бежизга айтилмаган. Ўзаро меҳр-оқибат, аҳиллик ва тотувлик каби халқимизга хос урф-одат ва анъаналар айнан маҳалла муҳитида ривожланган. Булар эса ёш авлоднинг онгу-тафаккурини шакллантиришда, уларни ёт ғоялар, “оммавий маданият” таъсиридан асрашда муҳим аҳамиятга эга.
15 январь куни amunews.uz веб-сайти таҳририятининг “Соғлом муҳит – соғлом ҳаёт” номли грант лойиҳаси доирасида ҳудудда фуқаролар йиғини, таълим муассасалари ва оилалар ҳамкорлигида ёшлар тарбияси борасида амалга оширилаётган ишлар билан танишиш мақсадида Амударё туманининг Тўлқин овулига ташриф буюрдик.
Овулдаги 33-сонли мактабда бўлиб ўтган давра суҳбати давомида бу борада йўлга қўйилган чора-тадбирлар, уларнинг самараси, эришилган натижалар ва келгусидаги режалар тўғрисида сўз юритилди. Тадбирда тумандаги оммавий ахборот воситалари ходимлари, “Соғлом муҳит – соғлом ҳаёт” номли грант лойиҳаси ижрочилари, фуқаролар йиғини масъуллари, мактаб маъмурияти ва ота-оналар, ўқувчи-ёшлар иштирок этишди.
Тадбирда дастлаб грант лойиҳаси ижрочилари томонидан режага мувофиқ амалга оширилаётган тадбирлар хусусида маълумотлар берилиб, кенг тўхталиб ўтилди. Маҳаллаларда, оилаларда ижтимоий-маънавий муҳит барқарорлигига салбий таъсир кўрсатувчи ҳолатлар, яъни ёшлар ўртасида турли зарарли иллатларга берилишнинг олдини олишга қаратилган мавзулардаги мақолалар, ёшларнинг бўш вақтини мазмунли ўтказишга ҳисса қўшиш мақсадида уларни китобхонликка жалб этиш, ўтказилаётган танловлар, фаол қатнашаётган ёшлар ҳақида сўз юритилди.
Шундан сўнг, мактаб директори Ислом Саъдуллаев фуқаролар йиғини, мактаб ва ота-оналар билан ҳамкорликда ёшлар тарбиясини тўғри йўлга қўйиш борасида олиб борилаётган ишлар тўғрисида маълумотлар берди. Шунингдек, фуқаролар йиғини хотин-қизлар фаоли Гавҳар Боботоева, мактаб психологи Манзура Сапарбоева, ота-оналардан Икром Есамуродовлар ҳамкорликда самарали натижаларга эришилаётганини эътироф этишди.
Тадбир давомида сўнгги даврларда “оммавий маданият” ниқоби остида бутун дунёга кенг тарқалаётган маънавий ва ахлоқий бузуқлик ёшларимизнинг дунёқарашига ҳам жиддий хавф солаётгани, ахлоқий бузуқлик, зўравонлик, индивидуализм, эгоцентризм каби ёт ва бузғунчи ғояларни интернет орқали ёшлар онгига сингдиришга уриниш кучайиб бораётгани ачиниш билан тилга олинди.
Йигит-қизларимизни уларнинг таъсиридан асраш учун маҳаллаларда бугунги мураккаб мафкуравий жараёнларни атрофлича таҳлил қила оладиган мутахассисларни жалб этган ҳолда ёшлар учун ўқув соатлари ташкил этиш кераклиги, токи, бундай тадбирлар миллий манфаатларимизга, ҳаёт тарзимизга зид бўлган ғоя ва мафкуравий хуружларнинг моҳиятини очиб бериш лозимлиги тўғрисида сўз юритилди. Бу эса фуқароларимизнинг қалбида миллий тафаккур ва соғлом дунёқараш асосларини мустаҳкамлашда алоҳида аҳамият касб этиши таъкидланди.
Давра суҳбати тарзида ўтказилган тадбир давомида вояга етмаганлар назоратида оила, маҳалла, мактаб ҳамкорлигини йўлга қўйган ҳолда болаларнинг ижтимоий аҳволини ўрганиш, жиноят содир этишга мойилларини аниқлаб, соғлом муҳитга қайтариш учун тегишли чора-тадбирлар белгилаш, ушбу жараёнда хизмат интизоми ва қонунчиликка оғишмай амал қилиш лозимлиги бугунги кун талаби эканлиги айтиб ўтилди.
Грант лойиҳаси доирасида ўтказилган тадбир давомида келгуси режалар хусусида ҳам тўхталиб ўтилди ва ёшларни жалб этган ҳолда уларнинг тарбиясига ижобий таъсир кўрсатувчи тадбирларни мунтазам равишда ўтказиб боришга келишиб олинди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
