Табиий газ босимининг пастлиги, сув, электр таъминотидаги узилишлар: туман ҳокимлигидаги штабга шу кунгача 225 та мурожаатлар келиб тушди

Қорақалпоғистонда қиш мавсуми об-ҳавоси Республикамизнинг бошқа ҳудудларига нисбатан аёзли бўлади ва узоқроқ давом этади. Шу боисдан ҳам аҳолининг табиий газ ва иситиш тизимига, электр энергиясига эҳтиёжи ортиб кетади. Бу ўз навбатида баъзан иситиш мосламаларидан хавфсизлик қоидаларига риоя қилинмай фойдаланганда фавқулодда ҳолатлар юзага келиши, ёнғин, ис газидан заҳарланиш каби нохуш ҳолатлар собир бўлишига сабаб бўлиши мумкин.

Амударё туманида аҳолини қиш мавсумидан талофатларсиз олиб чиқиш, уларнинг табиий газ, ўтин, кўмир ва бошқа ёқилғиларнинг чала ёниши оқибатида пайдо бўладиган ис газидан заҳарланишининг олдини олиш, ёнғинлар содир бўлишига йўл қўймаслик ҳамда истеъмолчиларга электр энергияси, табиий газ, ичимлик сувини узлуксиз етказиб бериш, уларнинг бу борада дуч келган муаммоларини тезкорлик билан ҳал этиш мақсадида штаб фаолияти йўлга қўйилган эди.

Штаб сутканинг барча вақтларида узлуксиз фаолият кўрсатиши учун “Қорақалпоқ сув таъминоти” масъулияти чекланган жамияти туман филиали, “Амударётумангаз”, туман электр тармоқлари корхонаси, Ободонлаштириш бошқармаси, Санитария эпидемиологик-осойишталик ва жамоат саломатлиги бўлими масъул ходимларининг навбатчилиги ташкил этилган ва ишонч телефони мунтазам ишлаб турибди.

Штаб ташкил этилган 2023 йилнинг 28 сентябридан жорий йилнинг 16 январига қадар ушбу ишонч телефони орқали аҳолидан 225та мурожаатлар қабул қилинган ва тезкорлик билан чора-тадбирлар кўрилиб, ижобий ҳал этилган.

Штабга кўплаб юртдошларимиз қатори Манғит шаҳрининг Чордара маҳалласида истиқомат қилувчи Хосият Қутимова сув тармоғидаги носозлик, Бештом маҳалласида истиқомат қилувчи Комилжон Тўлибоев хонадонига қўйилган сув ўлчагич ишламай қолганлиги, Гулзор маҳалласидаги кўп хонадонли уйнинг 5-қаватида истиқомат қилувчи яна бир юртдошимиз уйининг томонидан чакка ўтаётганлиги, Холимбег овулидан Юнус Турсунов электр энергиясидаги узилишлар бўлаётгани юзасидан мурожаат қилишган. Келиб тушган мурожаатларнинг кўпчилиги табиий газ босимининг пастлиги, сув, электр таъминотидаги узилишларга доир бўлиб, муаммолар тегишли соҳалар мутасаддилари томонидан ўз вақтида ҳал этиш чоралари кўрилаётир.

Шуниси эътиборлики, штаб аъзоларига ва ишонч телефони орқали мурожаат қилаётган юртдошларимизга туман Фавқулодда вазиятлар бўлими мутасаддилари аҳолини қиш мавсумидан талофатларсиз олиб чиқиш мақсадида содир бўлиши мумкин бўлган фавқулодда ҳолатларнинг олдини олиш юзасидан кенг тушунчалар бериб бормоқдалар.

Улар аҳоли хонадонларида ҳам бўлиб, табиий газнинг тўлиқ ёнмаслиги, хона ичида тўпланиб қолиши, газ плиталарининг, иситиш қозонларининг ёқиб, қаровсиз қолдирилиши ис газидан заҳарланиш, ёнғин каби кўнгилсиз ҳодисалар содир бўлишига олиб келишини батафсил тушунтирмоқдалар. Бу борада фуқаролар огоҳликка, ҳушёрликка даъват этилмоқда.

Албатта, бунингдек тарғибот тадбирлари ўзининг ижобий натижаларини беради. Шу йилнинг 15 январида Аёқчи маҳалласида истиқомат қилувчи Қўзибой Раҳимов штабга хонадонида ток кучланиши баланд экинлиги хусусида ишонч телефони орқали мурожаат қилган эди. Штаб навбатчилари бу ҳақда туман электр тармоқлари корхонаси раҳбариятига маълум қилган. Натижада юқори кучланишли ток туфайли келиб чиқиши мумкин бўлган нохуш ҳолатнинг олди олинган.

Хулоса қилиб айтганда, штаб фаолияти туманимизда аҳолининг қиш мавсумини беталофат ўтказишига хизмат қилаётгани билан жуда аҳамиятли.

Ойгул РАЖАБОВА.