НАВОИЙХОНЛИК ТАДБИРИ БАРЧАГА МАЪНАВИЙ РУҲ БАҒИШЛАДИ

Буюк мутафаккир, шоир, давлат ва жамоат арбоби, улуғ бобокалонимиз Мир Алишер Навоий даҳосига садоқат буюк халқ ва миллатга нисбатан эҳтиром ва ҳурмат ифодасидир. Чунки дунё халқлари Навоий деганларида ўзбек миллатини, унинг бетакрор сўз санъатини, миллий маънавий қадриятларини ўзида мужассам этган бебаҳо мумтоз адабиётини тушунадилар. Бу гўзал адабиёт Навоий асарлари билан шунчалар қадр-қимматлики, 583 йилдан бери бу дилбар шеърият, нафис ғазалиёт, юксак тафаккур қудратини ўзида мужассам этган адабий-бадиий, фалсафий достонларни ҳамон аҳли дунё ўқиб-ўрганишдан, ибратлар олишдан, бу асарлардаги ҳикматлар уммонидан ҳайратланишдан асло тўхтамайдилар.

Ҳар йили улуғ бобокалонимиз таваллуд топган 9 февраль санасида нафақат мамлакатимизда, балки бутун туркий оламда, бутун дунёда шоир асарларининг миллионлаб мухлислари Навоий даҳосига чексиз ҳурмат ва эҳтиром кўрсатадилар. Шу куни Навоий ғазал ва рубоийлари, туюқ ва маснавий, мухаммаслари турфа халқлар тилларида жаранглар сочади.

Мамлакатимизда эса йил давомида Навоийхонлик тадбирлари, Навоий асарлари билимдонлари кўрик-танловлари ўтказилиши доимий анъанага айланган. Талаба-ёшлар, умумтаълим мактабларининг ўқувчи-ёшлари ўртасида ўтказиладиган, “Хамса”хонлик, ғазалхонлик кечалари, гуруҳлараро, синфлараро беллашувлар ўсиб келаётган ёш авлод қалбида ватанпарварлик, дўстлик ва тотувлик, бағрикенглик туйғуларини янада мустаҳкамлаб, Навоий асарларини ўрганишга бўлган иштиёқлари ортишига хизмат қилмоқда.

Амударё туман мактабгача ва мактаб таълими бўлими тасарруфидаги 1-сонли умумтаълим мактаби ўқувчи-ёшлари учун Навоийхонлик кечалари ҳақиқий шеърият байрами каби жўшқин кайфият бағишлайди. Мактабнинг она тили ва адабиёт фани ўқитувчилари томонидан ҳамжиҳатликда ташкил этиладиган “Биз – Навоий авлодларимиз”, “Навоий асарлари билимдонлари”, “Навоий ғазаллари – юксак маънавият сарчашмаси” мавзуларидаги синфлараро беллашувлар, шеърият ва ғазалхонлик кечалари ҳар галги ўқув йили давомида анъанавий тарзда ўтказилиб келинаётгани ўқувчи-ёшларнинг Навоий асарлари мазмун-моҳиятини чуқур тушунишларига, қизиқиш билан ўрганишларига имконият яратмоқда.

Ўқувчи-ёшлар эса ўз ташаббус ва интилишлари туфайли тез-тез Навоий асарлари асосида баҳри-байтлар айтишиб, ўзаро фикр алмашадилар, бир-бирларининг билимларини синовдан ўтказадилар. Алишер Навоий таваллуд топган 9 февраль санаси олдидан мактабда ҳар бир синф алоҳида дастур асосида байрамона тадбирлар ташкил этишади, шоир достонларидан парчалар ўқиб, ғазалхонлик кечаларини ўтказишади.

“Улуғ бобокалонимиз ҳаёти биз учун ибрат” мавзусида Алишер Навоий таваллудининг 583 йиллиги муносабати билан ташкиллаштирилган тадбир ҳам ўқувчи-ёшларнинг шоир даҳосига ҳурмат ва эҳтиромининг ёрқин ифодаси бўлди.

Тадбирни мактаб директори Дилрабо Йўлдошева очди ва барчани буюк мутафаккир, шоир, давлат ва жамоат арбоби, ғазал мулкининг султони Алишер Навоий таваллудининг 583 йиллиги билан самимий табриклади. Шу билан бирга Алишер Навоийнинг туркий халқлар адабиётига қўшган буюк ҳиссаси, ўзбек мумтоз адабиётининг асосчиси сифатидаги беқиёс катта хизмати ва асарларининг ҳеч қачон қадр-қимматини йўқотмайдиган ҳикматлар хазинаси эканлигини алоҳида таъкидлаб ўтди.

Тадбир давомида ўқувчилар Алишер Навоий ҳаёти ва ижоди хусусида маърузалар қилдилар, шоир ғазаллари, рубоий ва туюқларидан айтиб бердилар.

Навоий асарлари асосида савол-жавоблар орқали бир-бирларининг билимларини синовдан ўтказдилар, баҳри-байтлар айтишдилар.

Ўқувчи-ёшлар томонидан тайёрланган саҳна кўриниши орқали Алишер Навоийнинг шоир ва давлат арбоби сифатидаги фаолияти, илм-у заковатда тенгсизлиги, халқпарвар ва саховатпеша инсонлиги маҳорат билан кўрсатиб берилди.

“Улуғ бобокалонимиз ҳаёти биз учун ибрат” мавзусида ташкиллаштирилган мазкур тадбир ҳақиқатан ҳам ҳар бир иштирокчи учун бири-биридан ҳикматли ғазал ва рубоийлар, туюқлар ҳақиқий ибрат ва сабоқ бўлди ва барчага маънавий руҳ бағишлади.

Робия ЙЎЛДОШЕВА.