ФАВҚУЛОДДАГИ ОФАТ БЎЛГАН БОТУЛИЗМ КАСАЛЛИГИДАН ЭҲТИЁТ БЎЛИНГ
Ботулизм – жуда хавфли, кутилмаганда содир бўладиган, одам организми марказий нерв тизимининг оғир шикастланиши билан кечувчи, мушаклар парези ва фалажига олиб келувчи ўткир юқумли токсик касалликдир. Касаллик овқатдан заҳарланиш натижасида, жумладан, сифатсиз балиқ, колбасалар, балиқли ва гўштли, мевали ва сабзавотли консервалар, қўзиқоринлар истеъмол қилиниши натижасида юзага келади.
Мамлакатимизда касаллик асосан уй шароитида тайёрланган маҳсулотларни, яъни консервалар, маринадлар, дудланган маҳсулотлар, тузлама ва бошқаларни истеъмол қилиш натижасида юзага келади. Уй шароитида консерва маҳсулотларини тайёрлашда етарлича санитария-гигиена талабларига амал қилмаслик ва иссиқлик 100 даражадан ошмаслиги натижасида банкаларни сифатсиз гермитизация қилиш эса ботулизм токсинларининг, спора ва вегетатив ҳужайраларининг кўпайиши учун қулай шарт-шароитларни келтириб чиқаради.
Консерва маҳсулотларининг касаллик қўзғатувчи споралари билан заҳарланганлигини уларнинг ташқи кўринишидан, яъни қопқоғининг кўтарилиб туришидан ҳам аниқлаш мумкин. Бундай консерва маҳсулотлари анча юмшаган, структураси ўзгарган ва нохуш ҳидга эга бўлади. Уй шароитида тайёрланган бу каби сифатсиз консерва маҳсулотлари дарҳол йўқ қилиниши керак.
Ботулизм каби ўткир, ўта заҳарли инфекциянинг олдини олиш учун қўлланиладиган энг самарали восита – бу ботулизмга қарши полиантитоксин билан эмлаш ва энг асосийси уй шароитида тайёрланган маҳсулотларни истеъмол қилмаслик ҳисобланади.
Азиз юртдошлар, кутилмаган офатлардан бири бўлган ботулизм касаллигига чалинишдан эҳтиёт бўлинг. Консерва маҳсулотларини истеъмол қилишдан олдин унинг яроқлилик муддати ва ҳолатига эътибор қилинг.
А.Утебаев, туман ФВБнинг
тезкор бўлинмаси бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
