Ғаллани озиқлантириш бўйича семинар бўлиб ўтди

Кунлар исиши билан қишлоқ хўжалиги ер майдонларида, аҳоли томорқаларида баҳорги экишга тайёргарлик ишлари бошлаб юборилади. Амударё туманида қишлоқ хўжалиги маҳсулотларини етиштириш, экиш, парваришлашга алоҳида эътибор қаратилиб, бу борада фермерлар, қишлоқ хўжалиги масъуллари иштирокида ўзаро билим ва тажриба алмашиш мақсадида ўқув-семинарлар ташкил этилмоқда.

Жорий йилнинг 9 март санасида туманимиздаги Оқ олтин овулидаги “Якубова Гавҳар” фермер хўжалиги ер майдонида ғаллани озиқантириш мавзусида семинар бўлиб ўтди. Семинарда туман ҳокими Собир Хўжаметов, тумандаги секторлар раҳбарлари, фермерлар, қишлоқ хўжалиги соҳа масъуллари, ёшлар ҳамда республика миқёсидаги аграр соҳа бўйича профессорлар, илмий ходимлар иштирок этдилар.

Семинарда туман ҳокими Собир Хўжаметов сўзга чиқиб, кейинги йилларда мамлакатимизда қишлоқ хўжалигини ислоҳ қилиш, хусусан, соҳада давлат бошқаруви тизимини такомиллаштириш, бозор муносабатларини кенг жорий қилиш, қишлоқ хўжалиги маҳсулотларини етиштирувчи, қайта ишловчи ва сотувчи субъектлар ўртасидаги муносабатларнинг ҳуқуқий асосини мустаҳкамлаш, соҳага инвестицияларни жалб қилиш, янги технологияларни жорий этиш ҳамда қишлоқ хўжалиги маҳсулотлари ишлаб чиқарувчиларни замонавий техникалар билан таъминлаш борасида тизимли ишлар амалга оширилаётганлигини таъкидлади.

Шунингдек, Қорақалпоғистон Республикасида хизмат кўрсатган қишлоқ хўжалиги ходими, фан доктори, профессор Зоҳиджон Зиёдуллаев семинар иштирокчиларига, фермерлар ҳамда қишлоқ хўжалиги соҳа масъулларига кечки, ривожланишдан орқада қолган, кузда озиқлантирилмаган ғалла майдонларида азотли ўғитлар билан озиқлантириш ҳамда суғориш ишларини амалга ошириш лозимлигини, ғалладан яхши ҳосил олиш борасидан ўтказилиши лозим бўлган агротехник тадбирлар ҳақида маълумотлар бериб ўтди.

Маълумотларда келтирилишича, ғаллага бериладиган ўғит ва сув ўсимлик илдиз системасининг ривожланишини кучайтиради ва туплаш бўғинининг катталашишига ҳамда туплаш бўғинида шакар моддаларининг кўпайишига сабаб бўлади. Бу шароитда ғалла ўсимлиги ўсиш ўрнига вегетатив органларини, яъни туплаш бўғинини каттартиради ва эрта баҳорда катта туплаш бўғинларидан йирик найчалар ҳамда пояларни шакллантиради. Катта найча ва поялардан йирик бошоқлар ҳосил бўлишини таъминлайди. Озиқлантирилмаган ва суғорилмаган, тупроқда намлик етарли бўлмаган ғалла майдонларидаги ниҳоллар совуққа, бошқа омилларга берилувчан ҳамда касаллик ва зараркунандаларга тез чалинувчан бўлиб қолади. Эрта баҳордан тупланмасдан найчалаш фазасига ўтиб кетиши ғалланинг ҳосилдорлиги пасайиб кетишига сабаб бўлади.

Семинарда, Шўманай тумани “ECO TEKS CLUSTER” масъулияти чекланган жамияти раҳбари Фаҳриддин Ҳакимов сўзга чиқиб, баҳорнинг илк ойларида ғаллани озиқлантириш борасидаги фикр-мулоҳазалари билан бўлишди.

Қайд этилишича, март ойи ғалла парваришида ғалла ҳосилига ҳосил қўшиш ойи бўлиб, ўз вақтида ўтказиладиган агротехник тадбирлар натижасида ғалладан юқори ҳосил олиш ва улкан хирмон бунёд этишга асос бўлади. Биринчи баҳорги озиқлантириш ишлари ўтказилган ғалла майдонларига ёққан ёмғир, ғалла ривожига жуда катта фойда бериши, бундай шароитда ғалла майдонларида амалга оширилиши лозим бўлган энг муҳим агротехник тадбирларидан бири бўлган ғаллани азотли минерал ўғитлар билан иккинчи баҳорги озиқлантириш ишларини қисқа муддатларда якунлаш чораларини кўриш лозимлиги хусусида сўз юртилди.

Шунингдек, семинарда туманимиздаги қишлоқ хўжалиги соҳа масъуллари томонидан мавзу юзасидан саволлар берилди, аграр соҳанинг турли йўналишлари бўйича ўзаро фикрлар алмашилди.

Чарос Арслонова, туман ҳокимлигининг Ахборот хизмати раҳбари.