Холимбег овулида қишлоқ хўжалиги бўйича кўргазмали семинар бўлиб ўтди

17 март куни Амударё туманининг Холимбег овули ҳудудида томорқа ерларидан унумли фойдаланувчи деҳқон хўжаликлари сонини кўпайтириш, деҳқончилик, паррандачилик, асаларичилик, чорвачилик каби қишлоқ хўжалиги тармоқларини янада ривожлантириш мақсадида кўргазмали семинар бўлиб ўтди.

Семинарда туман ҳокими Собир Хўжаметов, секторлар раҳбарлари, ҳоким ўринбосарлари, республикадаги ҳамда тумандаги аграр соҳа масъуллари, тижорат банклари раҳбарлари, туман овул ва маҳаллалар фуқаролар йиғинлари раислари, ҳоким ёрдамчилари ҳамда корхона-ташкилотлар масъуллари иштирок этдилар.

Мазкур семинар Президентимизнинг жорий йилнинг 5 март санасида имзоланган “Аҳоли хонадонларида саноат усулида маҳсулот ишлаб чиқаришни қўллаб-қувватлаш ҳамда томорқа ва деҳқон хўжаликларида янги захираларни ишга солишга доир чора-тадбирлар тўғрисида”ги 115-сонли қарори ижросига бағишланди.

Дастлаб семинар иштирокчилари собиқ “Туркманистон” муқобил машина-трактор парки биносида ташкил этилган қишлоқ хўжалиги техникалари ҳамда маҳсулотларни озиқлантирувчи, парваришловчи воситалардан иборат кўргазма билан танишдилар. Унда туман ҳокими Собир Хўжаметов сўзга чиқиб, давлатимиз раҳбари томонидан қишлоқ хўжалиги маҳсулотлари ишлаб чиқаришни янада кенгайтиришга, деҳқончилик, боғдорчилик, чорвачилик, паррандачилик каби қишлоқ хўжалиги соҳаларини ривожлантиришга алоҳида эътибор қаратилаётгани ҳамда бу борада тизимли ислоҳотлар амалга оширилаётгани хусусида сўз юритди.

Туман ҳокими ўз сўзида давлатимиз раҳбарининг “Аҳоли хонадонларида саноат усулида маҳсулот ишлаб чиқаришни қўллаб-қувватлаш ҳамда томорқа ва деҳқон хўжаликларида янги захираларни ишга солишга доир чора-тадбирлар тўғрисида”ги қарори бу борадаги ишларни янги босқичга олиб чиқишда муҳим дастуруламал бўлишини алоҳида таъкидлади.

Семинарда сўзга чиққан Ўзбекистон фермер, деҳқон хўжаликлари ва томорқа ер эгалари кенгаши бўлим бошлиғи Обил Сафаров томонидан қайд этилишича, мева-савзавот маҳсулотларини етиштириш ва уларнинг экспортини ошириш, қишлоқ хўжалиги кичик ишлаб чиқарувчиларини янада қўллаб-қувватлш, экин ерларидан фойдаланиш самарадорлигини янада ошириш, пировард натижада ер эгаларининг даромадларини кўпайтириш мақсадига йўналтирилган мазкур қарорда қатор йўналишлар бўйича янгиликлар амалга оширилиши белгиланган.

Хусусан, ҳудудларнинг иқлим шароитларидан келиб чиқиб ҳамда сув таъминотини инобатга олган ҳолда, туманлар экспортбоп ва сердаромад экинлар экишга, шунингдек, кичик ишлаб чиқариш ва маҳсулот етиштиришга ихтисослаштирилади. 2024 йилда мева-сабзавотчиликка ихтисослашган 51 та туманда мева-сабзавотларни шок усулида музлатишни йўлга қўйиш бўйича янги лойиҳалар амалга оширилади.

Шунингдек, мазкур ҳужжатда кичик бизнесни узлуксиз қўллаб-қувватлаш комплекс дастури доирасида ишлаб чиқаришга оид лойиҳалар билан бир қаторда маҳсулот етиштириш билан боғлиқ лойиҳаларга, қишлоқ хўжалиги экинларини етиштириш бундан мустасно, 100 млн сўмгача гаровсиз кредитлар ажратилиши белгиланган.

Семинар мобайнида Холимбег ОФЙ ҳоким ёрдамчиси Акмалбек Холмурадов томонидан овул ҳудудидаги томорқа ер эгалари ҳамда деҳқон хўжаликлари, уларни ҳар томонлама қўллаб-қувватлаш борасида амалга оширилаётган ишлар ҳақида маълумот берилди.

Маълумотларда келтирилишича, Холимбег овули ҳудудида жами 1298 та аҳоли томорқаларида 266 га экин ер майдонлари мавжуд бўлиб, улардан юқори даромад олишни таъминлаш борасида олдинда турган қарор вазифаларни амалга ошириш режалаштирилган.

Хусусан, аҳоли томорқаларидаги жами 184 га баҳорги экин майдонларидан жами 5700 тонна маҳсулот етиштилиши, аҳоли хонадонларида 26 та иссиқхоналар ташкил этиш, “Бир маҳалла – бир маҳсулот” тамойили асосида мева-сабзавотчилик йўналишида маҳсулот етиштирилиши каби тизимли ишлар амалга оширилади.

Семинар мобайнида иштирокчилар Холимбег овулида ўз томорқасидан яхши даромад олаётган, деҳқончилик билан узоқ йиллардан бери шуғулланиб келаётган, кўп йиллик тажрибага эга деҳқонларнинг билимлари ҳамда иш тажрибалари билан танишдилар.

Жумладан, томорқачи деҳқон Эркин Қўшаевнинг ўз томорқасида хурмо, лимон ва қулупнай каби парвариш талаб қиладиган мевали дарахтлар кўчатлари сонини йилдан йилга кўпайтириб бораётгани, қуёнчилик билан шуғулланаётгани, ўз томорқасида етиштираётган қишлоқ хўжалиги маҳсулотларидан олаётган ҳосили ҳамда деҳқончилик сирларини пухта эгаллаш натижасида ҳаёт тарзи, яшаш шароитларининг яхшиланишига эришганининг гувоҳи бўлдилар.

Эркин Қўшаев семинарга йиғилганларга кортошка, пиёз, сабзи маҳсулотларини етиштириш ҳамда ердан 2-3 маротаба ҳосил олиш бўйича ўз билими ва тажрибалари билан бўлишди.

Шундан сўнг семинар иштирокчилари ўз томорқасида катта иссиқхона ташкил этган ҳамюртимиз Шавкат Ўрозбоевнинг томорқаси ва иссиқхонасидаги амалга оширилаётган ишлар билан танишдилар. Шавкат Ўрозбоев 3 йил олдин ташкил этилган, асосан бодринг етиштиришга мўлжалланган иссиқхонадан йилига 3 маротаба яхши ҳосил олаётгани ҳақида маълумотлар берди.

Семинар якунида туман ҳокими Собир Хўжаметов бошчилигидаги иштирокчилар “Яшил макон” дастури доирасида мевали дарахтлар кўчатларини экдилар. Кўргазмали семинарда барча иштирокчилар катта билим ва тажрибага эга бўлдилар.

Чарос Арслонова, туман ҳокимлигининг Ахборот хизмати раҳбари.