МАКТАБДА КИТОБЛАР МУТОЛААСИНИНГ АҲАМИЯТИ ТАРҒИБ ЭТИЛДИ

Китоб беминнат дўст, маслаҳатчи, маслакдош. Бу сўзлар шунчаки айтилмайди, балки замиридаги олам-олам маънони англаш мушкул эмас. Чиндан-да китоб мутолааси киши шуурини ўткирлайди, дунёга зийрак, масъум кўз билан қарашга ўргатади. Шу тариқа ҳаётни, ўзлигингни англайсан ва эл корига ярайдиган инсон бўлгинг, кимларгадир кераклигингни ҳис қилиб яшагинг келади. Яхши китобдан олинган таассуротлар юрагингни ширин орзуларга тўлдиради.

Муҳтарам Президентимизнинг китоб мутолаасини оммалаштиришга, айниқса, ўсмирлар, ёшлар орасида китоб ўқиш аҳамиятини кенг тарғиб этишга, китобхон ёшларни рағбатлантиришга улкан эътибор бераётгани бежиз эмас. Чунки бугунгидай глобаллашув жараёни шиддат билан кечаётган, дунёнинг турли ҳудудларида уруш-низолар, қарама қаршиликлар тобора кучаяётган бир даврда мустақил фикрлайдиган, соғлом дунёқараш ва мустаҳкам иродага эга ёшларни тарбиялаш, улар онгида соғлом дунёқараш, миллий ва умуминсоний қадриятларга ҳурмат ҳиссини тарбиялаш долзарб вазифа ҳисобланади. Бунда албатта, китоб мутолааси асосий воситалардан биридир.

“Тараққиёт кўзгуси” газетаси таҳририяти амалга ошираётган “Билимли ва маънавиятли ёшлар билан – Учинчи Ренессанс сари” грант лойиҳасида ҳам бадиий китоблар тарғиботига алоҳида ўрин берилган.

Яқинда туманимизнинг Дўрман овули ҳудудида фаолият юритаётган 84-сонли мактабда ўтказилган “Болалар ва ўсмирлар китоб ҳафталиги”да ҳам ўқувчи ёшларга “Тараққиёт кўзгуси” газетаси таҳририяти қошида ташкил этилган кутубхона китоблари намойиш этилди. Лойиҳа координатори Ойгул Ражабова дастлаб ўқувчиларга китоб ўқиш аҳамияти хусусида, уларнинг китоб ўқишлари, маънавиятли, билимли ва етук инсонлар бўлиб вояга етишлари учун давлатимиз томонидан яратилаётган шароитлар хусусида батафсил тўхталди.

Газетанинг махсус мухбири Маҳмуджон Шомуродов, мазкур мактаб директори Эркин Қурбонбоевлар ҳам ўқувчиларга китоб ўқиш аҳамияти ҳақида гапирдилар. Ўқувчилар намойиш этилган китобларни қизиқиб томоша қилдилар ва кутубхонага келиб, аъзо бўлиш истагини билдирдилар.

Айтиш жоизки ушбу мактаб ўқувчилари орасида азалдан китобхонлик кенг оммалашган. “Китобхон оила” республика танловида ғолиб бўлиб, Юртбошимизнинг совғаси – “Спарк” автомобилини олишга эришган собиқ ўқувчиси ҳақида ўқитувчилар фахрланиб гапиришади.

Грант лойиҳаси режасида китобхонлик тарғиботига алоҳида эътибор қаратилгани бежиз эмас. Бу дунё миқёсида долзарб масалалардан ҳисобланади. Шу боисдан ҳам ҳар йили буюк болалар адиби Ханс Кристиан Андерсен туғилган ой – апрель ойида Халқаро болалар китоби куни нишонланади. Сана муносабати билан ташкиллаштириладиган тадбирларда болаларга китоблар совға қилинади, уларнинг китобхонлик даражаси синовдан ўтказилади, китоб ўқишга рағбатлантирилади. Ушбу сана мамлакатимизда ҳам кенг нишонланиб, энг сара болалар китоблари тарғиб этилади.

Грант лойиҳаси доирасида ўтказилган тадбир ўқувчиларда улкан таассуротлар қолдирди ва ёшларни китоблар мутолаасига рағбатлантирди.

Севара ИСМОИЛОВА.