69-сонли мактабда Афғон уруши фахрийлари билан учрашув ва “Заковат” интелектуал ўйинининг финал босқичи ўтказилди

Таълим масканларида Хотира ва қадрлаш кунига бағишлаб ўтказилаётган учрашувлар, маданий-маърифий тадбирлар давом этмоқда. 8 май куни Амударё туманидаги 69-сонли умумтаълим мактабида ҳам сана муносабати билан байрам тадбири ва иқтидорли ўқувчилар ўртасида “Заковат” интелектуал ўйинининг финал босқичи бўлиб ўтди.

Тадбирда Афғонистон уруши фахрийлари, Аёқчи маҳалласида жойлашган давлат хавфсизлик хизмати чегара қўшинларига қарашли ҳарбий қисм масъуллари, маҳалла фаоллари, мактаб ўқитувчи ва ўқувчилари иштирок этди.

Тадбирни Аёқчи МФЙ раиси Оллоёр Қаландаров очиб берди. Мазкур маҳаллада жойлашган давлат хавфсизлик хизмати чегара қўшинларига қарашли ҳарбий қисм ходими Аббос Рустамов Афғон уруши фахрийларини, мактаб жамоаси ва барча ўқитувчиларни Хотира ва қадрлаш куни билан табриклаб, юртимизда тинчлик ва осойишталик бардавом бўлиши учун барча ҳарбий хизматчилар, шу жумладан чегарачилар ҳам туну кун ўз постларида ҳушёр турганини таъкидлаб ўтди.

Давлат хавфсизлик хизмати масъул ходими ҳам урушнинг инсоният учун нақадар аянчли оқибатларга олиб келишини, Иккинчи жаҳон урушида халқимиз кўрган йўқотишлар мислсиз бўлгани, бу машъум кунлар ҳамда урушда жон фидо қилган, муҳнат фронтида тер тўккан ота-боболаримиз ва момоларимиз хотираси ҳамиша авлодлар ёдида бўлишини таъкидлади.

Тадбир давомида Афғон уруши фахрийлари Пўлат Қутимов, Ҳайтиммат Жуматов, Қўзибой Давлетов, Бозорбой Вапоев, Озодлар Ўразметовлар уруш ҳақидаги тасуротларини ўқувчиларга сўзлаб беришди. Айтиш жоизки, 1979-1989 йиллардаги Афғонистон уруши, Совет Иттифоқининг Афғонистонга қўшин киритиши ва у ерда тўққиз йил давом этган ҳарбий амалиётлар неча-неча забардаст йигитларни ҳаётдан барвақт олиб кетган. Уруш фахрийлари ёшларни тинчлик ва осойишталикни кўз қорачиғидай асрашга даъват этдилар.

Тадбирда мактабнинг юқори синф қизлари ижросида куй-қўшиқ ва рақслар ижро қилинди. Ўғил боллар иштирокида эса ҳарбий жанг санъати намуналари намойиш қилиниб, саҳна кўринишларини тақдим этилди. Тадбир якунида маҳалла фуқаролар йиғини раиси ва мактаб маъмурияти томондан Афғонистон уруши фахрийларига эсдалик совғалари топширилди.

Тадбир якунлангандан кейин мактаб ўқувчилари иштирокида “Заковат” интеллектуал ўйини ўтказилди. Шу пайтгача ўтказилган саралаш ва дастлабки тур ўйинларида ғолиб бўлган 4 та жамоа – 8-д, 9-а, 10-б ва 11-б синфлар жамоалари мактабнинг кимё фани ўқитувчиси Хосият Ўрозбоева раҳбарлигида интелектуал ўйиннинг финал босқичида ўзаро беллашдилар.

Ушбу интеллектуал ўйин ўқувчиларга нафақат билимларини синовдан ўтказиш, балки уларнинг дунёқарашини кенгайтириш ва жамоавий ишлаш кўникмаларини ривожлантириш учун ҳам ажойиб имконият яратди. Турли фанларга оид мантиқий саволлар бўйича кечган баҳс-мунозаралар, маслаҳатлашувлар ва жавоблар бериш жараёнида кўрсатилган бирдамлик ҳамда ўйин давомидаги кўтаринки руҳ уларнинг интеллектуал салоҳиятини ва жамоавий ишлаш қобилияти қанчалик юқори даражада эканини намоён этди.

Ўқувчиларни интеллектуал ўйиннинг финал босқичига тайёрлашда мактаб директорининг маънавий-маърифий ишлар бўйича ўринбосари Дилшод Балтаев, биология фани ўқитувчиси Мунаввар Матжанова, она тили адабиёт фани ўқитувчиси Саида Нажаматдинова, география фани ўқитувчиси Барно Ражаповалар фаол қатнашдилар.

Муросасиз беллашувлар якунига кўра “Заковат”нинг мактаб бўйича финал босқичида 1-ўринни 8-д ва 9-а синфлар жамоалари, 2-ўринни 10-б ҳамда учинчи ўринни 11-б синф жамоалари эгаллади.