11-сонли мактабда “Ҳамма касблар керак, барча касблар муҳим” мавзусида психологлар учун ўқув-семинари ўтказилди

Амударё тумани Мактабгача ва мактаб таълими бўлимига қарашли 11-сонли мактабда ўтказилган туман психологларининг навбатдаги ўқув-семинаридан кўзланган асосий мақсад – ўқувчиларни касб-ҳунарга йўналтириш ишларини янада такомиллаштириш, мактаб психологларининг бир-бири билан тажриба, янги ғоя ва фикрлар алмашишлари учун шароит яратишдир.

Семинарда туман Мактабгача ва мактаб таълими бўлими мудири Ялғош Шомуратов ҳамда бўлимнинг болаларни ижтимоий-психологик қўллаб-қувватлаш ва инклюзив таълим бўйича психолог-методисти, 11-сонли мактаб директори ва умумтаълим мактабларининг психологлари иштирок этди.

Тумандаги илғор мактаб психологлари томонидан ташкиллаштирилган ўқув-семинарига ташриф буюрган меҳмонлар “Олтин соат”, “Позитив сўзлар”, “Ким мерган” каби интерактив машғулотлар ҳамда гуллар билан кутиб олинди.

11-сонли мактаб психологлари ҳамда мактабнинг технология фани ўқитувчилари томонидан ташкиллаштирилган кўргазмалари залида ўқувчиларнинг қўл меҳнатлари билан ишланган миллий ҳунармандчилик маҳсулотлари – кашталар, қўлда тайёрланган кийимлар, қуроқлар ва қўғирчоқлар ҳамда замонавий услубда тикилган дастурхонлар, ўқувчи йигитлар томонидан картон қоғозларидан ишланган иссиқхона ва мактаб макети, механик роботлар намойиш қилинди.

Мактабга киришдан бошлаб то ўқув-семинари ўтказиладиган залгача йўлакча деворлари ўқувчиларни касб-ҳунар ўрганишга чорловчи чақириқлар билан безатилгани иштирокчиларда катта таассуротлар қолдирди.

Ўқув-семинарини туман Мактабгача ва мактаб таълими бўлими мудири Ялғош Шомуратов очиб берди. “Ҳар бир ўқувчига билимдан ташқари битта ҳунар эгаллаши учун ёрдам бериш биз ва Сиз азиз устозларнинг асосий вазифамиздир” – дея таъкидлади у ўз сўзида. Қайд этилганидек, болаларни мактабданоқ касб-ҳунарга йўналтириш, уларнинг келажакдаги муваффақиятли карьераси учун муҳим асос яратади. Шу сабабли ўқувчиларнинг касбий қизиқишларини аниқлаш ва уларнинг қобилиятларига мос касбларни танлашда ёрдам бериш муҳим аҳамиятга эга. Бу жараён таълим муассасалари, синф раҳбарлари ва мактаб психологлари ўртасидаги ҳамкорликни кучайтириб, ўқувчининг ўзига бўлган ишончини янада оширади.

11-сонли мактаб психологи Дилноза Шомуротова иштирокчиларга “Касблар парашюти” машғулотини ўтказди. Ушбу машғулотдан кўзланган мақсад – ким қайси касбни эгаллашидан қатъий назар, жамият учун барча касблар муҳим эканлигини таъкидлашдан иборатдир.

Машғулотдан сўнг 11-сонли мактаб ўқувчилари томонидан “Гиламдўз” эртаги асосида тайёрланган саҳна кўриниши намойиш қилинди. Ўқувчиларнинг ҳунарга бўлган қизиқишини кучайтириш мақсадида ташкил қилинган ушбу саҳна кўриниши замирида “Ҳар бир йигит-қиз учун 40 ҳунар ҳам оз” деган ҳаётий ҳикмат мужассам.

Сўнгра 29- ва 67-сонли мактаблар психологлари томонидан касб-ҳунарга оид “Шарқ бозори” номли, 11-сонли мактаб психологлари томонидан “Поезд ва қувноқ шарчалар” номли, 33-сонли мактаб психологи томонидан эса “Қўл соати” методикаси асосида машғулотлар ўтказилди.

Чиндан ҳам, мактаб психологлари учун ўтказиладиган бу каби семинарлар ўқувчиларнинг касбий йўналишларини аниқлаш ва уларнинг шахсий ривожланишларига кўмаклашишда муҳим аҳамият касб этади. Бундай тадбирлар психологларга ўзаро тажриба алмашиш ва янги усулларни жорий этиш имконини беради, бу эса ўқувчиларнинг касб-ҳунарга бўлган қизиқишларини янада кучайтириб, уларнинг келажакдаги танловларига ижобий таъсир кўрсатади.