53-сонли мактабда “Она юртимизни мадҳ қиламиз” шиори остида маънавий-маърифий тадбир ўтказилди

Инсон қалбига болалигиданоқ ота-онага, яқинларга ҳамда Ватанга муҳаббат туйғуларини сингдириш унинг келгусида баркамол шахс бўлиб вояга етишида муҳим аҳамият касб этади. Шу сабабли ҳам мактабгача таълим ташкилотларида, мактабларда тарбияланувчилар ва ўқувчилар иштирокида турли тадбирлар, маънавий кечалар ўтказилиб, ватанпарварлик, чин инсонийлик каби олижаноб туйғуларни уларнинг қалбига болалигидан жо қилишга эътибор қаратилади.

Амударё туманидаги 53-сонли мактабда “Она юртимизни мадҳ қиламиз” шиори остида бўлиб ўтган маънавий-маърифий тадбир ҳам ўқитувчиларнинг Ватанга бўлган муҳаббатини янада кучайтиришда муҳим восита бўлди, дейиш мумкин.

Тадбир аввалида давлат мадҳиялари янграб, ўқувчилар юрт рамзларига ҳурмат бажо келтиришди. Сўзга чиққанлар таъкидлаганларидек, Ватан она каби муқаддас, уни асраш, тараққиётига ҳисса қўшиш барчамизнинг фарзандлик бурчимиздир.

Мактаб директорининг маънавий-маърифий ишлар бўйича ўринбосари Иззатбек Юсуфов қайд этиб ўтганидек, Ватанга муҳаббат ва садоқат билан хизмат қилиш, унга муносиб фарзанд бўлиш ўқувчиларнинг чуқур билим олиши, намунали хулқли ва одобли бўлиб, касб-ҳунар эгаллаши орқали бўлади.

Тадбирда мактабнинг 1-А синф ўқувчилари ижросида янграган Ватанни мадҳ этувчи куй ва қўшиқлар уларнинг чинакам ватанпарвар авлод эканини амалда намойиш қилди.

Тадбирда иштирок этган ўқитувчилар, яъни Малоҳат Матсапоева, Фазилат Оллаберганова, Қадамбой Айбўлсинов, Лобар Ўрозметова, Мадина Ражабова, Ихлосбек Аҳмедов каби тажрибали педагоглар ўқувчиларга илм сирларини пухта эгаллаш орқали Ватанга муносиб фарзанд бўлишга чақирдилар.

Айтиш жоизки, бошланғич синф ўқувчиларининг ватанпарварлик туйғуларини юксалтириш жараёнида уларни миллий қадриятларга, бой тарихимиз ва маданий меросимизга ҳурмат руҳида, Ватанга садоқатли, юртга муҳаббатли қилиб тарбиялаш муҳим аҳамият касб этади.

Таълим муассасаларида бу мақсадларга эришиш учун турли педагогик усуллар, жумладан, мактаб дастурларига миллий байрамлар, анъаналар ва қаҳрамонлар ҳақидаги маълумотларни киритиш, шунингдек, ўқувчиларни турли ижтимоий лойиҳалар ҳамда тадбирларга фаол жалб қилиш тавсия қилинади.

Мактаб ва оила ҳамкорлигида болаларга ватанпарварлик туйғусини сингдириш, уларнинг шахсий ривожланиши ва жамиятдаги ўрнини англашларига ёрдам беради. Бундан ташқари, фольклор, миллий мусиқа ва санъат орқали болаларнинг эстетик ҳиссиётларини ривожлантириш, уларда миллий ифтихор ва ўзликни англаш жараёнини жадаллаштиради.

“Она юртимизни мадҳ қиламиз” шиори остида ўтказилган мазкур маънавий-маърифий тадбир ҳам ўқувчиларнинг Ватанга бўлган муҳаббатини оширишга ва уларни келажакда жамиятнинг фаол аъзолари бўлишга руҳлантиргани билан аҳамиятли бўлди.

Бундай тарбиявий ишларнинг самараси келгусида ўқувчиларнинг комил инсон бўлиб, эл-юрт манфаати йўлида фидокорона хизмат қилишларида, жамиятнинг фаол ва масъулиятли аъзолари бўлиб етишишларида ўз самарасини бериши шубҳасиз.

Тадбирда якунида ота-оналар номидан Гулнора Шомуратова ва Ойша Ўразбоевалар, шунингдек 1-А синф раҳбари Баҳром Жиянов сўзга чиқиб, ўқитувчиларга, ўқувчиларга ва барча тадбир иштирокчиларига миннатдорчилик билдирди.