Нукус инновацион институтида ўтказилган илмий-назарий анжуманда соҳалардаги долзарб масалалар муҳокама қилинди
Олий таълим муассасаларида таҳсил олаётган ёшларнинг ўз соҳалари бўйича етук ва билимли мутахассис кадрлар бўлиб етишишларида уларга дарс бераётган профессор-ўқитувчиларнинг таълим жараёнида замонавий илм-фан ютуқларидан фаол фойдаланишлари муҳим аҳамият касб этади. Ўқитувчиларнинг ўзаро тажриба алмашиши, илм-фан соҳасидаги янгиликлар билан яқиндан танишишларида эса илмий-назарий анжуманларнинг ўрни беқиёс.
Ана шундай илмий-назарий анжуманларнинг навбатдагиси “Замонавий шароитда олий маълумотли мутахассисларни тайёрлашнинг инновацион йўналишлари: муаммо ва ечимлар” мавзусида Нукус инновацион институтида ташкил қилинди.
Дастлаб хориждан ва Республикамизнинг турли вилоятлардан ташриф буюрган меҳмонлар ҳамда анжуман иштирокчилари институт раҳбарияти тамонидан тантанали кутиб олинди. Ташриф буюрувчиларга қадриятимизга айланган анъана – нон-туз тутилди. Ёш созандалар ижросида янграган миллий куйлар ва жараён учун махсус тайёрланган кўргазма ташкилотчилар тамонидан анжуманга пухта ҳозирлик кўрилганининг амалий исботи бўлди. Конференцияда республикамизнинг турли ҳудудларидан етакчи тадқиқотчилар Zoom иловаси орқали онлайн тарзда ҳам иштирок этишди.
Анжуманнинг мақсади юқори малакали олий маълумотли мутахассислар тайёрлашнинг долзарб муаммолари ва инновацион йўналишларини муҳокама қилиш асносида замонавий илм-фан ютуқларининг илғор тажрибаларини амалиётга жорий этиш бўйича таклиф ва тавсияларни ишлаб чиқишдан иборат.
Анжуман аввалида Нукус инновацион институти ректори Анвар Аъзамов ва бир қатор меҳмонлар сўзга чиқиб, ўтказилаётган конференциянинг мақсади ва аҳамияти, бугунги кундаги олий таълим тизимидаги камчиликлар ва мауммолар ҳақида тўхталди.
Институтнинг илмий ишлар ва инновациялар бўйича проректори Алишер Юлдашев, Қорақалпоғистон Республикаси Олий таълим, фан ва инновациялар вазирлиги масъуллари, Туркиядаги Эгей университети профессори Пинар Фидакар хоним ҳамда Навоий давлат кончилик ва технологиялар университети Нукус филиали директори Атабек Қаипбергеновлар ўз табрик сўзларида конференция ишига омад тиладилар.
Конференцияда мамлакатимиздаги турли нуфузли олий таълим муассасаларидан ташриф буюрган профессор-ўқитувчилар томонидан “Талабаларда танқидий ва креатив фикрлашни ривожлантириш”, “Олий таълим муассасалари фаолиятига инновацион маркетингни жорий этиш”, “Олий таълим тизимида математика фанини йўналишларга боғлаб ўқитишнинг айрим жиҳатлари” каби ва бошқа мавзуларда маърузалар қилинди.
Анжуман давомида илм-фан соҳаларида эришилаётган ютуқлар, тадқиқот хулосаларининг амалиётдаги натижаси ва шу каби бошқа мавзуларда ўзаро фикр алмашилди.
Конференция шўбаларга бўлинган ҳолда ўз ишини давом эттирди.
Анжуман давомида Нукус инновацион институти ректори Анвар Аъзамов, институтнинг илмий ишлар ва инновациялар бўйича проректори Алишер Юлдашев, Эгей университети профессори Пинар Фидакар хоним, Қорақалпоғистон қишлоқ хўжалиги ва агротехнологиялар институтининг илмий ишлар ва инновациялар бўйича проректори Атабек Алимовлар оммавий ахборот воситалари вакилларига берган интервьюларида таъкидлаганларидек, конференция олий таълим муассасалари ўқитувчилари учун жуда аҳамиятли бўлди.
Айниқса, анжуманда бугунги куннинг энг долзарб мавзулари кўтарилгани, илмий-назарий тадқиқотларда эса яқин келажакда кутилаётган жараёнлар тўлиқ қамраб олингани Ўзбекистоннинг Учинчи Ренессансни барпо этиш йўлидаги амалий ислоҳотларига хизмат қилиши алоҳида эътироф этилди.
Хорижлик меҳмонларга мамлакатимизда олий маълумотли кадрларни тайёрлаш жараёнида қўлланилаётган инновацион ва педогогик технологиялар, бу борада эришилган натижалар, кредит-модуль тизимининг афзалликлари, профессор-ўқитувчилар фаолиятидаги ижодий рақобат, Ўзбекистон таълим тизимида тайёрланган кадрларнинг дунё бозорига чиқиши учун амалга оширилиши режалаштирилаётган ишлар ҳақида маълумотлар берилди.
Айтиш жоизки, Олий таълимнинг ривожланишида илмий-назарий конференциялар муҳим роль ўйнайди. Бу тадбирлар олимлар, талабалар ва ўқитувчилар учун ўз илмий ишларини намойиш этиш, янги илмий ғоялар ва ёндашувларни муҳокама қилиш ҳамда соҳадаги энг сўнгги тенденциялардан хабардор бўлиш учун имконият яратади.
Шунингдек, бу каби конференциялар илмий ҳамкорликни ривожлантириш ва академик ҳамжамиятни кенгайтиришга ҳам амалий ёрдам беради. Шу сабабли мамлакатимизда ҳам олий таълимни ривожлантириш ва уни халқаро стандартларга мослаштириш борасидаги ислоҳотлар доирасида илмий-назарий ва илмий-амалий конференцияларни ўтказишга алоҳида эътибор қаратилади.
Зеро, бу каби амалий ишлар мамлакатнинг илмий ва технологик салоҳиятини янада кучайтиришга, олий таълим муассасаларида таҳсил олаётган ёшларнинг келгусида меҳнат бозоридаги рақобатбардошлигини оширишга хизмат қилади.
Маълумот ўрнида айтиш керакки, бугунги кунда Нукус инновацион институтида дастурий инжиниринг, иқтисодиёт, молия ва молиявий технологиялар, бухгалтерия ҳисоби ва аудит каби 10та йўналишда жами 6 мингдан зиёд талаба таҳсил оляпти. Институтда 115 нафар профессор ўқитувчилар фаолият юритади. Фурсатдан фойдаланиб, ёшларимизни ушбу олий таълим муассасасига ўқишга ҳужжат топширишга чақириб қоламиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
