30-70 ёш ва ундан катта ёшдаги аҳоли вакилларидан спорт синовларини қабул қилишга бағишланган тадбир ўтказилди

Аҳолининг жисмоний фаоллигини ошириш, ҳаракатсизлик туфайли тобора кенг тус олаётган баъзи касалликларнинг олдини олиш, айниқса, ёшларни, шу баробарида кекса авлод вакилларини спортга кенг жалб этиш мақсадида мамлакатимизда тизимли ишлар амалга оширилмоқда. Ўзбекистон Республикаси Президентининг 2021 йил 16 июндаги "Аҳолининг жисмоний тайёргарлик даражасини баҳолаш тизимини жорий этишнинг ташкилий чора-тадбирлари тўғрисида"ги ҳамда Вазирлар Маҳкамасининг 2022 йил 15 январдаги "Аҳолининг жисмоний тайёргарлик даражасини баҳолаш бўйича спорт синовларини ташкил этиш ва ўтказиш тўғрисида"ги Қарорларига мувофиқ Ўзбекистон Республикаси Спорт вазирлиги, Оила ва хотин-қизлар қўмитаси ҳамда Ўзбекистон Маҳаллалари уюшмасининг қўшма Қарори асосида 2024 йилдан бошлаб ҳар йилда бир марта Республикада мавжуд барча маҳаллалардаги маҳалла тизими ходимлари ҳамда аҳоли вакилларидан "Жисмоний тайёргарлик даражаси" спорт синовлари қабул қилиб бориш тизимининг жорий этилгани ўзининг илк ижобий самараларини бермоқда.

Айниқса, аҳоли вакилларининг ўзларига маъқул келадиган спорт турлари билан шуғулланишлари, уларнинг фитнес клубларида, спорт тўгаракларида спорт билан мунтазам шуғулланишлари учун кўмаклашиш мақсадида қизиқарли спорт ўйинларини ташкил этишга қаратилган чора-тадбирлар эса халқимизнинг спорт-соғломлаштириш машғулотларида ихтиёрий тарзда қатнашишга бўлган интилишларини рағбатлантириш имконини бермоқда.

Бу борада Амударё тумани спорт ишлари бўлими, Оила ва хотин-қизлар бўлими ҳамда Ўзбекистон маҳаллалари уюшмаси Амударё туман бўлими томонидан амалга оширилаётган чора-тадбирлар эътиборга муносиб. Айниқса, "Саломатлик учун 5000 қадам", "Тонгги пиёда юриш ", "Саломатлик марафонлари" каби спорт-соғломлаштириш тадбирлари, "Биз оилавий спортчилармиз" мусобақаларида кенг аҳоли вакиллари ихтиёрий равишда, қизиқиш билан иштирок этишиб, ўз саломатликларига эътиборли бўлаётганлари қувонарлидир.

Жорий йилнинг 20 август куни Амударё туман спорт мактаби спорт майдончасида бўлиб ўтган 30-70 ёш ва ундан катта ёшдаги аҳоли вакилларидан спорт синовларини қабул қилишга бағишланган тадбир ҳам иштирокчиларнинг жисмоний фаоллигини оширишга қаратилгани билан ёрқин таассуротларга бой бўлди.

Аввало шуни алоҳида қайд этиш керакки, "Жисмоний тайёргарлик даражаси" спорт синовлари қабул қилиш жараёнига пухта тайёргарлик кўрилиб, унда ихтиёрий равишда иштирок этиш истагини билдирган аҳоли вакилларига "Жисмоний тайёргарлик даражаси" кўкрак нишони тақдим этилиши тўғрисида маълумотлар берилди. Кўрилган чора-тадбирлар ва амалга оширилган тарғибот ишлари туфайли жорий йилнинг 20 август санасида Амударё тумани спорт мактаби спорт майдончасида бўлиб ўтган мазкур тадбир иштирокчиларнинг юқори даражадаги фаолликлари асосида амалга оширилди.

Тадбирда иштирок этган 30-70 ёш ва ундан юқори ёшдаги туманнинг барча маҳаллаларидан келган эркак ва аёл аҳоли вакиллари "Жисмоний тайёргарлик даражаси" спорт синовлари қабул қилиш бўйича Низомда белгиланган талаблар даражасидаги машқларни ихтиёрий равишда бажариш асносида ўзларининг қай даражада жисмоний тайёргарликка эга эканликларини билиб олдилар.

Тадбир якунида энг фаол, шунингдек, жисмоний тайёргарлик даражаси юқори бўлган иштирокчилар ҳамкор ташкилотлар томонидан рағбатлантирилди.

Робия Йўлдошева.