Секторлар раҳбарларининг ёшлар ва фуқаролар билан сайёр қабули бўлиб ўтди

Амударё тумани ҳокими Собир Хўжаметов ҳамда секторлар раҳбарларининг 3-сектор ҳудудидаги овул ва маҳаллаларда яшовчи фуқаролар ва ёшлар иштирокида сайёр қабули бўлиб ўтди. Хитой овулидаги 2-сонли умумтаълим мактабининг фаоллар залида бўлиб ўтган сайёр қабулда ҳоким ўринбосарлари, бўлимлар масъуллари, корхона-ташкилотлар раҳбарлари ҳамда ҳудуддаги овул ва маҳаллаларда яшовчи аҳоли вакиллари иштирок этдилар.

Сайёр қабул аввалида туман ҳокими Собир Хўжаметов сўзга чиқиб, бугунги кунда муҳтарам Президентимиз ташаббуси билан амалга оширилаётган ислоҳотлар инсон қадри, аҳоли турмуш тарзини, яшаш шароитларини тубдан яхшилаш, халқни рози қилиш каби устувор мақсадларга қаратилганлиги хусусида сўз юритди. Йиғилганларга давлатимиз раҳбарининг, айниқса, Қорақалпоғистон Республикасида яшовчи аҳоли фаровонлигини таъминлашга қаратаётган эътибори алоҳида экани, ҳудудни комплекс ижтимоий-иқтисодий ривожлантириш учун берилаётган имконият ва яратилаётган шароитлар мислсизлиги таъкидланди.

Сайёр қабул мобайнида фуқаролардан турли масалалар юзасидан кўплаб мурожаатлар келиб тушди. Хусусан, Хитой овулида яшовчи Талғат Сарсенбаев овул аҳолисига мактабгача таълим ташкилоти зарурлиги, шу мақсадда эски боғча биносини ижара асосида олиб, унинг негизида янги муассаса фаолиятини йўлга қўйишда амалий ёрдам сўраб мурожаат қилди. Фуқаро Ражаббой Собиров эса мактаб чегарасини ажратувчи девор йўлда пиёдалар ва ҳайдовчилар ҳаракатланиши учун қийинчилик туғдираётганини айтиб, хавфсизликни таъминлаш мақсадида деворни қисман олиб ташлаб, панжара ўрнатишда амалий ёрдам сўраб мурожаат қилди.

Шунингдек, фуқаролар Нурлан Сарсенбоев фарзандининг олий таълим муассасасида ўқишни давом эттириши учун шартнома пулларини тўлашда, Зариф Холменов фарзандининг сафарбарлик резерви пулини қоплаб беришда, Замира Камолова кўчасига тош ётқизиб беришда, Олим Султанов эса Хитой овули марказига банкомат ўрнатишда амалий ёрдам сўраб мурожаат қилдилар.

Овул фуқароларининг мурожаатлари қайд этилиб, атрофлича ўрганиш ҳамда ижобий ҳал этиш юзасидан тегишли масъулларга топшириқлар берилди.

Сўнгра Бўзёп овулидан келган аҳолининг мурожаатлари қабул қилинди. Бўзёплик Ўскин Алиев кўчасига йўл чиқаришда қўшниси билан келишмовчиликлар келиб чиқаётгани сабабли янги кўчиб борган уйи жойлашган кўчага йўл чиқариб беришда амалий ёрдам сўраб, Абдулла Ўразимбетов Қурувчилар кўчасидаги электр симлари ва устунларини янгилаш масаласида, Ойбек Исчанов болаларнинг 68-сонли мактабга қатнашларида қийинчилик туғилаётгани сабабли Садриддин Айний кўчасининг 1500 км қисмига тош-шағал аралашмасини ётқизиш ҳамда янги электр симлари ва устунларини ўрнатиш бўйича, Қаландар Бобожонов эса ҳудуддаги Арслонбоп, Озодалик, Барчиной кўчаларига оқова сув етиб бориши учун Янги ёп каналининг ўнг томонидаги Ситёп каналини қазишда амалий ёрдам бериш масаласида мурожаат қилдилар.

Шундан сўнг Бобур номли ҳамда Куюк кўпир овуллари, Қизилчоли, Ўзбекистон, Тор ёп, Намуна маҳаллаларидан келган фуқаролар ҳамда ёшлар ички йўлларни таъмирлаш, олий таълим муассасаларининг шартнома пулларини тўлашда амалий ёрдам бериш, мутахассислиги асосида ишга жойлашиш каби масалалар юзасидан масъулларга мурожаатлар йўлладилар.

Сайёр қабулда фуқаролар томонидан йўлланган барча мурожаатлар қайд этиб борилди. Мурожаатларнинг аксарияти қабул жараёнида ўз ечимини топди. Қолган мурожаатларни ҳам белгиланган тартибда ижобий ҳал этиш учун масъуллар билан келишиб олинди ҳамда тегишли топшириқлар берилди.

Чарос Арслонова, туман ҳокимлигининг Ахборот хизмати раҳбари.