Sektorlar rahbarlarining yoshlar va fuqarolar bilan sayyor qabuli boʻlib oʻtdi

Amudaryo tumani hokimi Sobir Xoʻjametov hamda sektorlar rahbarlarining 3-sektor hududidagi ovul va mahallalarda yashovchi fuqarolar va yoshlar ishtirokida sayyor qabuli boʻlib oʻtdi. Xitoy ovulidagi 2-sonli umumtaʼlim maktabining faollar zalida boʻlib oʻtgan sayyor qabulda hokim oʻrinbosarlari, boʻlimlar masʼullari, korxona-tashkilotlar rahbarlari hamda hududdagi ovul va mahallalarda yashovchi aholi vakillari ishtirok etdilar.

Sayyor qabul avvalida tuman hokimi Sobir Xoʻjametov soʻzga chiqib, bugungi kunda muhtaram Prezidentimiz tashabbusi bilan amalga oshirilayotgan islohotlar inson qadri, aholi turmush tarzini, yashash sharoitlarini tubdan yaxshilash, xalqni rozi qilish kabi ustuvor maqsadlarga qaratilganligi xususida soʻz yuritdi. Yigʻilganlarga davlatimiz rahbarining, ayniqsa, Qoraqalpogʻiston Respublikasida yashovchi aholi farovonligini taʼminlashga qaratayotgan eʼtibori alohida ekani, hududni kompleks ijtimoiy-iqtisodiy rivojlantirish uchun berilayotgan imkoniyat va yaratilayotgan sharoitlar mislsizligi taʼkidlandi.

Sayyor qabul mobaynida fuqarolardan turli masalalar yuzasidan koʻplab murojaatlar kelib tushdi. Xususan, Xitoy ovulida yashovchi Talgʻat Sarsenbayev ovul aholisiga maktabgacha taʼlim tashkiloti zarurligi, shu maqsadda eski bogʻcha binosini ijara asosida olib, uning negizida yangi muassasa faoliyatini yoʻlga qoʻyishda amaliy yordam soʻrab murojaat qildi. Fuqaro Rajabboy Sobirov esa maktab chegarasini ajratuvchi devor yoʻlda piyodalar va haydovchilar harakatlanishi uchun qiyinchilik tugʻdirayotganini aytib, xavfsizlikni taʼminlash maqsadida devorni qisman olib tashlab, panjara oʻrnatishda amaliy yordam soʻrab murojaat qildi.

Shuningdek, fuqarolar Nurlan Sarsenboyev farzandining oliy taʼlim muassasasida oʻqishni davom ettirishi uchun shartnoma pullarini toʻlashda, Zarif Xolmenov farzandining safarbarlik rezervi pulini qoplab berishda, Zamira Kamolova koʻchasiga tosh yotqizib berishda, Olim Sultanov esa Xitoy ovuli markaziga bankomat oʻrnatishda amaliy yordam soʻrab murojaat qildilar.

Ovul fuqarolarining murojaatlari qayd etilib, atroflicha oʻrganish hamda ijobiy hal etish yuzasidan tegishli masʼullarga topshiriqlar berildi.

Soʻngra Boʻzyop ovulidan kelgan aholining murojaatlari qabul qilindi. Boʻzyoplik Oʻskin Aliyev koʻchasiga yoʻl chiqarishda qoʻshnisi bilan kelishmovchiliklar kelib chiqayotgani sababli yangi koʻchib borgan uyi joylashgan koʻchaga yoʻl chiqarib berishda amaliy yordam soʻrab, Abdulla Oʻrazimbetov Quruvchilar koʻchasidagi elektr simlari va ustunlarini yangilash masalasida, Oybek Ischanov bolalarning 68-sonli maktabga qatnashlarida qiyinchilik tugʻilayotgani sababli Sadriddin Ayniy koʻchasining 1500 km qismiga tosh-shagʻal aralashmasini yotqizish hamda yangi elektr simlari va ustunlarini oʻrnatish boʻyicha, Qalandar Bobojonov esa hududdagi Arslonbop, Ozodalik, Barchinoy koʻchalariga oqova suv yetib borishi uchun Yangi yop kanalining oʻng tomonidagi Sityop kanalini qazishda amaliy yordam berish masalasida murojaat qildilar.

Shundan soʻng Bobur nomli hamda Kuyuk koʻpir ovullari, Qizilcholi, Oʻzbekiston, Tor yop, Namuna mahallalaridan kelgan fuqarolar hamda yoshlar ichki yoʻllarni taʼmirlash, oliy taʼlim muassasalarining shartnoma pullarini toʻlashda amaliy yordam berish, mutaxassisligi asosida ishga joylashish kabi masalalar yuzasidan masʼullarga murojaatlar yoʻlladilar.

Sayyor qabulda fuqarolar tomonidan yoʻllangan barcha murojaatlar qayd etib borildi. Murojaatlarning aksariyati qabul jarayonida oʻz yechimini topdi. Qolgan murojaatlarni ham belgilangan tartibda ijobiy hal etish uchun masʼullar bilan kelishib olindi hamda tegishli topshiriqlar berildi.

Charos Arslonova, tuman hokimligining Axborot xizmati rahbari.