ЁШ ВА ИЗЛАНУВЧАН ЎҚИТУВЧИ
Амударё туманидаги 22-сонли умумтаълим мактабининг математика фани ўқитувчиси Отабек Каримов ўз педагогик фаолиятини бошлаганига ҳали кўп вақт бўлгани йўқ. Олийгоҳни тугатиб, ўқувчиларга математика фанидан илк дарс берган куни ҳамон ёдида. Ўшанда у болаларнинг худди мўъжизалар оламига киргандай, ҳайратлар оғушида дарсни қунт билан ўзлаштиришга ҳаракат қилишларини кўриб, чин дилдан қувонди ва албатта математика тўгарагини ташкил этишни кўнглига тугиб қўйди. Унинг бу ниятини мактаб директори Азимжон Бекберганов ҳам қўллаб-қувватлади. Шу тариқа тарбиявий ишлар таъсирчанлигини ошириш, болаларнинг бўш вақтларини мазмунли ташкил этиш мақсадида математика фанига қизиқувчи ўқувчилардан иборат “Ёш математиклар” тўгараги ташкил этилди.
Орадан ҳеч қанча вақт ўтмай Отабек Каримовнинг ўқувчилари фанлар олимпиадаларида туман босқичи ғолиблари сифатида олимпиаданинг Қорақалпоғистон Республикаси босқичида Амударё тумани шарафини муносиб ҳимоя қилиш даражасига етдилар.
Агар инсонда чуқур билим бўлса-ю, ташаббускорлик ва ташкилотчилик қобилияти бўлмаса, айниқса, у ўқитувчи сифатида фаолият юритса, ўз йўналиши бўйича бирон бир жиддий муваффақиятга эришиши қийин. Отабек Каримов ўқитувчилик фаолиятини бошлаган илк кунларданоқ нафақат математика фанининг билимдони, балки ташаббускор ва ташкилотчи ўз иш услубига эга педагог сифатида ҳамкасбларининг эътиборига сазовор бўлди.
2018 йилда Отабек Каримов томонидан ташкил этилган “Ёш математиклар” тўгараги таҳсилини олган битирувчи ёшлар ҳар йилги фанлар олимпиадасининг туман ва Қорақалпоғистон Республикаси босқичларида 22-сонли мактаб шарафини муносиб ҳимоя қилиб, совринли ўринларни эгаллаб келишмоқда. Ҳар йили тўгарак аъзоларининг деярли 90-95 фоизи олий таълим муассасалари талабалигига қабул қилинмоқда.
Шунингдек у Чойкўл ОФЙга бириктирилган ёшлар етакчиси томонидан ташкил қилинган “Заковат” интеллектуал ўйинларида, шашка, шахмат спорти мусобақаларида ҳам ўз ўқувчилари билан фаол иштирок этиш орқали юқори синфлар ўқувчиларининг бўш вақтларини мазмунли ўтказишларига муносиб ҳиссасини қўшиб, нафақат ўқувчи-ёшлар, балки ёш педагогларга ҳам ибрат бўлмоқда.
Унинг дарс жараёнида замонавий технологиялардан унумли фойдаланиш орқали дарсда ўқувчиларининг ўзлаштириш самарадорлигини таъминлашга қаратилган саъй ҳаракатлари ҳам таҳсинга лойиқ. Айниқса, билим масканида ва ўзи истиқомат қилаётган маҳаллада ўтказилаётган тадбирлардаги фаол иштироки, мамлакатимизда мустақиллик йилларида таълим соҳасида амалга оширилаётган кенг кўламли ислоҳотларнинг мазмун-моҳияти ва унинг амалий самараларини тарғиб қилишдаги фаол саъй-ҳаракатлари ота-оналарга жуда манзур.
– Фарзандим ўқимишли, эл-юртда обрў-эътиборли бўлсин, деган ота-она таълим- тарбия тизимидаги изчил ислоҳотлардан албатта хабардор бўлиши керак, – дейди Отабек Каримов. – Чунки давлат ҳар бир боланинг келажаги учун миллионлаб сўм маблағ сарфласа-ю, ота-оналар бу ҳақда хабардор бўлишмаса, фарзандларининг келажаги ҳақида ҳозирдан қайғуришмаса, таълим-тарбия ишларимизда муваффақиятга эриша олмаймиз. Шу боис, ўқитувчи билан ота-оналарнинг ҳамкорлиги жуда муҳим.
Отабек Каримов ўз педагогик фаолиятини бошлаганига энди 5 йил бўлди. Ўтган қисқа фурсат ичида у нафақат шогирдлари, балки, касбдошлари ва ҳамқишлоқлари орасида ўзининг самимийлиги, фидойилиги ва қатъияти билан “Отабек устоз” деган шарафли номга, эл-юрт ҳурматига сазовор бўлди. Зеро, ўқитувчи учун устозлик мақомининг ўзи энг улуғ бахтдир.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
