Қорақалпоғистон Республикаси Вазирлар Кенгаши Раисининг навбатдаги сайёр қабули Амударё туманида бўлиб ўтди

Сайёр қабул – фуқаролар билан мулоқот қилиш, уларнинг ҳаётий эҳтиёжларини ўрганиш, муаммоларига ижобий ечим топишда муҳим ўрин тутади. Мамлакатимизда раҳбарларнинг халқни қийнаб келаётган муаммоларни жойига бориб ўрганиш, халқ билан яқин алоқа ўрнатиш мақсадида ҳудудларга чиққан ҳолда сайёр қабуллар ташкил этиш тизими йўлга қўйилган бўлиб, ана шундай қабул жараёни Амударё туманининг Қиличбой овулида ҳам ташкил этилди. Қорақалпоғистон Республикаси Вазирлар Кенгаши Раиси Фарҳод Эрманов иштирокида бўлиб ўтган сайёр қабулда туман ҳокими Собир Хўжаметов, республика ҳамда тумандаги барча соҳалар бўйича масъуллар ҳамда ҳудудда яшовчи аҳоли вакиллари иштирок этди.

Таъкидлаш жоизки, ҳудудларда ўтказилаётган сайёр қабуллар ва аҳоли вакиллари билан мулоқотлар одамларни қийнаётган муаммоларини ҳал этиш, оғирини енгил қилишдамуҳим восита бўлиб, фуқароларнинг давлатга, эртанги кунга бўлган ишончини мустаҳкамламоқда. Турли даражадаги давлат ҳокимияти ва бошқарув органлари раҳбарларининг аҳоли вакиллари билан мулоқотлари одамларнинг орзу-истаклари, талаб ва эҳтиёжларини ўрганиш, уларга имкон қадар кўмак бериш, мавжуд муаммоларга ўз жойида ечим топиш имконини бермоқда.

Сайёр қабул жараёнида фуқаролардан турли масалалар юзасидан кўплаб мурожаатлар келиб тушди. Хусусан, фуқаролардан бири Аёқчи маҳалласида жойлашган катта йўлга 1,5 км пиёдалар йўлакчаси қуриб беришда ҳамда Посбон кўчасидан Саломат кўчасигача оралиқда 180 метр узунликда пиёдалар йўлакчаси қилишда ёрдам сўраган бўлса, яна бири Қиличбой овулидаги 4- Ибрайим Юсупов кўчасини асфальт қилиб беришда амалий ёрдам сўраб мурожаат қилади. Шунингдек, Қиличбой овулида яшовчи Замира Эшимметованинг овулдаги 5-Авесто кўчасига электр энергияси етказиб беришни яхшилаш бўйича сўраб қилган мурожаати жараённинг ўзида ижобий ечими топди.

Қолаверса, фуқаролар маҳалласидаги боғчага борадиган йўлларни таъмирлаш, маҳаллага 250 ўринли боғча қуриб бериш, эски кўприкни таъмирлаб бериш, тадбиркорлик қилиш учун ер майдони ажратиб бериш, ҳовлисининг ичидаги трансформаторни бошқа жойга кўчириб бериш, 70-сонли мактаб олдидаги йўл ёқасига пиёдалар йўлакчаси қуриш каби қатор масалалар билан мурожаат қилдилар.

Қабул жараёнидаги аксарият мурожаатлар жойида ўзининг ижобий ечимини топди. Ечими маълум вақт талаб қиладиган мурожаатлар Қорақалпоғистон Республикаси Вазирлар Кенгаши Раисининг шахсий назоратига олиниб, тез фурсатда уларни ижобий ҳал этиш бўйича тегишли соҳа раҳбарларига топшириқлар берилди.

Юртимизда “Инсон қадри учун” тамойили асосида ўтказилаётган бундай сайёр қабуллар фуқаролар ҳаётида учраётган ва уларни қийнаётган муаммоларга ечим топишда ҳамда халқимизнинг бугунги кунидан рози бўлиб яшаши йўлида яна бир амалий қадам бўлади. Зеро, инсон манфаатларини таъминлаш учун аввало, одамлар билан, халқ билан мулоқот қилиш, уларнинг ҳаётий муаммо ва эҳтиёжларини яхши билиш алоҳида аҳамият касб этади.

Чарос Арслонова, туман ҳокимлигининг Ахборот хизмати раҳбари.