Ўзбекистон Экологик партиясидан депутатликка номзодларнинг сайловчилар билан учрашуви бўлиб ўтди

2024 йил 27 октябрь куни мамлакатимизда Олий Мажлис Қонунчилик палатаси ва маҳаллий кенгашларга сайловлар ўтказилади. Бу сайловлар демократик жараёнларининг муҳим босқичи бўлиб, мамлакатда сиёсий ҳокимиятнинг халқчиллиги ва шаффофлигини таъминлашга хизмат қилади.

Айни кунларда жойларда сиёсий партиялар ва депутатликка номзодларнинг сайловчилар билан учрашувлар ташкил қилинмоқда. Амударё туманидаги 9-сонли Болалар мусиқа ва санъат мактаби биносида ҳам сайловолди ташвиқоти доирасида Ўзбекистон Экологик партиясидан депутатликка номзодларнинг сайловчилар билан учрашуви бўлиб ўтди.

Учрашувда Ўзбекистон Республикаси Олий Мажлис Қонунчилик палатаси, Қорақалпоғистон Республикаси Жўқорғи Кенгеси ва халқ депутатлари Амударё туман Кенгашига Ўзбекистон Экологик партиясидан кўрсатилган номзодлар, уларнинг ишончли вакиллари ва партия фаоллари иштирок этди.

Учрашувда номзодлар ўз сайловолди дастурлари ҳақида маълумотлар бериб, мамлакатнинг барқарор ривожланиши йўлида бугунги ва келажак авлод учун қулай атроф-муҳитни яратиш, хавфсиз ва самарали яшил иқтисодиётга ўтиш, инсон ва табиат уйғунлиги устувор бўлган барқарор жамият барпо этиш ғояси илгари сурилган партиянинг сайловолди дастури билан сайловчиларни яқиндан таништирдилар.

Таъкидланганидек, иқлим ўзгариши, табиат мувозанатининг издан чиқиши дунё ҳамжамиятини жиддий ташвишга солиб турган ҳозирги вазиятни англаган ҳолда, партия атроф-муҳит барқарорлигига эришиш, табиий ресурслардан оқилона фойдаланиш масаласи нафақат давлат ва жамият, балки ҳар бир инсон, оила ва маҳалланинг бирламчи устувор вазифаси бўлишига эришиш учун ҳаракат қилади. Партия соғлом келажакни тизимли экологик муаммоларга ечим топмасдан қуриб бўлмаслигига қатъий эътибор қаратади.

Ҳар бир инсоннинг соғлом атроф-муҳитга эга бўлиши, мусаффо ҳаводан нафас олиши, тоза ичимлик суви, хавфсиз ва экологик тоза озиқ-овқат истеъмол қилиши, келажак авлодлар учун муносиб Ватан қолдириш учун бугундан, ҳозирдан аниқ амалий чоралар кўриш – партиянинг асосий талабидир.

Бугун дунёда экологик хавфсизлик масаласи энг устувор вазифага айланиб улгурди. Шу сабабли партия мамлакатимизда иқлим ўзгаришига мослашиш, сув тақчиллигининг олдини олиш, чўлланишга қарши курашиш, озиқ-овқат таъминотида барқарорликка эришиш, атмосфера ҳавосининг сифатини яхшилаш каби масалаларни экологик хавфсизликнинг асоси деб билади.

Ўзбекистон Экологик партияси “Табиат учун бирлашайлик” шиорини илгари суради ва табиатнинг бугунги овозига қулоқ тутишга чақиради. Барчани соғлом ва барқарор келажак сари, кўз олдимизда намоён бўлиб турган тизимли экологик муаммоларга қарши ҳаётий ечимларга эришиш томон бошлайди.

Шунингдек, учрашувда сайловчилар ҳам ўзларини қизиқтирган саволлар билан партия масъуллари ва депутатликка номзодларга мурожаат қилиб, жавоб олиш имкониятига эга бўлдилар.