Oʻzbekiston Ekologik partiyasidan deputatlikka nomzodlarning saylovchilar bilan uchrashuvi boʻlib oʻtdi

2024-yil 27-oktyabr kuni mamlakatimizda Oliy Majlis Qonunchilik palatasi va mahalliy kengashlarga saylovlar oʻtkaziladi. Bu saylovlar demokratik jarayonlarining muhim bosqichi boʻlib, mamlakatda siyosiy hokimiyatning xalqchilligi va shaffofligini taʼminlashga xizmat qiladi.

Ayni kunlarda joylarda siyosiy partiyalar va deputatlikka nomzodlarning saylovchilar bilan uchrashuvlar tashkil qilinmoqda. Amudaryo tumanidagi 9-sonli Bolalar musiqa va sanʼat maktabi binosida ham saylovoldi tashviqoti doirasida Oʻzbekiston Ekologik partiyasidan deputatlikka nomzodlarning saylovchilar bilan uchrashuvi boʻlib oʻtdi.

Uchrashuvda Oʻzbekiston Respublikasi Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari Amudaryo tuman Kengashiga Oʻzbekiston Ekologik partiyasidan koʻrsatilgan nomzodlar, ularning ishonchli vakillari va partiya faollari ishtirok etdi.

Uchrashuvda nomzodlar oʻz saylovoldi dasturlari haqida maʼlumotlar berib, mamlakatning barqaror rivojlanishi yoʻlida bugungi va kelajak avlod uchun qulay atrof-muhitni yaratish, xavfsiz va samarali yashil iqtisodiyotga oʻtish, inson va tabiat uygʻunligi ustuvor boʻlgan barqaror jamiyat barpo etish gʻoyasi ilgari surilgan partiyaning saylovoldi dasturi bilan saylovchilarni yaqindan tanishtirdilar.

Taʼkidlanganidek, iqlim oʻzgarishi, tabiat muvozanatining izdan chiqishi dunyo hamjamiyatini jiddiy tashvishga solib turgan hozirgi vaziyatni anglagan holda, partiya atrof-muhit barqarorligiga erishish, tabiiy resurslardan oqilona foydalanish masalasi nafaqat davlat va jamiyat, balki har bir inson, oila va mahallaning birlamchi ustuvor vazifasi boʻlishiga erishish uchun harakat qiladi. Partiya sogʻlom kelajakni tizimli ekologik muammolarga yechim topmasdan qurib boʻlmasligiga qatʼiy eʼtibor qaratadi.

Har bir insonning sogʻlom atrof-muhitga ega boʻlishi, musaffo havodan nafas olishi, toza ichimlik suvi, xavfsiz va ekologik toza oziq-ovqat isteʼmol qilishi, kelajak avlodlar uchun munosib Vatan qoldirish uchun bugundan, hozirdan aniq amaliy choralar koʻrish – partiyaning asosiy talabidir.

Bugun dunyoda ekologik xavfsizlik masalasi eng ustuvor vazifaga aylanib ulgurdi. Shu sababli partiya mamlakatimizda iqlim oʻzgarishiga moslashish, suv taqchilligining oldini olish, choʻllanishga qarshi kurashish, oziq-ovqat taʼminotida barqarorlikka erishish, atmosfera havosining sifatini yaxshilash kabi masalalarni ekologik xavfsizlikning asosi deb biladi.

Oʻzbekiston Ekologik partiyasi “Tabiat uchun birlashaylik” shiorini ilgari suradi va tabiatning bugungi ovoziga quloq tutishga chaqiradi. Barchani sogʻlom va barqaror kelajak sari, koʻz oldimizda namoyon boʻlib turgan tizimli ekologik muammolarga qarshi hayotiy yechimlarga erishish tomon boshlaydi.

Shuningdek, uchrashuvda saylovchilar ham oʻzlarini qiziqtirgan savollar bilan partiya masʼullari va deputatlikka nomzodlarga murojaat qilib, javob olish imkoniyatiga ega boʻldilar.