Қорамон маҳалласида 150 ўринли замонавий мактабгача таълим ташкилоти биноси фойдаланишга топширилди

Амударё тумани Қорамон маҳалласида халқнинг кўп йиллик орзулари ушалди. Маҳалла аҳолисининг таклиф ва мурожаатлари инобатга олиниб, бунёд этилган муассаса биносининг очилиш маросимида туман ҳокими Собир Хўжаметов, секторлар раҳбарлари, ҳоким ўринбосарлари, Мактабгача ва мактаб таълими бўлими масъуллари, қурувчилар ҳамда аҳоли вакиллари иштирок этди.

Очилиш маросимида туман ҳокими Собир Хўжаметов сўзга чиқиб, барчани бунёдкорлик ишининг муваффақиятли якунланиб, муассаса биносининг фойдаланишга топширилаётгани билан самимий табриклади. Туман ҳокими ўз сўзида сўнгги йилларда юртимизда таълим-тарбия сифатини оширишга катта эътибор қаратилиб, мактабгача таълим ташкилотлари сонининг кўпайиши натижасида болалар қамрови тобора ортиб бораётгани, фарзандларимизнинг баркамол авлод бўлиб вояга етишида боғчада олган таълим-тарбия муҳим аҳамият касб этиши, шу боисдан ҳам халқ учун, айниқса, олис ва чекка ҳудудлар аҳолиси учун янги замонавий мактабгача таълим ташкилотлари бунёд этилаётгани хусусида сўз юритди.

Тадбирда туман прокурори, 2-сектор раҳбари Абат Джумамуратов сўзга чиқиб, меҳнаткаш қорамонликлар учун қад ростлаган таълим-тарбия масканида ватанимиз равнақига ярайдиган баркамол авлод, юртимизнинг порлоқ келажагига ҳисса қўшадиган комил фарзандлар етишиб чиқишига тилакдош бўлди. Туман мактабгача ва мактаб таълими бўлими бошлиғи Ялғаш Шомуратов ўз нутқида муассаса жамоасининг таълим-тарбия соҳаси ривожи йўлида яратилаётган имкониятлар, соҳага қаратилган эътибор ва билдирилган юксак ишончни оқлашига, янги бинода болажонларга сифатли таълим-тарбия беришларида омад ва зафарлар тилади.

Тадбирда сўзга чиққанлар мазкур бинонинг қурилиши маҳалла аҳли учун жуда катта хайрли ишлардан бири бўлганлигини, эндиликда қишлоқ аёлларининг мушкули янада осон бўлишини алоҳида таъкидладилар. Қолаверса, “Mang‘it invest maximum” МЧЖ қурувчи ташкилоти томонидан 6,5 млрд сўмдан ортиқ маблағ ҳисобига олиб борилган қурилиш натижасида замонавий шарт-шароитларга эга бўлган 150 ўринли муассаса биносининг ўз муддатида фойдаланишга топширилгани учун қурувчиларга миннатдорчилик билдирилди.

Шундан сўнг қурувчи ташкилот раҳбари томонидан муассаса биносининг рамзий калити раҳбариятга тантанали равишда топширилиб, рамзий тасма қирқилди ва бино фойдаланишга топширилди.

Туман ҳокими бошчилигида тадбир иштирокчилари замонавий мактабгача таълим ташкилотидаги шарт-шароитлар билан яқиндан танишдилар, овқатланиш ва дам олиш хоналари, машғулотларни ўтиш хоналарини кўздан кечирдилар.

Таъкидлаш керакки, сўнгги йилларда мамлакатимизда ўсиб келаётган авлодни соғлом ва ҳар томонлама баркамол қилиб вояга етказиш, таълим-тарбия жараёнига самарали таълим ва тарбия шакллари ҳамда усулларини жорий этишга қаратилган мактабгача таълимнинг самарали тизимини ташкил этиш бўйича кенг кўламли ишлар амалга оширилди.

Мактабгача таълим соҳасида давлат-хусусий шерикликни ривожлантириш учун яратилган қулай шарт-шароитлар нодавлат мактабгача таълим ташкилотлари сонини янада ошириш ва улар кўрсатадиган хизматлар турларини кенгайтириш учун мустаҳкам пойдевор бўлди. Қолаверса, олис ва чекка ҳудудларда аҳоли фаровонлиги йўлида янги давлат мактабгача таълим ташкилотларининг иш бошлаши фарзандларимизнинг сифатли таълим-тарбия олишига, мактабгача таълим тизимида қамровни янада кенгайтириб, сифатни янги босқичга олиб чиқишга хизмат қилиши шубҳасиз.

Чарос Арслонова, туман ҳокимлигининг Ахборот хизмати раҳбари.