Qoramon mahallasida 150-oʻrinli zamonaviy maktabgacha taʼlim tashkiloti binosi foydalanishga topshirildi

Amudaryo tumani Qoramon mahallasida xalqning koʻp yillik orzulari ushaldi. Mahalla aholisining taklif va murojaatlari inobatga olinib, bunyod etilgan muassasa binosining ochilish marosimida tuman hokimi Sobir Xoʻjametov, sektorlar rahbarlari, hokim oʻrinbosarlari, Maktabgacha va maktab taʼlimi boʻlimi masʼullari, quruvchilar hamda aholi vakillari ishtirok etdi.

Ochilish marosimida tuman hokimi Sobir Xoʻjametov soʻzga chiqib, barchani bunyodkorlik ishining muvaffaqiyatli yakunlanib, muassasa binosining foydalanishga topshirilayotgani bilan samimiy tabrikladi. Tuman hokimi oʻz soʻzida soʻnggi yillarda yurtimizda taʼlim-tarbiya sifatini oshirishga katta eʼtibor qaratilib, maktabgacha taʼlim tashkilotlari sonining koʻpayishi natijasida bolalar qamrovi tobora ortib borayotgani, farzandlarimizning barkamol avlod boʻlib voyaga yetishida bogʻchada olgan taʼlim-tarbiya muhim ahamiyat kasb etishi, shu boisdan ham xalq uchun, ayniqsa, olis va chekka hududlar aholisi uchun yangi zamonaviy maktabgacha taʼlim tashkilotlari bunyod etilayotgani xususida soʻz yuritdi.

Tadbirda tuman prokurori, 2-sektor rahbari Abat Djumamuratov soʻzga chiqib, mehnatkash qoramonliklar uchun qad rostlagan taʼlim-tarbiya maskanida vatanimiz ravnaqiga yaraydigan barkamol avlod, yurtimizning porloq kelajagiga hissa qoʻshadigan komil farzandlar yetishib chiqishiga tilakdosh boʻldi. Tuman maktabgacha va maktab taʼlimi boʻlimi boshligʻi Yalgʻash Shomuratov oʻz nutqida muassasa jamoasining taʼlim-tarbiya sohasi rivoji yoʻlida yaratilayotgan imkoniyatlar, sohaga qaratilgan eʼtibor va bildirilgan yuksak ishonchni oqlashiga, yangi binoda bolajonlarga sifatli taʼlim-tarbiya berishlarida omad va zafarlar tiladi.

Tadbirda soʻzga chiqqanlar mazkur binoning qurilishi mahalla ahli uchun juda katta xayrli ishlardan biri boʻlganligini, endilikda qishloq ayollarining mushkuli yanada oson boʻlishini alohida taʼkidladilar. Qolaversa, “Mang‘it invest maximum” MChJ quruvchi tashkiloti tomonidan 6,5 mlrd soʻmdan ortiq mablagʻ hisobiga olib borilgan qurilish natijasida zamonaviy shart-sharoitlarga ega boʻlgan 150-oʻrinli muassasa binosining oʻz muddatida foydalanishga topshirilgani uchun quruvchilarga minnatdorchilik bildirildi.

Shundan soʻng quruvchi tashkilot rahbari tomonidan muassasa binosining ramziy kaliti rahbariyatga tantanali ravishda topshirilib, ramziy tasma qirqildi va bino foydalanishga topshirildi.

Tuman hokimi boshchiligida tadbir ishtirokchilari zamonaviy maktabgacha taʼlim tashkilotidagi shart-sharoitlar bilan yaqindan tanishdilar, ovqatlanish va dam olish xonalari, mashgʻulotlarni oʻtish xonalarini koʻzdan kechirdilar.

Taʼkidlash kerakki, soʻnggi yillarda mamlakatimizda oʻsib kelayotgan avlodni sogʻlom va har tomonlama barkamol qilib voyaga yetkazish, taʼlim-tarbiya jarayoniga samarali taʼlim va tarbiya shakllari hamda usullarini joriy etishga qaratilgan maktabgacha taʼlimning samarali tizimini tashkil etish boʻyicha keng koʻlamli ishlar amalga oshirildi.

Maktabgacha taʼlim sohasida davlat-xususiy sheriklikni rivojlantirish uchun yaratilgan qulay shart-sharoitlar nodavlat maktabgacha taʼlim tashkilotlari sonini yanada oshirish va ular koʻrsatadigan xizmatlar turlarini kengaytirish uchun mustahkam poydevor boʻldi. Qolaversa, olis va chekka hududlarda aholi farovonligi yoʻlida yangi davlat maktabgacha taʼlim tashkilotlarining ish boshlashi farzandlarimizning sifatli taʼlim-tarbiya olishiga, maktabgacha taʼlim tizimida qamrovni yanada kengaytirib, sifatni yangi bosqichga olib chiqishga xizmat qilishi shubhasiz.

Charos Arslonova, tuman hokimligining Axborot xizmati rahbari.