Менингит касаллигининг олдин олиш мақсадида ўқувчилардан бактериологик суртма олинди
Ўзбекистон Республикаси Соғлиқни сақлаш вазирлигининг “Бошқариладиган юқумли касалликлар иммунопрофилактикасини ташкил этиш ва ўтказиш ҳақида”ги буйруғига асосан менингококк инфекцияси бўйича ҳар бир аниқ ҳудуддаги эпидемик вазиятни баҳолаш учун юқори хавф гуруҳига кирувчи аҳоли бактериологик текширув билан қамраб олиниши кўзда тутилган. Текширув янги жамоалар, масалан, синф, умумий ётоқхона ёки бошқалар ташкил қилинганда, яъни куз-қиш ойлари мобайнида ўтказилиши ва ҳар бир туманда жами 110та шахс қамраб олиниши зарур.
2024 йил куз-қиш ойларида эпидемиологик вазиятни баҳолаш ва менингококк инфекциясининг тарқалишининг олдини олиш мақсадида Амударё тумани Санитария-эпидемиологик осойишталик ва жамоат саломатлиги маркази масъул ходимлари томонидан тумандаги ихтисослаштирилган мактабда таҳсил олаётган 63 нафар ҳамда 2-сонли касб-ҳунар мактабида таълим олаётган 42 нафар ўқувчининг бурун-ҳалқумидан бактериологик текшириш учун суртма намуналари олинди. Бу – жамоат саломатлигини сақлашда муҳим чоралардан бири ҳисобланади.
Айтиш жоизки, юқумли касалликлар одамлар ўртасида тез тарқалиши мумкин бўлган жиддий тиббий муаммолардан биридир. Мазкур касалликлар жамоат саломатлигига жиддий таҳдид солади, шунингдек, иқтисодий барқарорлик ва ижтимоий фаровонликка ҳам таъсир кўрсатиши мумкин. Шундай шароитда юқумли касалликларга қарши профилактик эмлаш унинг олдини олиш ва эпидемияларни барвақт тўхтатишнинг энг самарали воситаси ҳисобланади
Менингококк инфекцияси менингококклар қўзғатадиган ўткир инфекцион касаллик бўлиб, у асосан қиш ва баҳор фаслида учрайди. Бу касаллик одатда кичик ёшдаги болалар учун ўта хавфли ҳамда катта ёшдаги кишиларда ҳам учрайди. Инфекция бурун ва ҳалқум шиллиқ пардасининг яллиғланиб зарарланиши, бош мия юмшоқ пардасининг йирингли яллиғланиши ҳамда орқа мия яллиғланиши билан кечадиган касаликдир.
Касаллик кутилмаганда кучли бош оғриғи, тана ҳароратининг кўтарилиши, кўнгил айниши, қайд қилиш, ёруғликка сезгирликнинг ошиши ва бўйин томирларининг тиришиши билан бошланади. Бу инфекция касал одамдан соғлом одамга аксирганда, йўталганда ҳаво-томчи йўли орқали юқади.
Бирор бинодаги кишиларнинг сонининг ҳаддан зиёд ошиб кетиши, хонадаги ҳаво намлигининг юқорилиги, санитар-гигиеник талабларнинг бузилиши инфекция тарқалишига ва менингококк инфекцияси билан гуруҳли касалланиш ҳолатлари пайдо бўлишига олиб келади. Эпидемик тарқалиш ҳолатлари аксарият ҳолларда болалар ва ўсмирларнинг уюшган жамоаларида содир бўлади. Бундай ҳолларда жамоатга янги қўшилган ёки бошқа аҳоли пунктларидан келган шахсларнинг касалланиш хавфи айниқса юқори бўлади.
Амударё тумани Санитария-эпидемиологик осойишталик ва жамоат саломатлиги маркази масъул ходимлари ўқувчиларга менингитдан ҳимояланишнинг йўллари ҳақида маълумотлар беришди. Жумладан, гигиена қоидаларига амал қилиш касаллик тарқалишини камайтиришда муҳим аҳамиятга эга. Жамоат жойларида ҳимоя ниқобларидан фойдаланиш, қўлларни тез-тез ювиш ва жамоат гигиенаси қоидаларига риоя қилиш касалликни олдини олишда самарали чоралардир. Бундан ташқари, иммун тизимини мустаҳкамлаш учун соғлом турмуш тарзига амал қилиш, тўғри овқатланиш ва стрессдан сақланиш тавсия қилинди. Менингококк инфекциясига қарши эпидемиологик кўрсатма бўйича профилактик эмлаш ўтказилиши бўйича ҳам маълумотлар берилди.
Юқумли касалликлар иммунопрофилактикаси жамоат саломатлигини сақлаш ва касалликларнинг тарқалишини олдини олишда муҳим аҳамият касб этади. Давлат томонидан қабул қилинган умумий қоидалар ва эмлаш дастурлари юқумли касалликлар хавфини камайтириш ва аҳоли саломатлигини мустаҳкамлашга йўналтирилгани билан аҳамиятлидир.
Давронбек Гулмирзаев, Амударё тумани Санитария-эпидемиологик осойишталик ва жамоат саломатлиги бўлими эпидемиолог врачи
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
