Тадбиркорлар ва ишбилармонлар ҳаракати – Ўзбекистон Либерал-демократик партиясидан депутатликка номзодларнинг сайловчилар билан учрашуви бўлиб ўтди

Жорий йил 27 октябрда бутун мамлакатимизда муҳим сиёсий жараён – Олий Мажлис Қонунчилик палатаси ва маҳаллий кенгашларга сайловлар ўтказилади. Айни кунларда сиёсий партиялар ва депутатликка номзодларининг жойларда сайловчилар билан учрашувлари бўлиб ўтмоқда. 18 октябрь куни Амударё туманининг Тўлқин ОФЙ биносида Тадбиркорлар ва ишбилармонлар ҳаракати – Ўзбекистон Либерал-демократик партиясидан Халқ депутатлари туман Кенгаши депутатлига номзод – туман ҳокими Собир Хўжаметовнинг сайловчилар билан учрашуви ташкил этилди.

Учрашувда депутатликка номзоднинг ишончли вакили, сиёсий партия фаоллари ҳамда сайловчилар иштирок этдилар. Дастлаб ишончли вакил томонидан депутатликка номзоднинг таржимаи ҳоли ўқиб эшиттирилди. Шундан сўнг партиянинг сайловолди дастури ҳақида, унда илгари сурилган устувор мақсадлар хусусида сўз юритилди.

Таъкидланганидек, мамлакатимизда Президент Шавкат Мирзиёев бошчилигида тадбиркорликни қўллаб-қувватлаш, эҳтиёжмандларга кўмаклашиш, очиқлик сиёсатини юритиш, мамлакат иқтисодиётини ривожлантириш ва халқаро нуфузини ошириш бўйича тарихий ислоҳотлар амалга оширилмоқда. Партия юртимизда амалга оширилаётган ислоҳотларнинг бош мақсади инсонга, унинг эркин ҳаёти, қадр-қиммати ва фаровонлигига қаратилганини эътироф этади.

Партиянинг сайловолди дастури ана шу ислоҳотларни изчил давом эттирган ҳолда “Эркин ва фаровон, қудратли янги Ўзбекистонни биргаликда қурамиз!” ғояси остида халқимиз фаровонлиги учун 5 мақсад ва 500 вазифани амалга оширишни кўзда тутади. Инсонларнинг фаровон ҳаёт кечириши, фарзандларнинг сифатли таълим ва тиббиётдан баҳраманд бўлиши, аёллар ва нуронийлар, жамики юртдошларимиз бахтли яшаши, халқимиз дастурхони тўкин бўлиши ҳамда эртанги кунимиз ёруғ бўлиши учун партия ушбу мақсад ҳамда вазифаларни келгуси 5 йилда ўз вакиллари орқали тўлиқ рўёбга чиқаришни режа қилмоқда.

Партиянинг сайловолди дастури барқарор иқтисодий ўсиш орқали ҳар бир инсон, оила ва жамият фаровонлигига эришиш, сифатли таълим, тиббиёт ва кучли ижтимоий ҳимояни таъминлаш, аҳолига қулай атроф-муҳит шароитларини яратиш, халқ хизматидаги адолатли ва замонавий давлатни барпо этиш ҳамда мамлакатимиз суверенитети ва хавфсизлигини кафолатлаш каби устувор йўналишларни қамраб олади.

Учрашувда депутатликка номзод сўзга  чиқиб, партия сайловолди дастуридаги устувор мақсадларни амалга ошириш, аҳоли турмуш фаровонлиги, иқтисодиёт ривожи, ҳудудлар ободлиги ва жамият фаровонлиги йўлида фидойилик билан меҳнат қилишини, бунинг учун бор билим ва тажрибаларини ишга солишини маълум қилди.

Учрашув мобайнида сайловчилар Тадбиркорлар ва ишбилармонлар ҳаракати – Ўзбекистон Либерал-демократик партияси ҳамда депутатликка номзоднинг сайловолди дастури бўйича фикр-мулоҳазалар билдирдилар. Қолаверса, сайловчилар депутатликка номзод ҳамда сиёсий партия фаолларига ўзларини қизиқтирган саволлар билан мурожаат қилдилар ва тегишли жавоблар олдилар.