Tadbirkorlar va ishbilarmonlar harakati – Oʻzbekiston Liberal-demokratik partiyasidan deputatlikka nomzodlarning saylovchilar bilan uchrashuvi boʻlib oʻtdi

Joriy yil 27-oktyabrda butun mamlakatimizda muhim siyosiy jarayon – Oliy Majlis Qonunchilik palatasi va mahalliy kengashlarga saylovlar oʻtkaziladi. Ayni kunlarda siyosiy partiyalar va deputatlikka nomzodlarining joylarda saylovchilar bilan uchrashuvlari boʻlib oʻtmoqda. 18-oktyabr kuni Amudaryo tumanining Toʻlqin OFY binosida Tadbirkorlar va ishbilarmonlar harakati – Oʻzbekiston Liberal-demokratik partiyasidan Xalq deputatlari tuman Kengashi deputatliga nomzod – tuman hokimi Sobir Xoʻjametovning saylovchilar bilan uchrashuvi tashkil etildi.

Uchrashuvda deputatlikka nomzodning ishonchli vakili, siyosiy partiya faollari hamda saylovchilar ishtirok etdilar. Dastlab ishonchli vakil tomonidan deputatlikka nomzodning tarjimai holi oʻqib eshittirildi. Shundan soʻng partiyaning saylovoldi dasturi haqida, unda ilgari surilgan ustuvor maqsadlar xususida soʻz yuritildi.

Taʼkidlanganidek, mamlakatimizda Prezident Shavkat Mirziyoyev boshchiligida tadbirkorlikni qoʻllab-quvvatlash, ehtiyojmandlarga koʻmaklashish, ochiqlik siyosatini yuritish, mamlakat iqtisodiyotini rivojlantirish va xalqaro nufuzini oshirish boʻyicha tarixiy islohotlar amalga oshirilmoqda. Partiya yurtimizda amalga oshirilayotgan islohotlarning bosh maqsadi insonga, uning erkin hayoti, qadr-qimmati va farovonligiga qaratilganini eʼtirof etadi.

Partiyaning saylovoldi dasturi ana shu islohotlarni izchil davom ettirgan holda “Erkin va farovon, qudratli yangi Oʻzbekistonni birgalikda quramiz!” gʻoyasi ostida xalqimiz farovonligi uchun 5 maqsad va 500 vazifani amalga oshirishni koʻzda tutadi. Insonlarning farovon hayot kechirishi, farzandlarning sifatli taʼlim va tibbiyotdan bahramand boʻlishi, ayollar va nuroniylar, jamiki yurtdoshlarimiz baxtli yashashi, xalqimiz dasturxoni toʻkin boʻlishi hamda ertangi kunimiz yorugʻ boʻlishi uchun partiya ushbu maqsad hamda vazifalarni kelgusi 5-yilda oʻz vakillari orqali toʻliq roʻyobga chiqarishni reja qilmoqda.

Partiyaning saylovoldi dasturi barqaror iqtisodiy oʻsish orqali har bir inson, oila va jamiyat farovonligiga erishish, sifatli taʼlim, tibbiyot va kuchli ijtimoiy himoyani taʼminlash, aholiga qulay atrof-muhit sharoitlarini yaratish, xalq xizmatidagi adolatli va zamonaviy davlatni barpo etish hamda mamlakatimiz suvereniteti va xavfsizligini kafolatlash kabi ustuvor yoʻnalishlarni qamrab oladi.

Uchrashuvda deputatlikka nomzod soʻzga  chiqib, partiya saylovoldi dasturidagi ustuvor maqsadlarni amalga oshirish, aholi turmush farovonligi, iqtisodiyot rivoji, hududlar obodligi va jamiyat farovonligi yoʻlida fidoyilik bilan mehnat qilishini, buning uchun bor bilim va tajribalarini ishga solishini maʼlum qildi.

Uchrashuv mobaynida saylovchilar Tadbirkorlar va ishbilarmonlar harakati – Oʻzbekiston Liberal-demokratik partiyasi hamda deputatlikka nomzodning saylovoldi dasturi boʻyicha fikr-mulohazalar bildirdilar. Qolaversa, saylovchilar deputatlikka nomzod hamda siyosiy partiya faollariga oʻzlarini qiziqtirgan savollar bilan murojaat qildilar va tegishli javoblar oldilar.