Ўзбек тилига давлат тили мақоми берилганининг 35 йиллигига бағишланган байрам тадбири бўлиб ўтди

1989 йил 21 октябрда ўзбек тилига давлат тили мақомининг берилиши истиқлол сари илк қадам сифатида тарихий аҳамиятга эга сана ҳисобланади. Бу йил ушбу санага 35 йил тўлмоқда. Шу муносабат билан бутун мамлакатимиз бўйлаб катта байрам тантаналари, маънавий-маърифий тадбирлар, тил ва адабиётга бағишланган шеърият ва китобхонлик кечалари бўлиб ўтмоқда.

Амударё тумани Маданият бўлими биносида ҳам сана муносабати билан катта байрам тадбири бўлиб ўтди. Тадбирда туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов сўзга чиқиб, барчани ўзбек тилига давлат тили мақоми берилганининг 35 йиллиги билан самимий табриклади. Нодирбек Камолов ўз нутқида сўнгги йилларда ўзбек тилининг ривожи йўлида амалга оширилаётган кенг кўламли ислоҳотлар хусусида сўз юритиб, тил – миллатнинг кўзгуси эканлигини, уни асраб-авайлаш ҳар бир миллатдошимизнинг бурчи эканини қайд этиб ўтди.

Таъкидланганидек, бугунги кунда мамлакатимизда ўзбек тилининг давлат тили сифатидаги қадр-қиммати ва обрўсини ошириш борасида кенг кўламли ишлар олиб борилмоқда. Ўзбекистон Республикаси Президентининг “Ўзбек тилининг давлат тили сифатидаги нуфузи ва мавқеини тубдан ошириш чора-тадбирлари тўғрисида”ги Фармони бу соҳадаги ишларни янги босқичга олиб чиқди.

Фармонга асосан ишлаб чиқилган “Мамлакатимизда ўзбек тилини янада ривожлантириш ва тил сиёсатини такомиллаштириш концепцияси” ўзбек тилининг халқимиз ижтимоий ҳаётида ва халқаро миқёсдаги обрў-эътиборини тубдан ошириш, униб-ўсиб келаётган ёшларимизни ватанпарварлик, миллий анъана ва қадриятларга садоқат руҳида тарбиялаш, мамлакатимизда давлат тилини тўлақонли жорий этишни таъминлашдек улуғвор мақсадларга хизмат қилмоқда.

Байрам тадбири туман Маданият бўлими томонидан тайёрланган дилрабо куй-қўшиқлар ҳамда бетакрор чиқишлар билан кўтаринки руҳда давом этди. Хонандалар туркий тил асосчиси, сўз мулкининг султони Алишер Навоий, шоҳ ва шоир Заҳириддин Муҳаммад Бобур қаламига мансуб ғазалларни куйга солиб, ижро қилдилар. Гўзал раққосалар ижросидаги дилрабо рақслар тадбир иштирокчиларига юқори кайфият бағишлади.

Қайд этиш жоизки, халқимизнинг кўп асрлик маданий, илмий-маърифий ва бадиий тафаккури, интеллектуал салоҳиятининг ёрқин ва бебаҳо маҳсули бўлган ўзбек тили жаҳондаги бой ва қадимий тиллардан биридир.

Бундан 35 йил олдин – ҳали мамлакатимиз истиқлолга эришмасдан олдин ўзбек тилига давлат тили мақомининг берилиши халқимизнинг асрлар давомидаги орзусининг рўёби, мамлакат суверенитети ва мустақиллиги сари қўйилган дастлабки дадил қадам бўлди. Айнан шу санадан бошлаб ўзбек тили мустаҳкам ҳуқуқий асос ва юксак мақомга эга бўлди.

Истиқлол йилларида она тилимиз том маънода давлат тилига айланиб, халқимизни юртимизда эркин ва озод, фаровон ҳаёт қуришдек буюк марраларга сафарбар этадиган беқиёс куч сифатида майдонга чиқди.

Мамлакатимизда амалга оширилаётган кенг кўламли ислоҳотлар жараёнида давлат тилининг ҳаётимиздаги ўрни ва нуфузи тобора ошиб бормоқда. Ўзбек тили сиёсий-ҳуқуқий, ижтимоий-иқтисодий, маънавий-маърифий жабҳаларда фаол қўлланилиб, халқаро минбарларда баралла янграмоқда. Хорижий мамлакатларда тилимизга эътибор ва уни ўрганишга қизиқиш кучаймоқда.

Ўзбекистондаги миллат ва элатларнинг тилларини сақлаш ва ривожлантиришлари учун шароит яратган ҳолда давлат тили сифатида ўзбек тилини ўрганишлари учун шарт-шароитлар яратиш, ўзбек тилининг давлат тили сифатидаги нуфузи ва мавқеини янада мустаҳкамлаш давлатимиз ва ҳукуматимизнинг доимий диққат марказидаги масалалардан саналади. Она тилимизнинг софлигини сақлаш, унинг бетакрор сўз бойликларидан фойдаланган ҳолда тарғиб қилиш эса ҳар бир миллатдошимизнинг бурчидир.

Чарос Арслонова, туман ҳокимлигининг Ахборот хизмати раҳбари.