Oʻzbek tiliga davlat tili maqomi berilganining 35-yilligiga bagʻishlangan bayram tadbiri boʻlib oʻtdi

1989-yil 21-oktyabrda oʻzbek tiliga davlat tili maqomining berilishi istiqlol sari ilk qadam sifatida tarixiy ahamiyatga ega sana hisoblanadi. Bu yil ushbu sanaga 35-yil toʻlmoqda. Shu munosabat bilan butun mamlakatimiz boʻylab katta bayram tantanalari, maʼnaviy-maʼrifiy tadbirlar, til va adabiyotga bagʻishlangan sheʼriyat va kitobxonlik kechalari boʻlib oʻtmoqda.

Amudaryo tumani Madaniyat boʻlimi binosida ham sana munosabati bilan katta bayram tadbiri boʻlib oʻtdi. Tadbirda tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov soʻzga chiqib, barchani oʻzbek tiliga davlat tili maqomi berilganining 35-yilligi bilan samimiy tabrikladi. Nodirbek Kamolov oʻz nutqida soʻnggi yillarda oʻzbek tilining rivoji yoʻlida amalga oshirilayotgan keng koʻlamli islohotlar xususida soʻz yuritib, til – millatning koʻzgusi ekanligini, uni asrab-avaylash har bir millatdoshimizning burchi ekanini qayd etib oʻtdi.

Taʼkidlanganidek, bugungi kunda mamlakatimizda oʻzbek tilining davlat tili sifatidagi qadr-qimmati va obroʻsini oshirish borasida keng koʻlamli ishlar olib borilmoqda. Oʻzbekiston Respublikasi Prezidentining “Oʻzbek tilining davlat tili sifatidagi nufuzi va mavqeini tubdan oshirish chora-tadbirlari toʻgʻrisida”gi Farmoni bu sohadagi ishlarni yangi bosqichga olib chiqdi.

Farmonga asosan ishlab chiqilgan “Mamlakatimizda oʻzbek tilini yanada rivojlantirish va til siyosatini takomillashtirish kontseptsiyasi” oʻzbek tilining xalqimiz ijtimoiy hayotida va xalqaro miqyosdagi obroʻ-eʼtiborini tubdan oshirish, unib-oʻsib kelayotgan yoshlarimizni vatanparvarlik, milliy anʼana va qadriyatlarga sadoqat ruhida tarbiyalash, mamlakatimizda davlat tilini toʻlaqonli joriy etishni taʼminlashdek ulugʻvor maqsadlarga xizmat qilmoqda.

Bayram tadbiri tuman Madaniyat boʻlimi tomonidan tayyorlangan dilrabo kuy-qoʻshiqlar hamda betakror chiqishlar bilan koʻtarinki ruhda davom etdi. Xonandalar turkiy til asoschisi, soʻz mulkining sultoni Alisher Navoiy, shoh va shoir Zahiriddin Muhammad Bobur qalamiga mansub gʻazallarni kuyga solib, ijro qildilar. Goʻzal raqqosalar ijrosidagi dilrabo raqslar tadbir ishtirokchilariga yuqori kayfiyat bagʻishladi.

Qayd etish joizki, xalqimizning koʻp asrlik madaniy, ilmiy-maʼrifiy va badiiy tafakkuri, intellektual salohiyatining yorqin va bebaho mahsuli boʻlgan oʻzbek tili jahondagi boy va qadimiy tillardan biridir.

Bundan 35-yil oldin – hali mamlakatimiz istiqlolga erishmasdan oldin oʻzbek tiliga davlat tili maqomining berilishi xalqimizning asrlar davomidagi orzusining roʻyobi, mamlakat suvereniteti va mustaqilligi sari qoʻyilgan dastlabki dadil qadam boʻldi. Aynan shu sanadan boshlab oʻzbek tili mustahkam huquqiy asos va yuksak maqomga ega boʻldi.

Istiqlol yillarida ona tilimiz tom maʼnoda davlat tiliga aylanib, xalqimizni yurtimizda erkin va ozod, farovon hayot qurishdek buyuk marralarga safarbar etadigan beqiyos kuch sifatida maydonga chiqdi.

Mamlakatimizda amalga oshirilayotgan keng koʻlamli islohotlar jarayonida davlat tilining hayotimizdagi oʻrni va nufuzi tobora oshib bormoqda. Oʻzbek tili siyosiy-huquqiy, ijtimoiy-iqtisodiy, maʼnaviy-maʼrifiy jabhalarda faol qoʻllanilib, xalqaro minbarlarda baralla yangramoqda. Xorijiy mamlakatlarda tilimizga eʼtibor va uni oʻrganishga qiziqish kuchaymoqda.

Oʻzbekistondagi millat va elatlarning tillarini saqlash va rivojlantirishlari uchun sharoit yaratgan holda davlat tili sifatida oʻzbek tilini oʻrganishlari uchun shart-sharoitlar yaratish, oʻzbek tilining davlat tili sifatidagi nufuzi va mavqeini yanada mustahkamlash davlatimiz va hukumatimizning doimiy diqqat markazidagi masalalardan sanaladi. Ona tilimizning sofligini saqlash, uning betakror soʻz boyliklaridan foydalangan holda targʻib qilish esa har bir millatdoshimizning burchidir.

Charos Arslonova, tuman hokimligining Axborot xizmati rahbari.