“ИНФОЛИБ ЎЗБЕКИСТОН – 2024” XIII МИЛЛИЙ АХБОРОТ-КУТУБХОНА ҲАФТАЛИГИНИНГ ЁПИЛИШ МАРОСИМИ ЎТКАЗИЛДИ

Жорий йилнинг 21-25 октябрь кунлари бутун Ўзбекистон бўйлаб “Инфолиб Ўзбекистон – 2024” XIII Миллий ахборот-кутубхона ҳафталиги ва “Янги Ўзбекистон кутубхоналари – янги куч, янги имкониятлар, янги марралар” шиори остида ёш кутубхоначилар IV форуми бўлиб ўтди.

“Инфолиб Ўзбекистон – 2024” XIII Миллий ахборот-кутубхона ҳафталиги доирасида, белгиланган режа асосида ўтказилган турли хил адабий кечалар, давра суҳбатлари, таниқли шоир ва ёзувчилар билан учрашувлар, ёш китобхонлар ўртасида беллашувлар, савол-жавоб кечалари, янги китоблар тақдимотлари ва китоб тарғиботларида юзлаб китобсеварлар иштирок этишди.

Бу каби маънавий-маърифий тадбирлар Амударё туманида ҳам кўтаринки руҳда ўтказилиб, туман Ахборот-кутубхона маркази ҳафталик давомида барча тоифадаги китобхонлар билан гавжум бўлди.

Ҳафталик доирасида ўтказилган фахрий устозлар, таниқли шоир ва ёзувчилар билан учрашувларда ҳозирги замон ўзбек ва жаҳон адабиётининг дурдона асарлари, мумтоз адабиётимиз намуналаридан иборат китоблар юзасидан китобхонлар ўртасида ўзаро фикр алмашувлар, савол-жавоблар ўтказилиб, бири-биридан қизиқарли ҳикоялар, китобхонларнинг ўзлари ўқиган асарлардан олган таассуротлари тингланди. Айниқса, янги китоблар тарғиботи ва тақдимотига бағишланган тадбирлар янада қизиқарли тасссуротларга бой бўлди.

Ушбу тадбирлар орқали амударёлик китобсеварлар бугунги адабий жараён билан яқиндан танишиш билан бирга, таниқли шоир ва ёзувчиларнинг янги асарлари ҳақидаги маълумотларга эга бўлдилар.

Жорий йилнинг 25 октябрь санасида Амударё туман ахборот-кутубхона марказида мазкур ҳафталикнинг ёпилиш маросими бўлиб ўтди. Унда кўплаб ёшларнинг севимли устози, ардоқли нуроний Пардагул ҳожи она Ўрозбоева ҳамда шоира Зулфия Оллоёрова, шунингдек, амударёлик ёш, ҳаваскор шоиралар, Амударё муҳандислик техникумининг кутубхонашунослик йўналиши талаба-ёшлари иштирок этдилар.

Тадбир аввалида ёш, ҳаваскор шоира қизларнинг янги чоп этилган китоблари тақдимоти ўтказилди. Унда шоира қизлар ўзларининг илк тўпламларига киритилган шеърларнинг мазмун-моҳияти, уларни шеърият майдонига етаклаб олиб кирган омиллар, устозлари ҳақида тўлқинланиб гапириб бердилар.

Шундан сўнг шоира Зулфия Оллоёрова тадбир иштирокчиларига ўзининг ҳаёти ва фаолияти ҳақида сўзлаб берди.

Фахрий устоз Пардагул ҳожи она Ўрозбоева эса ёш авлодни миллий-маънавий қадриятларга садоқат, ватанпарварлик руҳида тарбиялаш борасида узоқ йиллар давомида олиб борган педагогик фаолияти хусусида ёшлар билан мароқли суҳбат қуриб, суҳбат асносида ўзининг қимматли маслаҳатларини берди. Шунингдек, онахон комил инсон бўлиш учун ҳар кимнинг шахсий кутубхонаси бўлиши зарурлиги, китоб инсонни ҳар томонлама етук шахс сифатида шакллантиришга қодир қудратли кучга эгалигини алоҳида таъкидлади.

Ёш китобхонлар Пардагул ҳожи она билан суҳбатдан катта таассуротлар олдилар ва ўзларини қизиқтирган саволларги ҳожи она томонидан берилган жавоблардан миннатдор бўлганликларини изҳор этдилар.

Дарвоқе, китоб ­инсонни комилликка етаклайди, куч ва юксак салоҳият, билим беради. Билим эса қалбга зиё, нур, маънавий қувват демакдир. Айниқса, ёшларнинг бахт-у камоли осойишта ва фаровон ҳаётида китобнинг алоҳида ўрни бор. Чунки яхши китоб – инсонда Ватанга бўлган муҳаббат, миллий ва умуминсоний қадриятларга ҳурмат туйғуларини юксалтириб, яхшилик ҳамда эзгуликка ундайди.

Амударё туман Ахборот-кутубхона маркази ходимлари томонидан “Инфолиб Ўзбекистон – 2024” XIII Миллий ахборот-кутубхона ҳафталиги доирасида ўтказилган маънавий-маърифий тадбирларнинг барчаси китобсеварлар учун чинакам илм-у зиё, нур улашиш тадбирлари сифатида ёқимли таассуротларга бой бўлди.

Роҳатой Романова, туман Ахборот-кутубхана маркази библиография хизмати раҳбари.