Қишлоқ хўжалиги масалаларига бағишланган семинар бўлиб ўтди
Мамлакатимизда барча соҳалар сингари қишлоқ хўжалиги соҳасида амалга оширилаётган туб ислоҳотлар асосида соҳада катта ўзгаришлар, янгиланишлар рўй бермоқда. Муҳтарам Президентимизнинг Қорақалпоғистон Республикасини ижтимоий-иқтисодий ривожлантириш йўлидаги қарор ва фармонлари асосида аграр соҳага бир қанча янги техника ва технологиялар жорий қилиниши натижасида соҳа янги ривожланиш босқичига кўтарилмоқда. 29 октябрь куни Амударё туманида ташкил этилган семинарда қишлоқ хўжалигини янада ривожлантириш бўйича амалга оширилаётган ана шу ислоҳотларнинг мазмун-моҳияти яна бир бора эътироф этилди.
Қишлоқ хўжалигида амалга оширилиши лозим бўлган ишлар, олдинда турган устувор вазифаларни мувофиқлаштириш, ўзаро тажриба алмашиш мақсади кўзланган мазкур семинар Тўлқин овулидаги “Хидирбоев Санъат” фермер хўжалиги экин майдонида ташкил этилди.
Семинарда Қорақалпоғистон Республикаси қишлоқ хўжалиги вазири Дарябай Кайпов, Қорақалпоғистон Республикаси Вазирлар Кенгаши раисининг қишлоқ ва сув масалалари бўйича ўринбосари Шуҳрат Тешаев, Жўқорғи Кенгеснинг қишлоқ хўжалиги масалалари бўйича қўмитаси бошлиғи Анвар Жуманазаров, Амударё тумани ҳокими Собир Хўжаметов ҳамда қишлоқ хўжалиги бўйича республика ва туман миқёсидаги масъуллар, фермерлар ва корхона-ташкилотлар раҳбарлари иштирок этдилар.
Семинар кун тартибидан 2025 йил ҳосили учун қишлоқ хўжалиги маҳсулотлари экиладиган экин майдонларини шудгор қилиш, лазерли текислаш, шўр ювиш, ғалла парвариши, “Яшил макон” умуммиллий лойиҳаси доирасидаги ишларни янада жадаллаштириш каби масалалар ўрин олди.
Семинарда Қорақалпоғистон Республикаси Вазирлар Кенгаши Раисининг қишлоқ ва сув масалалари бўйича ўринбосари Шуҳрат Тешаев сўзга чиқиб, аграр соҳа ривожига бугун энг устувор масалалардан бири сифатида катта эътибор қаратилаётгани, соҳада янги имкониятлар яратилаётгани ҳамда ушбу имконият ва шарт-шароитлардан соҳа вакиллари самарали фойдаланиши лозимлиги хусусида сўз юритди.
Шунингдек, семинарда туман аграр соҳаси масъуллари кун тартибидаги масалалар юзасидан амалга оширилаётган ишлар ҳамда олдиндаги вазифалар хусусида маълумот бердилар.
Маълумотларда келтирилишича, туманда 2025 йилги мавсум олдидан жорий йилнинг кузида 17 минг гектар майдонни шудгорлаш режалаштирилиб, унда жами 71 та сурим техникалари қатнашиши режалаштирилган ҳамда мавжуд техникалар 18 та сурим отрядларига бириктирилган. Кузги шудгорлаш ишларини белгиланган муддатларда якунлаш мақсадида шудгорлаш графиклари ишлаб чиқилмоқда.
Шунингдек, бугунги кунда тумандаги фермер хўжаликлари ва қишлоқ хўжалиги корхоналарида 57та лазерли текислагичлар мавжуд бўлиб, ушбу лазерли текислагичлар ёрдамида 2024 йилда 1073 контурларда 8 минг 70 гектар майдонлар текисланган. Лазерли текисланган майдонларнинг 1 минг 791,4 гектарига буғдой, 5 минг 138,3 гектар қисмига пахта, 1140,3 гектар қисмига эса бошқа қишлоқ хўжалик маҳсулотлари экилиб, мўл ҳосил олинган.
Туманда 2025 йил ҳосили учун асосий 4800 гектар, қўшимча 970 гектар, жами 5770 гектар майдонга ғалла экиш режалаштирилиб, амалда режа тўлиқ бажарилган. Ҳар бир гектар майдонга 5 тоннадан жами 28 минг 850 тонна маҳаллий ўғит жамғариш режалаштирилган бўлиб, бугунги кунгача 832 тонна, яъни салкам 3 фоиз майдонларда маҳаллий ўғит жамғариш ишлари амалга оширилган.
Қолаверса, туманда 2025 йил ҳосили учун 19 минг 201,4 гектар экин майдонларининг шўрини ювиш режалаштирилган бўлиб, шундан 782 гектари кучли шўрланган, 4 минг 840,2 гектари ўртача шўрланган ва 13 минг 579,2 гектари кам шўрланган майдонлардир. Шўр ювиш тадбирларини амалга ошириш учун 18 та суғориш отрядлари ташкил қилиниб, ушбу отрядларга 1 минг 501 нафар малакали ходимлар бириктирилган. Уларнинг 220 нафари сув хўжалиги ташкилотлари, 1 минг 281 нафари эса фермер хўжаликлари ишчиларидир.
Семинар кун тартибидаги масалалар юзасидан масъулларга тегишли тавсиялар ҳамда кўрсатмалар берилди.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
