Qishloq xoʻjaligi masalalariga bagʻishlangan seminar boʻlib oʻtdi

Mamlakatimizda barcha sohalar singari qishloq xoʻjaligi sohasida amalga oshirilayotgan tub islohotlar asosida sohada katta oʻzgarishlar, yangilanishlar roʻy bermoqda. Muhtaram Prezidentimizning Qoraqalpogʻiston Respublikasini ijtimoiy-iqtisodiy rivojlantirish yoʻlidagi qaror va farmonlari asosida agrar sohaga bir qancha yangi texnika va texnologiyalar joriy qilinishi natijasida soha yangi rivojlanish bosqichiga koʻtarilmoqda. 29-oktyabr kuni Amudaryo tumanida tashkil etilgan seminarda qishloq xoʻjaligini yanada rivojlantirish boʻyicha amalga oshirilayotgan ana shu islohotlarning mazmun-mohiyati yana bir bora eʼtirof etildi.

Qishloq xoʻjaligida amalga oshirilishi lozim boʻlgan ishlar, oldinda turgan ustuvor vazifalarni muvofiqlashtirish, oʻzaro tajriba almashish maqsadi koʻzlangan mazkur seminar Toʻlqin ovulidagi “Xidirboyev Sanʼat” fermer xoʻjaligi ekin maydonida tashkil etildi.

Seminarda Qoraqalpogʻiston Respublikasi qishloq xoʻjaligi vaziri Daryabay Kaypov, Qoraqalpogʻiston Respublikasi Vazirlar Kengashi raisining qishloq va suv masalalari boʻyicha oʻrinbosari Shuhrat Teshayev, Joʻqorgʻi Kengesning qishloq xoʻjaligi masalalari boʻyicha qoʻmitasi boshligʻi Anvar Jumanazarov, Amudaryo tumani hokimi Sobir Xoʻjametov hamda qishloq xoʻjaligi boʻyicha respublika va tuman miqyosidagi masʼullar, fermerlar va korxona-tashkilotlar rahbarlari ishtirok etdilar.

Seminar kun tartibidan 2025-yil hosili uchun qishloq xoʻjaligi mahsulotlari ekiladigan ekin maydonlarini shudgor qilish, lazerli tekislash, shoʻr yuvish, gʻalla parvarishi, “Yashil makon” umummilliy loyihasi doirasidagi ishlarni yanada jadallashtirish kabi masalalar oʻrin oldi.

Seminarda Qoraqalpogʻiston Respublikasi Vazirlar Kengashi Raisining qishloq va suv masalalari boʻyicha oʻrinbosari Shuhrat Teshayev soʻzga chiqib, agrar soha rivojiga bugun eng ustuvor masalalardan biri sifatida katta eʼtibor qaratilayotgani, sohada yangi imkoniyatlar yaratilayotgani hamda ushbu imkoniyat va shart-sharoitlardan soha vakillari samarali foydalanishi lozimligi xususida soʻz yuritdi.

Shuningdek, seminarda tuman agrar sohasi masʼullari kun tartibidagi masalalar yuzasidan amalga oshirilayotgan ishlar hamda oldindagi vazifalar xususida maʼlumot berdilar.

Maʼlumotlarda keltirilishicha, tumanda 2025-yilgi mavsum oldidan joriy yilning kuzida 17 ming gektar maydonni shudgorlash rejalashtirilib, unda jami 71 ta surim texnikalari qatnashishi rejalashtirilgan hamda mavjud texnikalar 18 ta surim otryadlariga biriktirilgan. Kuzgi shudgorlash ishlarini belgilangan muddatlarda yakunlash maqsadida shudgorlash grafiklari ishlab chiqilmoqda.

Shuningdek, bugungi kunda tumandagi fermer xoʻjaliklari va qishloq xoʻjaligi korxonalarida 57ta lazerli tekislagichlar mavjud boʻlib, ushbu lazerli tekislagichlar yordamida 2024-yilda 1073 konturlarda 8 ming 70 gektar maydonlar tekislangan. Lazerli tekislangan maydonlarning 1 ming 791,4 gektariga bugʻdoy, 5 ming 138,3 gektar qismiga paxta, 1140,3 gektar qismiga esa boshqa qishloq xoʻjalik mahsulotlari ekilib, moʻl hosil olingan.

Tumanda 2025-yil hosili uchun asosiy 4800 gektar, qoʻshimcha 970 gektar, jami 5770 gektar maydonga gʻalla ekish rejalashtirilib, amalda reja toʻliq bajarilgan. Har bir gektar maydonga 5 tonnadan jami 28 ming 850 tonna mahalliy oʻgʻit jamgʻarish rejalashtirilgan boʻlib, bugungi kungacha 832 tonna, yaʼni salkam 3 foiz maydonlarda mahalliy oʻgʻit jamgʻarish ishlari amalga oshirilgan.

Qolaversa, tumanda 2025-yil hosili uchun 19 ming 201,4 gektar ekin maydonlarining shoʻrini yuvish rejalashtirilgan boʻlib, shundan 782 gektari kuchli shoʻrlangan, 4 ming 840,2 gektari oʻrtacha shoʻrlangan va 13 ming 579,2 gektari kam shoʻrlangan maydonlardir. Shoʻr yuvish tadbirlarini amalga oshirish uchun 18 ta sugʻorish otryadlari tashkil qilinib, ushbu otryadlarga 1 ming 501 nafar malakali xodimlar biriktirilgan. Ularning 220 nafari suv xoʻjaligi tashkilotlari, 1 ming 281 nafari esa fermer xoʻjaliklari ishchilaridir.

Seminar kun tartibidagi masalalar yuzasidan masʼullarga tegishli tavsiyalar hamda koʻrsatmalar berildi.

Charos Arslonova, tuman hokimligining Axborot xizmati rahbari.