Тадбиркорлик объектларига медиа-тур ташкил этилди

Амударё тумани ҳокимлигининг Ахборот хизмати томонидан ҳудуддаги янги тадбиркорлик объектларга медиа-тур ташкил этилди. Медиа-тур мобайнида муҳтарам Президентимиз томонидан яратилаётган имкониятлардан самарали фойдаланиб, ўз фаолиятини янада ривожлантираётган тадбиркорлар фаолияти билан танишилди.

Медиа-тур давомида оммавий ахборот воситалари вакиллари тумандаги кичик саноат зонасида фаолият юритаётган, иш бошлаганига қисқа фурсат бўлишига қарамасдан, ички бозорда ўз харидорларига эга бўлган тадбиркорлик субъектлари – пластмасса маҳсулотлари ишлаб чиқаришга ихтисослашган “Al-kafil biznes plast” МЧЖ, нон ва қандолат маҳсулотлари ишлаб чиқариш билан шуғулланувчи “Равшанбек-Юлдузхон” хусусий корхонаси, сутдан тайёрланадиган маҳсулотлар ишлаб чиқарадиган “Kamron Gold Media” МЧЖга қарашли цехлар фаолияти билан танишдилар.

“Al-kafil biznes plast” МЧЖ директори Аллаберган Ерназаровнинг таъкидлашича, жамият нафақат туман ички бозорини, балки қўшни туманлар ҳамда қўшни вилоятлар бозорларини ҳам ўз маҳсулотлари билан таъминлаб келмоқда. Бугунги кунда жамиятда 15 нафарга яқин банд бўлмаган фуқаролар иш билан таъминланган. Тадбиркор ўз фаолиятини 2019 йилда бошлаган бўлиб, Халқ банки томонидан ажратилган 37 минг АҚШ доллари миқдоридаги имтиёзли кредит ҳисобига Хитой Халқ Республикасидан пластмасса маҳсулотлари ишлаб чиқарувчи дастгоҳлар олиб келган. Айни пайтда жамиятга қарашли цехда аҳоли кундалик эҳтиёжи учун ишлатадиган 10 дан ортиқ турдаги, ҳар хил ҳажмдаги хўжалик пластмасса буюмлари ишлаб ишлаб чиқарилмоқда.

Жамият маҳсулотлари харидорлари сони тобора ортиб, ишлаб чиқариш ҳажми ой сайин ошиб бормоқда. Масъулияти чекланган жамияти ўз ишлаб чиқариш маҳсулотларини Қорақалпоғистоннинг шаҳар ва туманларидан ташқари Хоразм, Навоий, Бухоро, Самарқанд ва Тошкент вилоятларига ҳам етказиб беради. Шунингдек, эндиликда қўшни давлатларга маҳсулотлар экспортини йўлга қўйиш бўйича режалар тузилиб, қатор самарали ишлар қилинмоқда. Корхона ўзининг юқори сифатли пластмасса маҳсулотлари билан Амударё туманининг ишлаб чиқариш салоҳиятини юксалтиришга муносиб ҳисса қўшмоқда.

Медиа-тур иштирокчилари мазкур кичик саноат зонасида жойлашган, изланувчан ва шижоатли тадбиркор Дилдора Хайтбоева раҳбарлик қилаётган сутдан тайёрланадиган маҳсулотлар ишлаб чиқаришга ихтисослашган “Kamron Gold Media” МЧЖ ҳамда “Равшанбек-Юлдузхон” хусусий корхонасига қарашли нон ва қандолат маҳсулотлари ишлаб чиқариш цехида ҳам бўлдилар.

Тадбиркор Дилдора Хайитбоеванинг таъкидлашича, 2008 йилда онаси билан биргаликда кунига 100та нон ва патир ёпишдан бошлаган кичик тадбиркорлик фаолияти бугунги кунга келиб 33 нафар ишсиз юртдошларимизнинг бандлигини таъминлаган ишлаб чиқариш корхонасига айланган. Эътиборлиси, корхонада ишлаётганларнинг аксарияти ижтимоий ҳимояга муҳтож, “Аёллар дафтари”да турган юртдошларимиз бўлиб, бугун доимий иш билан таъминланишлари натижасида оилавий шароитлри тобора яхшиланмоқда.

Тадбиркорнинг фаолияти Ўзбекистон Республикаси Президентининг “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги 213-сонли Фармони асосида 200 минг АҚШ доллари миқдоридаги имтиёзли банк кредити ҳисобига Хитой Халқ Республикасидан замонавий дастгоҳлар, асбоб-ускуналар олиб келиниши натижасида янада ривожланмоқда.

Бугунги кунда “Kamron Gold Media” МЧЖда 10 хилдан ортиқ сут маҳсулотлари ишлаб чиқарилмоқда. Кунига 600 литрдан ортиқ сут қайта ишланади. Ишлаб чиқарилган сут маҳсулотлари тумандаги давлат мактабгача таълим ташкилотларига шартнома асосида етказиб берилади. Корхонанинг 4 та етказиб бериш машиналари мавжуд бўлиб, ишлаб чиқарилган маҳсулотлар шу куннинг ўзида истеъмолчиларга етказилади. Манғит деҳқон бозорида ҳам корхонага қарашли ярмаркалар ташкил этилган бўлиб, маҳсулотлар аҳолига ҳамёнбоп нархларда сотилмоқда.

Тадбиркор Дилдора Хайитбоеванинг келгусидаги режалари катта. Келгусида тумандаги ҳар бир маҳаллада сут ва сут маҳсулотлари, нон маҳсулотлари ҳамёнбоп нархларда сотиладиган шохобчаларни ташкил этиш орқали аҳоли учун янада қулайликлар яратиш режалаштирилмоқда. Шунингдек, Хитой Халқ Республикасидан янги дастгоҳлар олиб келиб, сариёғ ишлаб чиқаришни йўлга қўйиш ҳам тадбиркорнинг олдинда турган энг катта мақсадлардан биридир.

Бугун ҳар бир тадбиркорнинг ташаббуси давлатимиз ва ҳукуматимиз томонидан ҳар томонлама қўллаб-қувватланаётган бир даврда Дилдорa Хайитбоева ҳам яратилаётган имконият ва шарт-шароитлардан самарали фойдаланиб, туманнинг ишлаб чиқариш салоҳиятини янада оширишга муносиб ҳисса қўшмоқда.

Чарос Арслонова, туман ҳокимлигининг Ахборот хизмати раҳбари.