Қисқа муддатли ўқув курслари битирувчиларига сертификатлар топширилди

Мактабгача таълим тизимида сифат ва самарадорликни ошириш учун педагог ходимлар малакасини мунтазам равишда ошириб бориш муҳим аҳамиятга эга. Шу мақсадда Ўзбекистон Республикаси Мактабгача ва мактаб таълими вазирлиги томонидан махсус қисқа муддатли ўқув курслари ташкил этилиб, халқаро тажрибалар асосида педагог ходимларнинг билим ва кўникмаларини ошириш масаласига катта эътибор қаратилмоқда.

Ўзбекистон Республикаси Мактабгача ва мактаб таълими вазирлигининг 2024 йил 7 августдаги 252-сонли буйруғи асосида Жаҳон банки билан ҳамкорликда “Болаларни эрта ёшдан ривожлантиришни такомиллаштириш” лойиҳаси доирасида педагоглар учун тўрт босқичли малака ошириш курслари ташкил қилинган бўлиб, бу курслар мактабгача таълим ташкилотлари ходимларига 36 соатлик ўқув дастури орқали халқаро тажрибалар билан танишиш имконини беради ва уларнинг замонавий усулларда таълим бериш кўникмаларини оширишга кўмаклашади.

Қорақалпоғистон Республикаси Мактабгача ва мактаб таълими вазирлигининг топшириғи асосида жорий йилнинг 28 октябридан 1 ноябрь санасигача Амударё тумани Мактабгача ва мактаб таълими бўлимининг мажлислар залида 36 соатга мўлжалланган халқаро тажрибалар асосидаги қисқа муддатли малака ошириш курслари ташкил қилинди.

Ўқув курсларида тумандаги 52та давлат мактабгача таълим ташкилотларидан директорлар ва методистлар, шунингдек, давлат-хусусий шерикчилик асосида ташкил этилган мактабгача таълим муассасаларидан тарбиячилар иштирок этди.

Қисқа муддатли ўқув курсларида жами 56 нафар иштирокчи замонавий таълим методлари ва болалар билан ишлашда қўлланиладиган ёндашувлар ҳақида билим ва кўникмаларини янада бойитдилар. Курс давомида иштирокчилар амалий машғулотларга ҳам жалб этилади, бу эса билимларни реал шароитларда қўллаш кўникмаларини оширишга хизмат қилади. Ўқув курси якунида туман Мактабгача ва мактаб таълими бўлими бошлиғи Ялғош Шомуродов махсус сертификатларни курс битирувчиларига тантанали равишда топширди.

Шундан кейин ўқув курси иштирокчилари ўзаро тажриба алмашиш ва ўқув курси давомида олган билимларини мустаҳкамлаш мақсадида амалий машғулотларда иштирок этишди.

Таъкидлаш жоизки, мактабгача таълим ташкилотларида боланинг эрта ёшдан ривожланишини такомиллаштиришда педагоглар боланинг жисмоний, ижтимоий-эмоционал, ақлий ва нутқий ривожланишига бирдек эътибор қаратишлари ниҳоятда муҳимдир. Зеро, ҳар бир бола индивидуал хусусиятларга эга бўлади, шунинг учун уларга шахсий ёндашув талаб этилади. Бу ёндашув болаларнинг ўзларини қадрли ҳис этишларига ва уларда ўзларига нисбатан ишонч пайдо бўлишига ёрдам беради.

Боланинг ижтимоий кўникмаларини ривожлантириш унинг кейинги ҳаётидаги муваффақияти учун муҳим аҳамият касб этиши ҳам айни ҳақиқат. Шу сабабли машғулотларда педагоглар болаларни гуруҳда ишлаш, дўстона муносабатлар ўрнатиш ва турли вазиятларда ўз ҳис-туйғуларини тўғри ифода этишга ўргатиш масаласига алоҳида эътибор қаратдилар. Бундан ташқари, болаларнинг ақлий ривожланиши учун қизиқарли ва фойдали ўйинларни ташкил қилишга алоҳида урғу бердилар. Болаларга машғулотлар орқали атроф-муҳитни ўрганиш, муаммоларни ечиш ва саволларга жавоб излашни ўргатиш ҳам ниҳоятда муҳим. Бу жараёнда турли ўйинлар, амалий машғулотлар ҳамда таълимий материаллардан фойдаланиш уларнинг фикрлаш ва муаммо ечиш қобилиятларини ошириши алоҳида қайд этиб ўтилди.

Мазкур ўқув курслари орқали педагоглар янги тажрибаларни ўрганиб, амалий кўникмаларини янада оширдилар ва таълим жараёнида фойдаланиш учун янги ёндашувларни ўзлаштирдилар. Келгусида иштирокчилар ўзлари фаолият юритаётган муассасаларда курс давомида ўрганган билимларини бошқа ҳамкасбларига ҳам ўргатишади. Бу эса ўқув курсларининг самарасини янада кенгроқ миқёсда намоён қилади ва мактабгача таълим тизими сифатининг юксалишига замин яратади.