20-сонли мактабгача таълим ташкилотида амалий кўргазмали семинар ўтказилди

Мамлакатимизда мактабгача таълим тизимини ислоҳ қилиш бўйича амалга оширилаётган ишлар натижасида ҳудудларда қамров даражаси йил сайин ошиб бормоқда. Ўз навбатида тегишли вазирлик ва муассасалар томонидан турли семинарлар, давра суҳбатлари ўтказилиб, соҳа ходимларининг касб маҳоратини оширишга алоҳида эътибор қаратилмоқда. Амударё туманидаги 20-сонли мактабгача таълим ташкилотида ўтказилган амалий кўргазмали семинар ҳам мактабгача таълим ташкилотларидаги тарбиячиларнинг касбий маҳоратини ошириш ва болалар таълимида янги методик ёндашувларни жорий этишга қаратилган муҳим тадбирлардан бири бўлди.

Тадбир Амударё тумани Мактабгача ва мактаб таълими бўлимининг Мактабгача таълим ташкилотлари фаолиятини мувофиқлаштириш шўъбаси иш режасига мувофиқ ташкил этилди.

Семинар аввалида иштирокчилар “Яшил макон” умуммиллий лойиҳаси доирасида мактабгача таълим ташкилоти биноси ҳудудига манзарали ва мевали дарахт кўчатларини ўтқазишди. Туман Мактабгача ва мактаб таълими бўлими бош методист Ҳулкар Бобожонова, методист Сауле Патуллаева, шунингдек 20-сонли мактабгача таълим ташкилоти директори Санобар Ходжаева ва бошқалар атроф-муҳитни кўкаламзорлаштиришга ҳисса қўшиш ҳамда болаларни табиатга дўстона муносабатда бўлишга даъват қилиш мақсадида ўзлари намуна бўлиб, кўчат экишди.

Семинарнинг асосий мақсади мактабгача таълим ташкилотларида болаларни ҳар томонлама ривожлантириш учун қулай шарт-шароитлар яратиш ва уларнинг таълим-тарбия жараёнини янада самарали ташкил қилишда тарбиячиларнинг амалий кўникмаларини ривожлантиришдан иборатдир. Шунингдек, семинарда болаларни ривожлантириш жараёнида давлат талаблари ва Давлат ўқув дастурига асосланган янги методикалардан фойдаланиш бўйича кўникмалар ҳам ўргатилди.

Семинар доирасида 20-сонли давлат мактабгача таълим ташкилотининг тўртта гуруҳида машғулотлар ўтказилди. Иштирокчилар машғулотларни кузатиш орқали ўз билим ва кўникмаларини янада мустаҳкамлаб, жараённи таҳлил қилиш орқали ўзаро фикр алмашиш имкониятига эга бўлдилар.

Шундан кейин семинар иштирокчилари машғулотлар жараёнини кузатиш учун гуруҳларга кирдилар. Тайёрлов гуруҳида тарбиячи томонидан “Ўзбекистоннинг оқ олтини” мавзусида болаларга маълумотлар берилиб, жисмоний машғулотлар ўтказилди. Катталар гуруҳида эса гуруҳ тарбиячиси “Нон – энг азиз неъмат” мавзусида мавсумий ўзгаришлар ва табиий жараёнлар тўғрисида болажонларга тушунчалар берди.

Ўрта гуруҳ тарбиячиси Муяссар Атажанова ҳафта мавзуси бўйича ўтказилган машғулот жараёнида мавсумий ўзгаришлар, кўчманчи қушлар тўғрисида тарбияланувчиларга кўргазмали қуроллар воситасида маълумотлар берди. Кичик гуруҳ тарбиячиси Мунаввар Аҳмедова эса “Мева ва сабзавотлар” мавзуси бўйича машғулот ўтиб, болалар қалбида меҳнатсеварлик, она Ватанимизга ҳурмат туйғуларини янада мустаҳкамлади.

Ўтказилган машғулотларда болаларни ривожлантиришнинг бешта муҳим йўналишига – жисмоний ривожланиш, нутқ ва мулоқот кўникмалари, билиш жараёнининг ривожланиши, ижтимоий-ҳиссий ривожланиш ва ижодий ривожланишга алоҳида эътибор қаратилди. Тарбиячилар ўз фаолиятларида илмий ва ўқув-методик адабиётлар, дастурлар ва дидактик материаллардан самарали фойдаланишди.

Машғулотлар тугагач, семинар иштирокчилари томонидан жараёнлар батафсил таҳлил қилинди. Ҳар бир гуруҳ кесимида кузатувчилар ушбу машғулотни ўтказган тарбиячиларнинг педагогик маҳорати ҳамда лаёқати, ютуқлари, камчиликлари ҳамда болалар билан биргаликдаги фаолияти, таълим-тарбия жараёнида самарали шакл, метод ва воситаларидан унумли фойдалана олиш имкониятлари ҳақида фикр билдирдилар. Иштирокчилар ушбу семинар ўқув-тарбиявий жараёндаги янги методикаларни амалиётда қўллаш имконини яратиб, тарбиячилар учун қимматли тажриба майдони бўлганини алоҳида таъкидлашди.

Чиндан ҳам, Амударё туманида ўтказилган ушбу амалий кўргазмали семинар мактабгача таълим ташкилотлари учун муҳим аҳамиятга эга бўлиб, тарбиячиларнинг касбий маҳоратини ошириш ва келгусида уларга болалар билан ишлашдаги самарали услубларни қўллаш имконини яратади.