20-sonli maktabgacha taʼlim tashkilotida amaliy koʻrgazmali seminar oʻtkazildi

Mamlakatimizda maktabgacha taʼlim tizimini isloh qilish boʻyicha amalga oshirilayotgan ishlar natijasida hududlarda qamrov darajasi yil sayin oshib bormoqda. Oʻz navbatida tegishli vazirlik va muassasalar tomonidan turli seminarlar, davra suhbatlari oʻtkazilib, soha xodimlarining kasb mahoratini oshirishga alohida eʼtibor qaratilmoqda. Amudaryo tumanidagi 20-sonli maktabgacha taʼlim tashkilotida oʻtkazilgan amaliy koʻrgazmali seminar ham maktabgacha taʼlim tashkilotlaridagi tarbiyachilarning kasbiy mahoratini oshirish va bolalar taʼlimida yangi metodik yondashuvlarni joriy etishga qaratilgan muhim tadbirlardan biri boʻldi.

Tadbir Amudaryo tumani Maktabgacha va maktab taʼlimi boʻlimining Maktabgacha taʼlim tashkilotlari faoliyatini muvofiqlashtirish shoʻʼbasi ish rejasiga muvofiq tashkil etildi.

Seminar avvalida ishtirokchilar “Yashil makon” umummilliy loyihasi doirasida maktabgacha taʼlim tashkiloti binosi hududiga manzarali va mevali daraxt koʻchatlarini oʻtqazishdi. Tuman Maktabgacha va maktab taʼlimi boʻlimi bosh metodist Hulkar Bobojonova, metodist Saule Patullayeva, shuningdek 20-sonli maktabgacha taʼlim tashkiloti direktori Sanobar Xodjayeva va boshqalar atrof-muhitni koʻkalamzorlashtirishga hissa qoʻshish hamda bolalarni tabiatga doʻstona munosabatda boʻlishga daʼvat qilish maqsadida oʻzlari namuna boʻlib, koʻchat ekishdi.

Seminarning asosiy maqsadi maktabgacha taʼlim tashkilotlarida bolalarni har tomonlama rivojlantirish uchun qulay shart-sharoitlar yaratish va ularning taʼlim-tarbiya jarayonini yanada samarali tashkil qilishda tarbiyachilarning amaliy koʻnikmalarini rivojlantirishdan iboratdir. Shuningdek, seminarda bolalarni rivojlantirish jarayonida davlat talablari va Davlat oʻquv dasturiga asoslangan yangi metodikalardan foydalanish boʻyicha koʻnikmalar ham oʻrgatildi.

Seminar doirasida 20-sonli davlat maktabgacha taʼlim tashkilotining toʻrtta guruhida mashgʻulotlar oʻtkazildi. Ishtirokchilar mashgʻulotlarni kuzatish orqali oʻz bilim va koʻnikmalarini yanada mustahkamlab, jarayonni tahlil qilish orqali oʻzaro fikr almashish imkoniyatiga ega boʻldilar.

Shundan keyin seminar ishtirokchilari mashgʻulotlar jarayonini kuzatish uchun guruhlarga kirdilar. Tayyorlov guruhida tarbiyachi tomonidan “Oʻzbekistonning oq oltini” mavzusida bolalarga maʼlumotlar berilib, jismoniy mashgʻulotlar oʻtkazildi. Kattalar guruhida esa guruh tarbiyachisi “Non – eng aziz neʼmat” mavzusida mavsumiy oʻzgarishlar va tabiiy jarayonlar toʻgʻrisida bolajonlarga tushunchalar berdi.

Oʻrta guruh tarbiyachisi Muyassar Atajanova hafta mavzusi boʻyicha oʻtkazilgan mashgʻulot jarayonida mavsumiy oʻzgarishlar, koʻchmanchi qushlar toʻgʻrisida tarbiyalanuvchilarga koʻrgazmali qurollar vositasida maʼlumotlar berdi. Kichik guruh tarbiyachisi Munavvar Ahmedova esa “Meva va sabzavotlar” mavzusi boʻyicha mashgʻulot oʻtib, bolalar qalbida mehnatsevarlik, ona Vatanimizga hurmat tuygʻularini yanada mustahkamladi.

Oʻtkazilgan mashgʻulotlarda bolalarni rivojlantirishning beshta muhim yoʻnalishiga – jismoniy rivojlanish, nutq va muloqot koʻnikmalari, bilish jarayonining rivojlanishi, ijtimoiy-hissiy rivojlanish va ijodiy rivojlanishga alohida eʼtibor qaratildi. Tarbiyachilar oʻz faoliyatlarida ilmiy va oʻquv-metodik adabiyotlar, dasturlar va didaktik materiallardan samarali foydalanishdi.

Mashgʻulotlar tugagach, seminar ishtirokchilari tomonidan jarayonlar batafsil tahlil qilindi. Har bir guruh kesimida kuzatuvchilar ushbu mashgʻulotni oʻtkazgan tarbiyachilarning pedagogik mahorati hamda layoqati, yutuqlari, kamchiliklari hamda bolalar bilan birgalikdagi faoliyati, taʼlim-tarbiya jarayonida samarali shakl, metod va vositalaridan unumli foydalana olish imkoniyatlari haqida fikr bildirdilar. Ishtirokchilar ushbu seminar oʻquv-tarbiyaviy jarayondagi yangi metodikalarni amaliyotda qoʻllash imkonini yaratib, tarbiyachilar uchun qimmatli tajriba maydoni boʻlganini alohida taʼkidlashdi.

Chindan ham, Amudaryo tumanida oʻtkazilgan ushbu amaliy koʻrgazmali seminar maktabgacha taʼlim tashkilotlari uchun muhim ahamiyatga ega boʻlib, tarbiyachilarning kasbiy mahoratini oshirish va kelgusida ularga bolalar bilan ishlashdagi samarali uslublarni qoʻllash imkonini yaratadi.