11-сонли мактабда Болалар ҳаракати сардорларининг мактаб аъзолари сайлови ўтказилди

Маълумки, Ўзбекистон Маҳаллалар уюшмаси, Ўзбекистон Республикаси Мактабгача ва мактаб таълими вазирлиги, Ёшлар ишлари агентлиги, Республика Маънавият ва маърифат маркази ҳамда Ўзбекистон Болалар ташкилоти бошқарув кенгашининг жорий йил октябрь ойидаги қўшма қарори билан таълим муассасаларида сардорлар сайловини ташкил этиш ва болалар ҳаракати фаолиятини йўлга қўйиш тартиби тасдиқланган эди. Ҳаракатнинг мақсади – Ўзбекистон болалар ташкилоти нуфузини ошириш, болаларда ватанпарварлик, лидерлик, ташаббускорлик маҳоратини ривожлантириш, нотиқлик маҳоратини такомиллаштириш, ўз устида ишлаши, замонавий ахборот технологияларидан фойдалана олиши, лойиҳа ташаббусларини кенг оммага, айниқса болалар орасида тарғиб этишига кўмаклашишдан иборат.

Мазкур қўшма қарорда ҳар ўқув йилининг бошида болалар ҳаракати сардорлари сайлови ўтказилиши белгиланган. Сардорлар сайлови синф, мактаб, туман ва республика миқёсида ўтказилиб, ҳар бир босқичда сардорликка номзодлар ўз лойиҳаларини ҳимоя қиладилар.

Қўшма қарор билан тасдиқланган Низом асосида Амударё туманидаги 11-сонли умумтаълим мактабида Болалар ҳаракати сардорларининг мактаб аъзолари сайлови ўтказилди. Тадбирда мактаб директори Улуғбек Мамутов, Миллий гвардия ходими Ғафур Шукуруллаев, Қипчоқ шаҳарча фуқаролар йиғини ёшлар етакчиси Дониёр Ваисовлар қатнашди. Тадбирни мактаб директорининг маънавий-маърифий ишлар бўйича ўринбосари Қундузой Холмуратова олиб борди.

Сайловда Болалар ҳаракати сардорларининг мактаб аъзолигига номзодлар дастурлари тингланиб, жами 18 нафар аъзо ва 1 нафар бош сардор сайланди ҳамда уларга ишонч ёрлиқлари топширилди. Аъзолар жами 6 та – спорт ва саломатлик, “Яшил макон”, медиа ва ахборот технологиялари, санъат, таълим ҳамда “Имкон” йўналишларининг ҳар бирига 3 нафардан масъул қилиб бириктирилди. Тадбирда мактабнинг 5-“в” синф қизлари ижросида рақс намойиш этилди.

Айтиш жоизки, Болалар ҳаракати сардори мактабдаги болалар ташкилотининг етакчиси ҳисобланади ва у мактабдаги болалар тадбирлари, лойиҳалар ва учрашувларни ташкил этиш, синф ва мактаб ўқувчилари ўртасида ҳамжиҳатликни таъминлаш ҳамда ижтимоий фаолликни ривожлантириш, болалар ташаббусларини рағбатлантириш ва уларнинг таклифларини қўллаб-қувватлаш, шунингдек, жамоатчилик билан ҳамкорлик қилиш вазифаларини бажаради. Сардор мактаб маъмурияти ва ўқувчилар ўртасидаги кўприк вазифасини бажариб, болаларнинг фикрлари ва таклифларини ўқитувчиларга етказади.

Қайд этиш керакки, ўқувчиларни жамиятнинг фаол аъзоси сифатида вояга етказишда мактаблардаги болалар ҳаракатининг аҳамияти жуда катта. Болалар ҳаракати ёшларда жамоатчилик ҳаётида фаол иштирок этиш кўникмаларини шакллантириб, уларни мустақил фикрлашга, болалардаги етакчилик қобилиятларини ривожлантиришга ёрдам беради.

Эндиликда Болалар ҳаракати сардорларининг туман аъзоларини, кейинчалик эса Қорақалпоғистон Республикаси, вилоятлар ва Тошкент шаҳар Болалар ҳаракати сардорларини сайлаш, якунда эса Болалар ҳаракати сардорларининг Республика аъзоларини сайлаш кўзда тутилган.

Болалар ҳаракати – бу мактабларда ўқувчилар ўртасида ҳамкорлик ва бирдамлик муҳитини шакллантиришга хизмат қиладиган ижтимоий тузилмадир. Ҳаракат ўқувчиларнинг жамоат ишларида фаол иштирок этиши, масъулият ва етакчиликни ўз зиммаларига олиши, ўзаро ҳамкорликда ишлаши каби қобилиятларини ривожлантиришга кўмаклашиш мақсадида ташкил этилган. Шу билан бирга, Болалар ҳаракати ўқувчиларнинг ижодий қобилиятларини ривожлантиришга, турли тадбирларда фаол қатнашиш орқали ўзини намоён қилишига кўмаклашиши сабабли болалар ҳаётида муҳим аҳамият касб этади.