1-сонли мактабда “Байроғим – ифтихорим, ғурурим!” номли маънавий-маърифий тадбир ўтказилди

Давлат рамзлари ҳар бир миллатнинг ўзига хослигини, халқнинг тарихий хотираси ва орзу-умидларини ифодалайдиган муҳим белгилардир. Байроқ, герб ва мадҳия каби рамзлар миллатнинг эрки ва мустақиллигининг тимсоли бўлиб, ҳар бир фуқарода ғурур ва ифтихор туйғуларини уйғотади. Айниқса, ёш авлодга давлат рамзларининг аҳамиятини англатиш жуда муҳим. Бу орқали уларнинг она ватанга бўлган меҳри ва садоқати янада ортади, ватанпарварлик туйғулари юксалади.

Бундан 33 йил олдин – 1991 йил 18 ноябрь куни Ўзбекистон Республикасининг давлат байроғи қабул қилинган эди. Ушбу сана муносабати билан Амударё туманидаги 1-сонли умумтаълим мактабида “Байроғим – ифтихорим, ғурурим!” номли маънавий-маърифий тадбир ўтказилди. Тадбирни мактаб директори Дилрабо Шербоева очиб берди ва иштирокчиларни давлат байроғи қабул қилинган сана билан табриклади. Тадбирда мактабнинг бошланғич синф ўқувчилари иштирок этиб, байроғимиз ва бошқа давт рамзлари ҳақида шеърлар айтиб, маълумотлар бердилар.

Ўқувчилар байроқдаги ранглар ва тасвирлар мамлакатнинг бой тарихи, ҳозирги ҳаёти ва келажагини ўзида мужассам этганини, жумладан мовий ранг тириклик мазмуни акс этган мангу осмон ва обиҳаёт рамзи ҳисобланса, оқ ранг муқаддас тинчлик, поклик ва беғуборлик тимсоли экани, яшил ранг табиатнинг навқиронлигини ва тириклик рамзини билдирса, қизил чизиқлар вужудимизда жўшиб оқаётган ҳаётий қудрат ирмоқларини англатишини шеърий усулда ифода қилдилар. Навқирон ярим ой тасвири тарихий анъаналаримиз билан боғлиқ бўлиб, айни пайтда у қўлга киритилган мустақиллигимиз рамзи экани, 12та юлдуз тасвири эса тарихий анъаналаримиз, қадимги йилномамизга бевосита алоқадор экани ҳақида тадбир иштирокчиларига батафсил маълумотлар берилди. Мактабнинг бошланғич синф ўқувчилари томонидан ижро этилган шеърлар ва қўшиқлар ўқувчиларнинг давлат рамзларига нисбатан ҳурматини янада оширишга хизмат қилди.

Дарҳақиқат, ёш авлодни ватанпарварлик руҳида тарбиялашда давлат рамзлари муҳим аҳамият касб этади. Давлат рамзларини ҳурмат қилиш – бу она юртга бўлган муҳаббатнинг энг ёрқин кўринишидир.

Байроқ қадимдан ҳар бир давлат, халқ ва қавмнинг ғурурини белгилайдиган рамз бўлиб келган. Урушлар ва жангларда байроқ нафақат бирлаштирувчи тимсол, балки жанговар аҳамиятга эга муҳим белгилардан бири бўлган. Жанг майдонидаги оғир вазиятларда қўшиннинг ҳар бир аскари байроқни ҳимоя қилган, байроқ бор жойда қўшин жонкуярлик билан курашган, чунки уни йўқотиш мағлубият деб ҳисобланган.  Душман байроғини йўқ қилиш ёки қўлга олиш унинг устидан ғалаба қозонишнинг рамзий маъносини билдирган. Демак, қадим замонлардан ҳам байроқ жангчиларга руҳий куч бағишлаб, уларни Ватан ва қўшин шарафи йўлида жанговар ҳаракатларга ундаган.

Нафақат ўтмишда, балки бугун ва барча замонларда ҳам байроқ, герб ва мадҳия каби давлат рамзлари ёшларда ватанпарварлик ҳиссини тарбиялайди, уларни ўз юртини севиш ва ҳимоя қилишга чорлайди.

Ёш авлод камолотида бу каби маънавий-маърифий тадбирларнинг ўрни беқиёсдир. Бундай тадбирлар орқали ўқувчиларда Ватанга бўлган меҳр-муҳаббат, миллий ғурур ва фахр туйғулари шаклланади. Ўз тарихини, маданияти ва қадриятларини билган ёшлар Ватанга садоқатли, унинг ривожи йўлида камарбаста шахслар сифатида камолга етади. Шу сабабли ҳам Амударё туманидаги 1-сонли умумтаълим мактабида турли саналар муносабати билан маънавий-маърифий тадбирлар ўтказиш яхши анъанага айланган. Ушбу тадбирлардан кўзланган мақсад ўқувчи ёшларни миллий байрамларимиз, тарихий шахсларнинг ҳаёти ва ижоди ҳақида маълумотлар олиб, улардан илҳомланган ҳолда баркамол шахслар бўлиб етишишга ундашдир.