“Бу ер ҳали зўр бўлади…” ёхуд Бештомдаги кўчат экиш тадбирлари қандай ўтди?

Халқимизда “яхшидан боғ қолар” деган гўзал мақол бор. Дарҳақиқат, мусаффо ҳаводан нафас олиб яшаш ҳам бир неъмат, ҳавонинг тозалигига, мусаффолигига табиатни севувчи инсон сифатида ҳисса қўшиш эса ҳам фойдали, ҳам савобли иш.

Маълумки, давлатимиз раҳбари ташаббуси билан юртимизда 2021 йилдан буён “Яшил макон” умуммиллий лойиҳаси амалга оширилмоқда. Шу кунларда юртимиздаги барча вазирлик, ташкилот, муассаса ва корхоналарда, жумладан, овул ва маҳалла фуқаролар йиғинлари томонидан ҳам “Яшил макон” умуммиллий лойиҳаси доирасида ҳудудларда кўчат экиш, кўкаламзорлаштириш ва ободонлаштириш ишлари амалга оширилмоқда.

Ана шундай хайрли тадбирларнинг бири яқиндагина Амударё туманидаги Бештом маҳалласи ҳудудида бўлиб ўтди. Унда туман ҳокими Собир Хўжаметов, секторлар раҳбарлари, ҳоким ўринбосарлари, “Маҳалла еттилиги” вакиллари, корхона ташкилотлар, бўлимлар, фуқаролар йиғинлари масъуллари фаол иштирок этдилар.

Ўзбек хонадонларининг қайси бирига ташриф буюрманг ундаги файз-у, баракани ҳис этасиз. Оиладаги тинчлик, ўзаро ҳурмат, меҳр-оқибат деган тушунчаларга ҳамоҳанг тарзда дарахт экиб, мевасини дастурхонга тортиш, сархил мевалардан қўни-қўшниларга “ўзимизнинг боғдан!” дея меҳр ила илиниш халқимизга хос бўлган эзгу анъана. Ҳа, боғ яратишга, кўчат экишга улуғвор вазифа сифатида қараб, не ҳасратда камолга келтирган дарахтининг қўшнининг девори тарафига эгилган шоҳасидаги меваларни қўшнисига атайдиган олийжаноб халқимиз билан ҳар қанча фахрлансак арзийди.

Тадбир давомида Бештом маҳалласи ҳудудида боғ яратиш учун ажратилган 10 гектар ер майдонида турли хил мевали дарахтлар кўчатлари экилди ҳамда экилган кўчатларни парваришлаш ва агротехник тадбирларни ўз вақтида олиб бориш учун фарғоналик боғбонлар жалб қилинди.

Эзгу мақсад кишиларни бирлаштирса, ўша мақсад албатта амалга ошиши шубҳасиз. Президентимиз ташаббуси билан амалга оширилаётган “Яшил макон” умуммиллий лойиҳаси ҳам ана шундай эзгу мақсадни кўзлаб, боғ яратиш, экология ва атроф-муҳитни асраб-авайлаш каби айни дамда долзарб бўлган экологик муаммоларга барҳам бериш мақсадида амалга оширилмоқда.

“Яхши дам – меҳнатга ҳамдам” дейди халқимиз. Тадбир давомида ҳофизлар томонидан ижро этилган дилрабо куй-қўшиқлар билан кўчат экиш жараёни юқори кайфиятда давом этди. Кўчат экиш ишларига ўз ҳиссасини қўшган инсонлар учун дала бошида ош дамланиб, тадбир байрамона тус олди. Йиғилганлар тадбир сўнгида умид билан ерга қадалаётган бу ниҳоллар кун келиб, улкан боққа айланишини, халқимиз тинчлиги ҳамда юртимиз осойишталигини тилаб дуога қўл очдилар.

Ҳа, атоқли шоиримиз Ибрайим Юсуповнинг “Сабр қилинг яна бир оз, бу ер ҳали зўр бўлади” деган сатрлари бугун ўз тасдиғини топаётгандай. Кун келиб Бештомдаги боғнинг соясида салқинлаб, меваларидан тотгувчилар кўчат ўтқазган азиз қўлларни алқаб, раҳмат айтсалар, ажаб эмас.

Азиза МАДРАҲИМОВА