“Bu yer hali zoʻr boʻladi…” yoxud Beshtomdagi koʻchat ekish tadbirlari qanday oʻtdi?

Xalqimizda “yaxshidan bogʻ qolar” degan goʻzal maqol bor. Darhaqiqat, musaffo havodan nafas olib yashash ham bir neʼmat, havoning tozaligiga, musaffoligiga tabiatni sevuvchi inson sifatida hissa qoʻshish esa ham foydali, ham savobli ish.

Maʼlumki, davlatimiz rahbari tashabbusi bilan yurtimizda 2021-yildan buyon “Yashil makon” umummilliy loyihasi amalga oshirilmoqda. Shu kunlarda yurtimizdagi barcha vazirlik, tashkilot, muassasa va korxonalarda, jumladan, ovul va mahalla fuqarolar yigʻinlari tomonidan ham “Yashil makon” umummilliy loyihasi doirasida hududlarda koʻchat ekish, koʻkalamzorlashtirish va obodonlashtirish ishlari amalga oshirilmoqda.

Ana shunday xayrli tadbirlarning biri yaqindagina Amudaryo tumanidagi Beshtom mahallasi hududida boʻlib oʻtdi. Unda tuman hokimi Sobir Xoʻjametov, sektorlar rahbarlari, hokim oʻrinbosarlari, “Mahalla yettiligi” vakillari, korxona tashkilotlar, boʻlimlar, fuqarolar yigʻinlari masʼullari faol ishtirok etdilar.

Oʻzbek xonadonlarining qaysi biriga tashrif buyurmang undagi fayz-u, barakani his etasiz. Oiladagi tinchlik, oʻzaro hurmat, mehr-oqibat degan tushunchalarga hamohang tarzda daraxt ekib, mevasini dasturxonga tortish, sarxil mevalardan qoʻni-qoʻshnilarga “oʻzimizning bogʻdan!” deya mehr ila ilinish xalqimizga xos boʻlgan ezgu anʼana. Ha, bogʻ yaratishga, koʻchat ekishga ulugʻvor vazifa sifatida qarab, ne hasratda kamolga keltirgan daraxtining qoʻshnining devori tarafiga egilgan shohasidagi mevalarni qoʻshnisiga ataydigan oliyjanob xalqimiz bilan har qancha faxrlansak arziydi.

Tadbir davomida Beshtom mahallasi hududida bogʻ yaratish uchun ajratilgan 10 gektar yer maydonida turli xil mevali daraxtlar koʻchatlari ekildi hamda ekilgan koʻchatlarni parvarishlash va agrotexnik tadbirlarni oʻz vaqtida olib borish uchun fargʻonalik bogʻbonlar jalb qilindi.

Ezgu maqsad kishilarni birlashtirsa, oʻsha maqsad albatta amalga oshishi shubhasiz. Prezidentimiz tashabbusi bilan amalga oshirilayotgan “Yashil makon” umummilliy loyihasi ham ana shunday ezgu maqsadni koʻzlab, bogʻ yaratish, ekologiya va atrof-muhitni asrab-avaylash kabi ayni damda dolzarb boʻlgan ekologik muammolarga barham berish maqsadida amalga oshirilmoqda.

“Yaxshi dam – mehnatga hamdam” deydi xalqimiz. Tadbir davomida hofizlar tomonidan ijro etilgan dilrabo kuy-qoʻshiqlar bilan koʻchat ekish jarayoni yuqori kayfiyatda davom etdi. Koʻchat ekish ishlariga oʻz hissasini qoʻshgan insonlar uchun dala boshida osh damlanib, tadbir bayramona tus oldi. Yigʻilganlar tadbir soʻngida umid bilan yerga qadalayotgan bu nihollar kun kelib, ulkan boqqa aylanishini, xalqimiz tinchligi hamda yurtimiz osoyishtaligini tilab duoga qoʻl ochdilar.

Ha, atoqli shoirimiz Ibrayim Yusupovning “Sabr qiling yana bir oz, bu yer hali zoʻr boʻladi” degan satrlari bugun oʻz tasdigʻini topayotganday. Kun kelib Beshtomdagi bogʻning soyasida salqinlab, mevalaridan totguvchilar koʻchat oʻtqazgan aziz qoʻllarni alqab, rahmat aytsalar, ajab emas.

Aziza MADRAHIMOVA