21-СОНЛИ ДАВЛАТ МТТДА “ТРАНСПОРТ, ЙЎЛ ҲАРАКАТИ ҚОИДАЛАРИ” МАВЗУСИДА СЕМИНАР ТАШКИЛ ЭТИЛДИ

Мамлакатимизда мактабгача таълим ташкилотлари фаолиятини замон талаблари даражасида ривожлантириш, тарбиячи-педагогларнинг малакаларини ошириш, ўсиб келаётган ёш авлодни ҳар томонлама етук ва баркамол инсонлар қилиб тарбиялашга қаратилаётган эътибор ва рағбат туфайли соҳага янги инновацион педтехнологиялар изчиллик билан жорий этилмоқда. Хусусан, ўзаро тажриба алмашувлар, илғор тарбиячи-педагогларнинг иш услубларини оммалаштиришга қаратилган ўқув-семинар машғулотлари ўзининг ижобий самарасини бермоқда.

Бу борада Амударё туман Мактабгача ва мактаб таълими бўлими тасарруфидаги намунали иш фаолиятига эга мактабгача таълим ташкилотларида ўтказилаётган ўқув-семинарлари соҳа ходимларида қизиқиш уйғотмоқда. Тумандаги МТТларда ҳар ой алоҳида муҳим бир мавзу билан номланиб, мазкур ой мавзуси бўйича МТТ тарбияланувчилари иштирокида семинар машғулотларини ўтказиш анъанага айланган.

Жорий йилнинг ноябрь ойи мавзуси “Транспорт, йўл ҳаракати қоидалари” сифатида белгиланиб, 28 ноябрь куни 21-сонли давлат мактабгача таълим ташкилотида шу мавзуда семинар ташкил этилди.

Семинарда туман Мактабгача ва мактаб таълими бўлими услубчилари Сауле Патуллаева, Шаҳноза Қиличева, давлат мактабгача таълим ташкилотлари, давлат-хусусий шериклик асосидаги мактабгача таълим ташкилотлари раҳбарлари, тарбиячи-педагоглар ҳамда 21-сонли давлат МТТнинг 4та гуруҳи тарбияланувчилари иштирок этдилар.

Мазкур мактабгача таълим ташкилоти 120 ўринли бўлиб, айни пайтда 119 нафар кичкинтойлар тарбияланмоқда. Муассасада 34 нафар малакали ходимлар фаолият олиб боришади. Кичик, ўрта, катта ва тайёрлов гуруҳларидан иборат 4та гуруҳда тарбияланувчилар учун ҳар ой мавзусидан келиб чиқиб ўтказиладиган маънавий-маърифий тадбирлар болажонларнинг қизиқиш ва иқтидорларини ривожлантиришга қаратилгани билан ота-оналарга ҳам манзур бўлмоқда. Муассасада ноябрь ойи мавзуси – “Йўл ҳаракати қоидалари” бўйича ўтказилган семинар ҳам қизиқарли таассуротларга бой бўлди.

Семинар машғулотини тайёрлов гуруҳи тарбиячиси Турсуной Адамбоева бошлаб берди. Тайёрлов гуруҳи тарбияланувчилари ноябрь ойининг сўнгги ҳафтаси учун белгиланган “Эҳтиёткор пиёда” мавзусида кўргазмали чиқиш намойиш этдилар. Унга кўра, болажонлар кўчаларда ҳаракатланиш, маданияти, йўлнинг чорраҳа қисмида ва пиёдаларнинг ўтиш қисмида қандай йўл белгиларига эътибор бериш, светофор чироқларининг ранглари нималарни англатиши ҳақидаги билим ва кўникмаларини намойиш этдилар.

Семинар давомида катта гуруҳ тарбиячиси Феруза Искандарова ва ёрдамчи тарбиячи Мавлуда Хидировалар “Кўча ҳаракати қоидалари”, ўрта гуруҳ тарбиячиси Шаҳноза Файзуллаева, ёрдамчи тарбиячи Гулрух Раимбоевалар “Шошилинч ҳаракат хизматлари”, кичик гуруҳ тарбиячиси Шаҳноза Қўшманова ҳамда ёрдамчи тарбиячи Гулжон Ержановалар эса “Транспортлар билан танишув” мавзуларида ўз гуруҳларидаги тарбияланувчилар иштирокида қизиқарли машғулотлар ўтказдилар.

Машғулотларни эътибор ва қизиқиш билан кузатган семинар иштирокчилари 21-сонли давлат мактабгача таълим ташкилоти педагог ходимлари томонидан таълим-тарбия ишлари самарали йўлга қўйилганини алоҳида эътироф этишиб, педагог тарбиячиларнинг маҳоратига юқори баҳо бердилар.

Робия Йўлдошева.