36-сонли МТТда “Транспорт, йўл ҳаракати қоидалари” мавзусида семинар ўтказилди

Боланинг чаққон ва зеҳни ўткир бўлиб улғайишида таълим-тарбияга энг дастлабки қадам бўлмиш боғчада олинган билимлар муҳим ўрин тутади. Мактабгача таълим ташкилотларида тарбиячилар томонидан олиб бориладиган турли хил дарс машғулотлари жажжи болажонларнинг келажакдаги билим савиясига, тасаввур оламининг кенгайишига мустаҳкам пойдевор ясайди.

Яқинда Амударё тумани Мактабгача ва мактаб таълими бўлимининг Мактабгача таълим ташкилотлари фаолиятини мувофиқлаштириш шўъбаси иш режасига асосан 36-сонли мактабгача таълим ташкилотида “Транспорт, йўл ҳаракати қоидалари” мавзусида амалий кўргазмали семинар ўтказилди. Семинарда шўъба бош методисти Ҳулкар Бабажонова, методист Сауле Патуллаева, тумандаги 2-, 10-, 16-, 20-, 30-, 32-, 44-, 49-, 23-, 31-, 24- ва 9-сонли мактабгача таълим ташкилотларининг директорлари, методистлари ва тарбиячилари иштирок этдилар.

Семинарни Қорақалпоғистон Республикаси Мактабгача ва мактаб таълими вазирлигининг Мактабгача талим ташкилотлари фаолиятини мувофиқлаштириш шўбаси методисти Жупар Оймуратова очиб берди. У ўз нутқида ушбу семинарни ўтказишдан мақсад, мактабгача таълим ташкилотларида боланинг индивидуал эҳтиёжларини ҳисобга олган ҳолда илк ва мактабгача ёшдаги болаларнинг ақлий ривожланишини рағбатлантириш, уларнинг давлат талаблари асосида ҳамда давлат ўқув дастурига мувофиқ ҳар томонлама баркамол ривожланиши учун қулай шарт-шароитлар яратиш масалаларига тўхталиб ўтди. Шундан сўнг, шўъба методисти Ҳулкар Бабажонова сўзга чиқиб, мазкур семинар мактабгача ёшдаги болаларнинг ўқув-тарбиявий фаолиятини ташкил қилиш ва амалга оширишда тарбиячиларнинг амалий кўникмаларини ривожлантириш учун ташкил этилганлигини айтиб ўтди.

Бўлим методисти Сауле Патуллаева эса мамлакатда ўтказилаётган ижтимоий-иқтисодий ислоҳотларни, хорижий мамлакатлар илғор тажрибаси ҳамда илм-фан ютуқлари ва замонавий ахборот-коммуникация технологиялари имкониятларини инобатга олган ҳолда мактабгача таълим тизимида маънавий баркамол ва интеллектуал жиҳатдан ривожланган шахсни тарбиялаш давлат талабларининг мақсади эканлигини алоҳида урғулади.

Шундан сўнг, семинар ўз ишини бошлади. Қизғин баҳс ва мунозараларга бой ўтган семинарда иштирокчилар ўзларининг тажрибасини ҳамда амалий кўникмаларини оширишди.

Дарҳақиқат, бундай семинарлар барча давлат МТТларда йил давомида режа асосида ташкил қилинади, уларда семинар қатнашувчилари ўзаро тажриба алмашиб, ўзларининг касбий маҳоратини ошириб борадилар.

Ушбу семинарда ҳам иштирокчилар 4 та гуруҳга бўлиниб, машғулот олиб бордилар. Хусусан, 36-сонли давлат МТТнинг мактабга тайёрлов гуруҳи тарбиячиси, методист Шаҳло Ялғашева мавзу бўйича машғулот ўтди.

Тарбиячи машғулот давомида мавсумий ўзгаришларни йиғилганларга кўргазмали қуроллар воситасида тушунтирди. Шу билан бирга, 36-сонли мактабгача таълим ташкилотининг катта гуруҳи тарбиячиси Нилуфар Камолова, ўрта гуруҳи тарбиячиси Райҳон Камолова, кичик гуруҳ тарбиячиси Мавлуда Шомуратовалар ҳам “Транспорт турлари” мавзуси бўйича машғулотлар ўтди. Машғулотлар давомида болажонлар ривожлантириш марказларига бўлиниб, амалий машғулотлар бажардилар. Айниқса, қурилиш ва конструкциялаш марказида қурилиш материаллари, кубиклар, леголар тўпламларидан фойдаланиб ясаган машиналар болаларга ўзгача завқ бағишлади.

Машғулотлар тарбияланувчиларда жисмоний ривожланиш ва соғлом турмуш тарзини шакллантириш, нутқ ва мулоқот, ўқиш ва ёзиш кўникмалари, билиш жараёнининг ривожланиши, ижтимоий-ҳиссий ривожланиш ҳамда ижодий ривожланишни амалга оширишга қаратилиб, болалар ривожланишининг муайян шароитлари, эҳтиёжлари ва хусусиятлари ҳисобга олинган ҳолда ташкил этилди.

Машғулот жараёнлари тугагандан сўнг семинар иштирокчилари билан машғулотлар таҳлил қилинди. Ҳар бир гуруҳ кесимида кузатувчилар ушбу машғулотни ўтказган тарбиячиларнинг педагогик маҳорати ҳамда лаёқати, ютуқлари, камчиликлари ҳамда болалар билан биргаликдаги фаолияти, таълим-тарбия жараёнида самарали шакл, метод ва воситаларидан унумли фойдалана олиш имкониятлари ҳақида айтиб ўтилди. Семинар кун тартибидаги масала юзасидан савол-жавоблар ўтказилиб, қатнашувчилар томонидан фикр ва мулоҳазалар билдирилди. Машғулотларнинг қизиқарли ва мазмунли ташкил этганлиги учун алоҳида миннатдорчилик билдирилди.

“У ким? Бу нима?” дея саволларга кўмиб ташлайдиган болажонларимизнинг барча саволларига эринмай жавоб бериш, уларни ҳафсала билан тинглаш, уларнинг ақлий ривожланиши учун вақт ажратиш ҳамма ота-онанинг ҳам қўлидан келавермайди. Баъзан эса вақт камлик қилади. Шу жиҳатдан олиб қарасак, бу борада МТТлари фаолиятининг аҳамияти катта, қилаётган ишлари таҳсинга лойиқ. Биз эса, уларнинг хайрли ва ўз навбатида масъулиятли бўлган ишларига омад ёр бўлишини тилаймиз.

Азиза Мадраҳимова