1 ДЕКАБРЬ – БУТУНЖАҲОН ОИТСГА ҚАРШИ КУРАШ КУНИ МУНОСАБАТИ БИЛАН ДХХ ЧЕГАРА ҚЎШИНЛАРИГА ҚАРАШЛИ 92-02 ҲАРБИЙ ҚИСМ ХИЗМАТЧИЛАРИ ИШТИРОКИДА ТАДБИР БЎЛИБ ЎТДИ

Жаҳон Соғликни сақлаш ташкилоти ҳамда Бирлашган миллатлар ташкилоти Бош Ассамблеясининг 1988 йилги Қарори билан 1 декабрь – Бутунжаҳон ОИТСга қарши кураш куни сифатида белгиланган.

Жаҳон Соғликни сақлаш ташкилотининг 2024 йилги маълумотларига кўра, дунёда ОИВ инфекциясини юқтирган 40 миллиондан ортиқ бемор бор. Уларнинг сони йилига 1, 5 миллион кишига ортиб бормоқда. Энг ёмони, мазкур касаллик ҳар йили 600 минг кишини ҳаётдан олиб кетмоқда.

Айтиш жоизки, мамлакатимизда ОИТСга қарши кураш тизими бўйича кейинги йилларда барча йўналишларда сезиларли ютуқларга эришилди. Хусусан, жорий йилнинг III чораги якунига кўра, мамлакатимизда ОИВ инфекциясига чалинган беморларнинг 84 фоизи даволашнинг бутун дунёда тан олинган усули – антиретровирус муолажалари билан қамраб олинган. Улар учун зарур препарат харажатларининг қарийб 80 фоизи давлат бюджети маблағлари, қолган 20 фоизи халқаро жамғармалар ҳисобидан қопланмоқда.

Бу ҳақда Амударё туман Тиббиёт бирлашмаси шифокорлари томонидан 1 декабрь – Бутунжаҳон ОИТСга қарши кураш куни муносабати билан Давлат хавфсизлик хизмати Чегара қўшинларига қарашли 92-02 ҳарбий қисм зобит ва аскарлари иштирокида ўтказилган учрашувда батафсил сўз юритилди.

Тадбирда 92-02 ҳарбий қисм зобит ва аскарлари учун Амударё туман Тиббиёт бирлашмаси шифокорлари Тамара Саидова, Дилбар Аллабергенова ҳамда Раъно Саидовалар ОИТС касаллигининг олдини олиш, касалликнинг дастлабки белгилари, соғлом турмуш тарзига амал қилишнинг аҳамияти, шунингдек, жисмоний фаоллик ва кундалик ҳаётда амал қилиниши зарур бўлган санитария-гигиена қоидалари мавзуларида батафсил ва кенг тушунчалар, зарур тавсиялар бердилар.

Шу билан бирга, ушбу касалликка чалинган беморлар ҳақидаги барча маълумотлар мутлақо сир сақланган ҳолда муолажа чоралари кўрилиши, уларнинг оила аъзолари ҳам мазкур касалликни юқтириб олишларининг олдини олиш бўйича зарур профилактик ишлар амалга оширилиши ҳақида сўз юритишди ва тадбир иштирокчиларига ОИТСдан сақланиш бўйича тарғибот варақалари тарқатдилар.

Учрашув давомида 92-02 ҳарбий қисм хизматчилари ОИТСдан сақланиш, даволаниш босқичлари, мунтазам равишда соғлом турмуш тарзи қоидаларига амал қилган беморларнинг мазкур касалликдан бутунлай соғайиб кетиш имкониятлари бор ёки йўқлиги юзасидан саволлар билан мурожаат қилдилар. Иштирокчилар томонидан тушган шу ва шу каби бошқа саволларга шифокорлар Жаҳон Соғликни сақлаш ташкилоти томонидан тақдим этилган сўнгги маълумотлар асосида батафсил жавоблар бердилар.

Робия Йўлдошева.