БЎШ ИШ ЎРИНЛАРИ ЯРМАРКАСИДА 26 НАФАР ФУҚАРО ДОИМИЙ ИШГА ЖОЙЛАШТИРИЛДИ

Ижтимоий фаол инсон жамият ҳаётидаги ўзгаришлар ва янгиланишларга ўзини дахлдор деб билади, қилаётган ҳар бир ишидан маъно-мазмунлар топиб яшашга интилади. Жаҳон Соғликни сақлаш ташкилоти экспертларининг хулосаларига кўра, доимий меҳнат, ўқиш-изланиш билан банд бўлган кишиларда қариш жараёни секинлашиб, яшаш, меҳнат қилиш иштиёқи баланд бўларкан. Демак, инсон ўз ҳаётининг маълум қисмини меҳнат майдонида, яратувчанлик кайфиятида ўтказиши унинг нафақат моддий манфаатдорлиги, балки узоқ ва сермазмун ҳаёт кечиришининг бирдан-бир муҳим омили ҳисобланади. Дунёдаги барча мамлакатларда, шу жумладан, Ўзбекистонда ҳам халқимизнинг ижтимоий фаоллигини ошириш, уларнинг доимий ва барқарор иш ўринларига эга бўлишларини таъминлашга ҳамиша энг устувор масала сифатида қаралади.

Аҳолининг бандлигини таъминлаш, янги-янги иш ўринларини яратиш, ҳар бир ишга яроқли инсоннинг интилиш ва қизиқишларини инобатга олган ҳолда, ўзини-ўзи банд қилиш тамойили асосида маълум бир фаолият тури билан шуғулланишлари учун шароит ва имкониятлар яратиш ҳудудлардаги Камбағалликни қисқартириш ва бандликка кўмаклашиш бўлимлари ходимлари зиммасидаги масъулиятли вазифалар сирасига киради. Бу борада Амударё туман Камбағалликни қисқартириш ва бандликка кўмаклашиш бўлими томонидан амалга оширилаётган ишлар ҳам эътиборга муносиб.

Бўлим ходимларининг тумандаги мавжуд корхона ва ташкилотлар масъуллари билан ҳамкорликдаги саъй-ҳаракатлари туфайли тез-тез ташкил этилаётган бўш иш ўринлари ярмаркалари орқали кўплаб фуқаролар доимий ва мавсумий ишларга жойлаштирилиб, қизиқиш ва иқтидорларига муносиб равишда касб-корга ўқишлари учун шароит яратилиб, бандлиги таъминланмоқда.

Жорий йилнинг 2 декабрь куни Амударё туман Маданият бўлими биносида бўлиб ўтган меҳнат ярмаркасида ҳам кўплаб фуқаролар иш билан таъминландилар.

Ярмаркада Қорақалпоғистон Республикаси Камбағалликни қисқартириш ва бандлик вазирининг биринчи ўринбосари Ниятбай Нуржанов, Амударё туман ҳокимининг биринчи ўринбосари Фахриддин Юсупов, Амударё туман прокурори ёрдамчиси Санжар Абдуллаев, Амударё тумани Адлия бўлими бошлиғи Мансур Содиқов, маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман ҳокими ёрдамчилари ҳамда бошқада ҳамкор ташкилотлар, тижорат банклари вакиллари, шунингдек, 74 нафар ишсиз фуқаролар, алимент тўловчилар, ногиронлиги бўлган шахслар, турли ОТМлар, коллеж ва техникумларнинг битирувчи ёшлари қатнашдилар.

Ҳамжиҳатлик ва ҳамкорлик, шаффофлик тамойиллари асосида ўтказилган бўш иш ўринлари ярмаркасида тумандаги 58 та корхона ва ташкилотлар вакиллари 195 та бўш иш ўринлари билан иштирок этишди.

Ярмаркани Амударё тумани Камбағалликни қисқартириш ва бандликка кўмаклашиш бўлими бошлиғи Рашид Салаев очди ва олиб борди. Ярмарка иштирокчиларига бўлим ходимлари томонидан бўш иш ўринлари ва уларга аҳолини ишга жойлаштириш, ишсиз аҳолини касб-ҳунарга ўқитиш, хоҳловчиларни хорижий давлатларга ишга жойлаштириш, аҳолининг меҳнат ҳуқуқлари ва меҳнат муҳофазасини таъминлаш масалалари бўйича ҳуқуқий маслаҳат ва маълумотлар олишлари учун барча шароитлар яратилиб, видеороликлар, баннерлар, брошюралар, реклама варақалари тақдим қилинди.

Ярмарка давомида 26 нафар фуқаро доимий ишга жойлаштирилди. Шундан 12 нафари хотин-қизлар, 8 нафари ёшлар бўлиб, 6 нафар олий таълим муассасаси битирувчисининг доимий иш билан бандлиги таъминланди. Шунингдек, 12 нафар фуқаро касб-ҳунарга ўқитишга жалб қилинди.

Ярмарка давомида бўлим ходимлари томонидан бўш иш ўринлари, уларга аҳолини ишга жойлаштириш бўйича 21 нафар, ишсиз аҳолини касб-ҳунар ва тадбиркорликка ўқитиш бўйича 28 нафар, хорижий давлатларда ишга жойлаштириш бўйича 22 нафар, аҳолининг меҳнат ҳуқуқлари ва меҳнат муҳофазасини таъминлаш бўйича 16 нафар фуқароларга ҳуқуқий маслаҳатлар, керакли маълумот ва тавсиялар берилди. Чет давлатларда ишлаш истагини билдирган фуқароларга ZOOM платформаси орқали тўғридан-тўғри иш берувчилар билан суҳбатларда қатнашиш имкониятлари мавжудлиги тўғрисидаги маълумотлар тақдим этилди.

Аҳолининг ижтимоий фаоллигини ошириш, ўзлари учун маъқул бўлган касб-корларни эгаллаб, ўзи ва оиласининг доимий даромадга эга бўлишларини таъминлаш борасидаги интилишларини қўллаб-қувватлаш, пировардида уларнинг ҳаётдан рози яшашларига кўмаклашиш борасидаги бу каби хайрли ишлар Амударё туман Камбағалликни қисқартириш ва бандликка кўмаклашиш бўлими томонидан янги, 2025 йилда ҳам тизимли равишда амалга оширилиши режалаштирилган.

Робия Йўлдошева