BOʻSh ISh OʻRINLARI YaRMARKASIDA 26 NAFAR FUQARO DOIMIY IShGA JOYLAShTIRILDI

Ijtimoiy faol inson jamiyat hayotidagi oʻzgarishlar va yangilanishlarga oʻzini daxldor deb biladi, qilayotgan har bir ishidan maʼno-mazmunlar topib yashashga intiladi. Jahon Sogʻlikni saqlash tashkiloti ekspertlarining xulosalariga koʻra, doimiy mehnat, oʻqish-izlanish bilan band boʻlgan kishilarda qarish jarayoni sekinlashib, yashash, mehnat qilish ishtiyoqi baland boʻlarkan. Demak, inson oʻz hayotining maʼlum qismini mehnat maydonida, yaratuvchanlik kayfiyatida oʻtkazishi uning nafaqat moddiy manfaatdorligi, balki uzoq va sermazmun hayot kechirishining birdan-bir muhim omili hisoblanadi. Dunyodagi barcha mamlakatlarda, shu jumladan, Oʻzbekistonda ham xalqimizning ijtimoiy faolligini oshirish, ularning doimiy va barqaror ish oʻrinlariga ega boʻlishlarini taʼminlashga hamisha eng ustuvor masala sifatida qaraladi.

Aholining bandligini taʼminlash, yangi-yangi ish oʻrinlarini yaratish, har bir ishga yaroqli insonning intilish va qiziqishlarini inobatga olgan holda, oʻzini-oʻzi band qilish tamoyili asosida maʼlum bir faoliyat turi bilan shugʻullanishlari uchun sharoit va imkoniyatlar yaratish hududlardagi Kambagʻallikni qisqartirish va bandlikka koʻmaklashish boʻlimlari xodimlari zimmasidagi masʼuliyatli vazifalar sirasiga kiradi. Bu borada Amudaryo tuman Kambagʻallikni qisqartirish va bandlikka koʻmaklashish boʻlimi tomonidan amalga oshirilayotgan ishlar ham eʼtiborga munosib.

Boʻlim xodimlarining tumandagi mavjud korxona va tashkilotlar masʼullari bilan hamkorlikdagi saʼy-harakatlari tufayli tez-tez tashkil etilayotgan boʻsh ish oʻrinlari yarmarkalari orqali koʻplab fuqarolar doimiy va mavsumiy ishlarga joylashtirilib, qiziqish va iqtidorlariga munosib ravishda kasb-korga oʻqishlari uchun sharoit yaratilib, bandligi taʼminlanmoqda.

Joriy yilning 2-dekabr kuni Amudaryo tuman Madaniyat boʻlimi binosida boʻlib oʻtgan mehnat yarmarkasida ham koʻplab fuqarolar ish bilan taʼminlandilar.

Yarmarkada Qoraqalpogʻiston Respublikasi Kambagʻallikni qisqartirish va bandlik vazirining birinchi oʻrinbosari Niyatbay Nurjanov, Amudaryo tuman hokimining birinchi oʻrinbosari Faxriddin Yusupov, Amudaryo tuman prokurori yordamchisi Sanjar Abdullayev, Amudaryo tumani Adliya boʻlimi boshligʻi Mansur Sodiqov, mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman hokimi yordamchilari hamda boshqada hamkor tashkilotlar, tijorat banklari vakillari, shuningdek, 74 nafar ishsiz fuqarolar, aliment toʻlovchilar, nogironligi boʻlgan shaxslar, turli OTMlar, kollej va texnikumlarning bitiruvchi yoshlari qatnashdilar.

Hamjihatlik va hamkorlik, shaffoflik tamoyillari asosida oʻtkazilgan boʻsh ish oʻrinlari yarmarkasida tumandagi 58 ta korxona va tashkilotlar vakillari 195 ta boʻsh ish oʻrinlari bilan ishtirok etishdi.

Yarmarkani Amudaryo tumani Kambagʻallikni qisqartirish va bandlikka koʻmaklashish boʻlimi boshligʻi Rashid Salayev ochdi va olib bordi. Yarmarka ishtirokchilariga boʻlim xodimlari tomonidan boʻsh ish oʻrinlari va ularga aholini ishga joylashtirish, ishsiz aholini kasb-hunarga oʻqitish, xohlovchilarni xorijiy davlatlarga ishga joylashtirish, aholining mehnat huquqlari va mehnat muhofazasini taʼminlash masalalari boʻyicha huquqiy maslahat va maʼlumotlar olishlari uchun barcha sharoitlar yaratilib, videoroliklar, bannerlar, broshyuralar, reklama varaqalari taqdim qilindi.

Yarmarka davomida 26 nafar fuqaro doimiy ishga joylashtirildi. Shundan 12 nafari xotin-qizlar, 8 nafari yoshlar boʻlib, 6 nafar oliy taʼlim muassasasi bitiruvchisining doimiy ish bilan bandligi taʼminlandi. Shuningdek, 12 nafar fuqaro kasb-hunarga oʻqitishga jalb qilindi.

Yarmarka davomida boʻlim xodimlari tomonidan boʻsh ish oʻrinlari, ularga aholini ishga joylashtirish boʻyicha 21 nafar, ishsiz aholini kasb-hunar va tadbirkorlikka oʻqitish boʻyicha 28 nafar, xorijiy davlatlarda ishga joylashtirish boʻyicha 22 nafar, aholining mehnat huquqlari va mehnat muhofazasini taʼminlash boʻyicha 16 nafar fuqarolarga huquqiy maslahatlar, kerakli maʼlumot va tavsiyalar berildi. Chet davlatlarda ishlash istagini bildirgan fuqarolarga ZOOM platformasi orqali toʻgʻridan-toʻgʻri ish beruvchilar bilan suhbatlarda qatnashish imkoniyatlari mavjudligi toʻgʻrisidagi maʼlumotlar taqdim etildi.

Aholining ijtimoiy faolligini oshirish, oʻzlari uchun maʼqul boʻlgan kasb-korlarni egallab, oʻzi va oilasining doimiy daromadga ega boʻlishlarini taʼminlash borasidagi intilishlarini qoʻllab-quvvatlash, pirovardida ularning hayotdan rozi yashashlariga koʻmaklashish borasidagi bu kabi xayrli ishlar Amudaryo tuman Kambagʻallikni qisqartirish va bandlikka koʻmaklashish boʻlimi tomonidan yangi, 2025-yilda ham tizimli ravishda amalga oshirilishi rejalashtirilgan.

Robiya Yoʻldosheva