Ўзбекистон Республикаси Конституцияси қабул қилинганининг 32 йиллиги муносиб нишонланди
Халқимиз сиёсий-ҳуқуқий тафаккурининг юксак намунаси бўлган Конституциямиз юртимизда демократик давлат ва фуқаролик жамияти барпо этиш, Ўзбекистоннинг халқаро майдонда муносиб ўрин эгаллашида мустаҳкам пойдевор бўлиб хизмат қилмоқда.
Конституциямиз Ўзбекистон тарихида узоқ, давомли мақсад ва вазифаларимизни аниқ белгилаб беришда ўзининг пухта ўйланган тамойиллари билан ишончли ва ҳал қилувчи омил бўлди. Мамлакатимизнинг бугунги кунгача босиб ўтган ғоят мураккаб ва шарафли йўли бош қомусимизнинг ҳаётбахш кучи ва улкан салоҳиятидан далолат беради.
8 декабрь санаси бош қомусимиз – Конституция қабул қилинган кун сифатида бутун юртимиз бўйлаб тантанали нишонланади. Ушбу сана муносабати билан Амударё тумани Маданият бўлимида байрам тадбири бўлиб ўтди. Унда тумандаги секторлар раҳбарлари, туман ҳокими ўринбосарлари, бўлимлар, ташкилотлар раҳбарлари, маҳаллалар масъуллари ҳамда жамоатчилик вакиллари иштирок этдилар.
Байрам тадбири Ўзбекистон ва Қорақалпоғистон Республикалари давлат мадҳиялари садолари билан бошланди. Тадбирни туман ҳокимининг биринчи ўринбосари – иқтисодий тараққиёт ва камбағалликни қисқартириш бўлими бошлиғи Фаҳриддин Юсупов табрик сўзи билан очиб берди. У ўз нутқида Конституциямиз юртимизда демократик ислоҳотлар, иқтисодиётни модернизация қилиш, ижтимоий ўзгаришлар учун асос бўлганлигини, у инсон ҳуқуқ ва эркинликларини олий қадрият деб эълон қилиб, миллатлараро тинчлик ва тотувликни мустаҳкамлаш, тарихий-маданий анъаналарни ривожлантиришга хизмат қилаётганлигини таъкидлади ҳамда барчани байрам билан табриклади.
Байрам тадбирида шунингдек, туман прокурори Абат Джумамуратов сўзга чиқиб, Конституция давлат суверенитети, жамиятда тинчлик ва тотувлик тамойилларига риоя этиш, қонун устуворлигини таъминлаш, ҳаётимизнинг барча жабҳаларида кенг кўламли ислоҳотларни амалга оширишнинг кафолати эканлигини, ушбу хужжат Ўзбекистон давлатчилиги шаклланишининг энг янги босқичини бошлаб берганлигини ва бугунги кунда у ҳар бир инсоннинг ҳуқуқ ва эркинликларини кафолатлашини қайд этди ва юртимиз аҳлини бош қомусимиз қабул қилинганининг 32 йиллиги билан табриклади.
Конституциямиз қабул қилинган сана муносабати билан ташкил этилган байрам тадбири туман Маданият бўлими ижодкорлари томонидан тайёрланган ажойиб чиқишлар ва бетакрор куй-қўшиқлар билан давом этди. Туманимизнинг истеъдодли хонандалари тинчлик, дўстлик, Ватанни мадҳ этувчи, шунингдек, мусаффо осмон остида тотувликда бир оила бўлиб яшаётган турли миллат ва элатларнинг миллий куй-қўшиқларини ижро этдилар. Раққоса қизлар ижросидаги ажойиб рақслар барчага юқори байрамона кайфият бағишлади.
Байрам тадбирида сўзга чиққанлар асосий қонунимиз негизида яратилган Ҳаракатлар стратегияси бугунги кунда жонажон Ватанимиз тараққиётини янги босқичга кўтаришда, инновацион ва индустриал ривожланиш сари одимлашда беқиёс ўрин эгаллаётганини, халқ билан доимий мулоқотда бўлиш, одамларнинг ташвиш-муаммоларини ҳал этиш, уларни рози қилишда асосий мезонига айланаётганини таъкидладилар. Айнан шу сабабли бош қомусимизни чуқур ўрганиш, англаш, ҳаётга жорий этиш ва унга сўзсиз амал қилиш – барчамизнинг шарафли бурчимиз эканлиги қайд этилди.
Тадбирда истеъдодли ўқувчи ёшлар томонидан ижро этилган Бош Қомусимиз ҳақидаги шеърлар ҳамда ажойиб куй-қўшиқлар иштирокчиларда унутилмас таассуротлар қолдирди.
Таъкидлаш жоизки, Конституция — бу мамлакатимиз келажаги, халқимизнинг барқарор ривожи, тинчлиги ва фаровонлиги кафолатидир. Ўзбекистон Конституциясининг аҳамияти ва таъсири тобора ортиб борар экан, унинг замон талабларига мослашиши ва жамиятимизга хизмат қилиши давом этади. Конституциямизда мустаҳкамланган қадриятлар, адолат ва қонун устуворлиги ҳар бир фуқарога ёшидан, миллатидан қатъий назар тенг ҳуқуқлар беришни таъминлайди. Шу сабабли ҳам Конституция куни умумхалқ байрами сифатида кенг нишонланади, Бош Қомусимиз эса асрий орзуларимиз рўёби муҳрланган ҳужжат сифатида эъзозланади.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
