УМУМТАЪЛИМ МАКТАБЛАРИДА ИНДИВИДУАЛ ТАЪЛИМ ОЛАЁТГАН ЎҚУВЧИЛАР УЧУН ЯНГИ ЙИЛ БАЙРАМ ТАДБИРИ ТАШКИЛ ЭТИЛДИ
Мамлакатимизда байрамлар шунчаки ҳо-ю-ҳавасларни амалга ошириш ёхуд кимнидир унутиб, шодиёналар ўтказиш эмас, балки ўзаро меҳр-оқибат, миллатлараро тотувлик, дўстлик ва тинчлик, тенглик айёми сифатида, барча ёш тоифаларидаги инсонлар иштирокида, кўтаринки руҳда нишонланади. Айниқса, Янги йил байрами тантаналарида бу яққол намоён бўлади. Умумтаълим мактабларида индивидуал таълим олаётган имконияти чекланган ўқувчиларнинг ижтимоийлашувига, жамиятга фаол аралашувига кўмаклашишга қаратилган саъй-ҳаракатлар эса ҳар бир фуқаронинг зиммасидаги масъулиятли бурчига айланган. Айнан ана шундай ўқувчи-ёшлар билан тантанали байрам тадбирларида иштирок этиш қалблардаги меҳр-оқибат туйғуларини янада мустаҳкамлаши табиий.
Янги йил байрами арафасида Амударё туманидаги 40-сонли умумтаълим мактабининг фаоллар залида ўтказилган байрамона тадбир ҳам ўзининг ёрқин таассуротларга бойлиги билан иштирокчиларга завқ-шавқ бағишлади.
Амударё тумани ҳокимлиги, “Инсон” ижтимоий хизматлар маркази туман бўлими, Ўзбекистон “Ногиронлар” жамиятининг Амударё туман бўлинмаси ҳамкорлигида ташкиллаштирилган мазкур тадбирнинг кўтаринки руҳда ўтишида мактаб директори, Қорақалпоғистон Республикаси Жўқорғи Кенгеси депутати Санобар Хўжамуротова бош-қош бўлди.
Тадбирда масъуллардан ташқари, туманнинг турли ҳудудларидаги умумтаълим мактабларида индивидуал таълим олаётган 30 нафар имконияти чекланган ўқувчилар, 40-сонли мактабнинг бошланғич синфлар ўқувчилари ҳамда байрам тадбири ҳомийси, тадбиркор Дилдора Ҳайитбоевалар иштирок этишди.
Амударё тумани ҳокимлиги, Ўзбекистон “Ногиронлар” жамиятининг Амударё туман бўлинмаси, “Инсон” ижтимоий хизматлар маркази туман бўлими масъулларининг байрамона самимий тилаклари билан бошланган тадбирда мактаб директори Санобар Хўжамуротова мамлакатимизда таълим-тарбия соҳасига қаратилаётган алоҳида эътибор ва рағбат, шунингдек, имконияти чекланган ўқувчи-ёшларнинг замон талаблари даражасида билим олишлари, уларнинг иқтидорларини юзага чиқариш ва ривожлантириш борасида яратилган шарт-шароитлар хусусида сўз юритиб, мамлакатимизда барча тоифадаги инсонлар давлат ғамхўрлиги билан қамраб олинганини мамнуният билан таъкидлади.
Тадбир давомида мактабнинг бошланғич синфлар ўқувчилари томонидан тайёрланган Янги йил байрам концерт дастури намойиш этилди.
Концерт дастури аввалида даврага Қорбобо ва Қорқиз билан кириб келган болажонлар ўзбек халқ эртаклари қаҳрамонлари сиймоларида намоён бўлишиб, дўстлик, тинчлик, меҳр-оқибат ва она Ватанни мадҳ этувчи шеърлар айтишиб, қўшиқ ва рақслар ижро қилдилар. Депутат ва мактаб директори Санобар Хўжамуротова байрам дастурхони ёзиб, тадбиркор Дилдора Ҳайитбоева 30 нафар, 40-сонли мактаб жамоаси эса 60 нафар ўқувчиларга ўзларининг байрам совғаларини тақдим этдилар ҳамда болажонларга чексиз қувонч ва шодликлар улашдилар.
Амударё туманининг турли ҳудудларидаги умумтаълим мактабларида индивидуал таълим олаётган имконияти чекланган ўқувчилар учун ташкиллаштирилган Янги йил байрам тадбирида болажонлар қувонч-у шодликлар, меҳр ва муҳаббат оғушида, Қорбобо ва Қорқиз ҳамроҳлигида яйраб дам олдилар. Ўтказилган тадбир сабабли улар ўзларининг ҳар қандай соғлом инсонлардан кам эмасликларини чин дилдан ҳис этдилар.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
