“МАҲАЛЛА ЕТТИЛИГИ”НИНГ ҲАМКОРЛИКДАГИ ФАОЛИЯТИ ТУФАЙЛИ ЧОЙКЎЛ ОВУЛИ ОБОД ВА ФАРОВОН ГЎШАГА АЙЛАНМОҚДА

Биз ҳаммамиз маҳаллада яшаймиз, унинг ҳар бир қарич ерини обод қилиш, маҳалла аҳлининг муаммоларига елка тутиш, яхши-ёмон кунларида маҳалладошлар билан бирга бўлиш, ўзимиз яшаб турган ҳудуднинг келажаги, янада тараққий этиши учун масъуллик туйғуси билан яшаш – азалий қадрият. Шу боис, ҳар гал Янги йил арафасида маҳалла масъуллари келгуси йил режалари, белгиланаётган янги вазифалар, маҳалла ҳаётида кутилаётган ўзгаришлар юзасидан халқ вакиллари олдида ҳисобот беришни, ечимини кутаётган муаммолар бўйича фикрлашиб олишни ўзларининг зиммаларидаги бурчи деб биладилар. Зеро, давлатимизнинг маҳалла институтини ривожлантириш ва уни энг демократик ва халқона, ижтимоий тузилмага айлантириш борасидаги талаби ҳам шу.

“Фуқароларнинг ўзини-ўзи бошқариш органлари тўғрисида”ги Ўзбекистон Республикаси Қонунига мувофиқ ҳокимият органлари раҳбарларининг фуқаролар йиғинлари фаолияти соҳасига кирувчи масалалар юзасидан ҳисоботларини эшитиши ҳам белгилаб қўйилган. Бу эса маҳаллий даражадаги муаммоларга ўз вақтида ечим топиш, жамоатчилик назорати амалга оширилишини, давлат ҳокимияти ва бошқаруви органлари фаолиятининг очиқлигини таъминлаш, фуқароларнинг давлат ва жамият ишларини бошқаришда фаол иштирок этиши ҳамда давлат органлари, нодавлат нотижорат ташкилотлари ва фуқароларнинг ўзини-ўзи бошқариш органлари ўртасидаги ижтимоий шериклик муносабатларини мустаҳкамлаш имконини бермоқда.

Янги 2025 йилнинг илк кунларида ижодий гуруҳимиз билан Амударё туманидаги Чойкўл овул фуқаролар йиғинида бўлганимизда “Маҳалла еттилиги”нинг аҳоли мурожаатлари билан ишлаш, маҳаллий даражадаги муаммоларни самарали ҳал этишга қаратилган саъй-ҳаракатлари туфайли халқ ҳаётидаги ўзгаришлар ва янгиланишлардан кўзимиз қувонди. Чунки ҳар чораклик якуни бўйича ҳокимият органлари раҳбарлари ва овул фуқаролар йиғини вакиллари томонидан йиғин фаолияти ваколатига кирувчи масалалар юзасидан ҳисоботларни эшитиб борилиши боис овул аҳли ҳаётига оид барча муаммолар тизимли равишда ҳал этилиб борилмоқда. “Маҳалла еттилиги” аъзолари учун аҳоли мурожаатлари, ариза ва таклифлар билан ишлаш фақат жойларда амалга оширилаётган ишларнинг самарасини белгилаш воситаси эмас, неча-неча одамларнинг арз-доди, таклиф ва шикоятларини жойига чиққан ҳолда ижобий ҳал этишга қаратилган эзгу қадамдир.

Бугунги кунда овул ҳудудида 1 минг 192 хонадон таркибидаги 1 минг 293та оилада 7 минг 123 нафар фуқаро истиқомат қилади. Тарихга айланган 2024 йил давомида 1 минг 192 хонадонга “Маҳалла еттилиги” аъзолари томонидан уйма уй юриб, электр энергияси ва табиий газни тежаш, хонадонларга қуёш панели, қуёш сув иситиш ускунаси, тежамкор лампалар ўрнатиш буйича олиб борилган суҳбатлар, тарғибот тадбирлари ва учрашувлар туфайли кўпдан-кўп муаммолар жойида ҳал этилди.

Хусусан, ер ва мол-мулк солиғи, коммунал тўловлар ўз вақтида амалга оширилгани боис, бу борада белгиланган режа 1 миллиард 426 миллион сўм ўз вақтида тўланди ва аҳолининг солиқлар бўйича қарздорлиги умуман йўқ ҳисоби.

Аҳоли бандлигини таъминлашга қаратилган чора-тадбирлар туфайли 186 нафар фуқаролар доимий даромад манбаига эга бўлдилар. 1 минг 105та хонадон эгалари томорқаларидан самарали фойдаланишлари эвазига ўз оилалари фаровон, янада обод бўлишига эришаётганлари эса эътиборга ва эътирофга муносиб.

Бундан ташқари, 95та хонадонда 10 ва ундан ортиқ чорва моллари парваришланаётгани туфайли мазкур оилалар аъзолари ҳам доимий даромад манбаларига эга бўлдилар. “Яшил макон” умуммиллий ҳаракати доирасида чойкўлликлар маҳалла биноси атрофида 20 сотих ер майдонига 150 туп мевали дарахт кўчатлари экишиб, “Маҳалла боғи”ни ташкил қилишгани овул ободлигини таъминлашга қаратилган яна бир эзгу қадам бўлди. Бундан ҳам муҳими, овул ҳудудини кўкаламзор гўшага айлантириш мақсадида 800 та томорқа ери мавжуд хонадоннинг ҳар бирида 10 тупдан, жами 8000 мевали ва манзарали дарахт кўчатлари экилди.

Аҳолини ижтимоий қўллаб-қувватлаш, уларнинг оғирини енгил, мушкулини осон қилиш, қийин пайтда елкадош бўлиш “Маҳалла еттилиги”нинг доимий вазифасига айланган. Биргаликдаги саъй-ҳаракатлар, туфайли йил бошида “Ижтимоий ҳимоя” реестрига киритилган фуқароларнинг барчасининг турмуш шароитлари ижобий томонга ўзгаргани боис, 2025 йининг 1 январь ҳолатига “Ёшлар дафтари”, “Аёллар дафтари”, “Темир дафтар” рўйхатидаги фуқаролар мазкур дафтарлардан тўлиқ чиқарилди. Шайх қалъа кўчасида яшовчи Нурбек Жуматовнинг яшаш уйи ёниб кетганлиги сабабли ҳомийлар ва кўни-қўшнилари томонидан ҳовли-жойи ҳашар йўли билан таъмирлаб берилди.

Ўзбекистон Республикаси Президентининг “Маҳалла институтининг жамиятдаги ролини тубдан ошириш ва унинг аҳоли муаммоларини ҳал этишда биринчи бўғин сифатида ишлашини таъминлашга каратилган чора-тадбирлар тўғрисида”ги Фармонида белгилаб берилган вазифаларни амалга ошириш, қолаверса, овул инфратузилмасини янада ривожлантириш мақсадида овулда 2025 йилда бажариладиган ишлар ҳам айни пайтда “Маҳалла еттилиги” аъзоларининг эътибор марказидаги вазифага айланган.

Унга кўра, Ос овул аҳоли пунктига ўқувчиларнинг мактабга хавфсиз қатнаши учун 900 метр, Чорвадор аҳоли пунктига 300 метр масофадаги пиёдалар йўлакчасини қуриш, тадбиркорликни янада ривожлантириш, пиллачилик соҳасида касаначилик фаолиятини кенг жорий этиш, овул ёшларини спорт-соғломлаштириш иншоотларига янада кўпроқ жалб қилиш, тўйлар, оилавий маросимларни камчиқим, исрофгарчиликларсиз ўтказиш, ҳудуддаги умумтаълим мактаблари билан ҳамкорликда китобхон ёшлар сафини ошириш, миллий-маънавий қадриятларни мустаҳкамлашга қаратилган китобхонлик кечалари, таниқли ёзувчи ва шоирлар билан учрашувлар ўтказиш режалаштирилган.

“Маҳалла еттилиги” аъзоларининг Маҳалла Кенгаши аъзолари ҳамда фуқаролар йиғини комиссиялари билан ҳамкорликдаги фаолияти туфайли ўтган йил давомида овул ҳудудида ҳуқуқбузарлик, жиноятчилик, оилавий ажрашишлар ва ўзаро низолар умуман қайд этилмади. Бундан аёнки, ҳақиқатдан ҳам чойкўлликлар турмуш тарзида осойишталик ва хотиржамлик ҳоким. Биз буни тобора гўзаллашиб, инфратузилмаси жадал ривожланаётган овул қиёфасида кўриб, яққол ҳис этдик.

Робия Йўлдошева.