“Методик маҳорат куни” ва “Методик маҳорат соати” тадбирлари ўтказилди

Хабарингиз бор, кейинги йилларда мактабгача таълим соҳасига таълимнинг энг дастлабки ва асосий бўлаги сифатида қаралиб, ушбу соҳага бўлган эътибор анчайин ўсди. Айниқса, мактабгача таълим соҳасида фаолият юритувчи кадрларнинг салоҳияти, уларнинг касбий тажриба ва маҳоратларини ошириш масъулиятли вазифага айланди. Боиси, дарахтнинг келажакда мустаҳкам илдиз отиб, серҳосил бўлиб, шохлари тўғри ҳолатда ўсишини истаган одам унга ниҳол пайтидан бошлаб тўғри тарбия ва меҳр беради. Инсоният камолоти ҳам худди шундай мураккаб масала. Шу сабабдан ҳам юртимизда мактабгача ва мактаб таълимига бўлган эътибор давлат сиёсати даражасида.

Ўзбекистон Республикаси Президентининг 2024 йил 30 сентябрдаги “Мактабгача таълим сифати ва самарадорлигини янада ошириш бўйича қўшимча чора-тадбирлар тўғрисида”ги Фармонида белгиланган вазифалар ижросини таъминлаш мақсадида 2024 йил 8 ноябрь куни Ўзбекистон Республикаси Мактабгача ва мактаб таълими вазирлигининг ҳамда 2024 йил 15 ноябрь куни Қорақалпоғистон Республикаси Мактабгача ва мактаб таълими вазирлигининг буйруқлари қабул қилинган эди. Ушбу ҳужжатлар асосида 2025 йил 1 январдан бошлаб, мактабгача таълим ташкилотлари педагог ходимлари учун малака оширишнинг “Методик маҳорат куни” ва “Методик маҳорат соати” тадбирлари жорий этилиши назарда тутилган.

Юқорида тилга олинган тегишли Фармон ва буйруқларнинг ижросини таъминлаш мақсадида Амударё туманида ҳам тадбирлар ташкил қилинмоқда. “Методик маҳорат соати” ва “Методик маҳорат куни” тадбирлари ташкил қилинадиган таянч мактабгача таълим ташкилотлари этиб тумандаги 5- ва 40-сонли давлат мактабгача таълим ташкилотлари белгилаб олинган бўлиб, уларга ушбу ДМТТ методистлари Альбина Есназарова ҳамда Гулчеҳра Юлдашевалар тренер-ментор этиб тайинланган.

Яқинда мазкур ДМТТларида иккита гуруҳда “Методик маҳорат куни” тадбирлари бўлиб ўтди. Ушбу тадбирга Қорақалпоғистон Республикаси мактабгача ва мактаб таълими вазирлиги мутахассиси Шамшет Мамутов, туман мактабгача ва мактаб таълими бўлими бошлиғи Ялғаш Шомуротов, бўлимнинг мактабгача таълим ташкилотлари фаолиятини мувофиқлаштириш бўлими методисти Сауле Патуллаева, Мактабгача таълим фаолиятини мувофиқлаштириш шўъбаси методисти Шаҳноза Қличева ҳамда туманимиздаги давлат мактабгача таълим ташкилотларининг 52 нафар директор ўринбосарлари ҳамда етакчи педагоглари иштирок этди.

“Методик маҳорат куни” ва “Методик маҳорат соати” тадбирларининг асосий вазифаси соҳа бўйича илғор тажрибаларни МТТларига жорий этиш, педагог ходимларга замонавий педагогик ва инновацион таълим технологияларини ўзлаштириш учун шароит яратиш, педагог ходимларнинг мустақил таълим олиши ва илғор педагогик тажрибалар ўрганишини ташкил этиш, педагог ходимларни янги методикалар билан таништириш, уларга ўзаро тажриба алмашиш ва ҳамкорлик қилиш имкониятини яратиш ва шу каби қатор йўналишлардан иборат.

Шунингдек, “Методик маҳорат куни” тадбирлари доирасида январь-май ойлари оралиғида, белгиланган ҳафталарнинг сешанба кунларида тренер-менторлар томонидан МТТлари директор ўринбосарларининг касбий маҳоратини ошириш учун мақсадли тайёрлаш бўйича семинар, тренинг, маҳорат дарслари ва мустақил таълим тадбирларини ўтказиб бориш ҳам режалаштирилган.

“Методик маҳорат куни” ўқув дастурининг ҳар бир мавзуларида болаларни ривожлантирувчи 5та соҳалар қамраб олиниб, ўқув дастури асосида мавзуга мос интерфаол машқларни бажартириш, дидактик материалларни қўллаш технологиялари, мавзуга мос ўйинларни ўтказиш методикалари, болалар учун шеър ва қўшиқлар иштирокчиларга ўргатилиб борилади.

Шунингдек, методик маҳорат соатлари директор ўринбосарлари томонидан, мактабгача таълим гуруҳларида таълим-тарбия жараёнини кузатиш, рефлектив амалиёт ҳамда педагоглар учун малака ошириш тадбирлари ўтказиладиган соатлар ҳисобланиб, ҳар бир ташкилотдаги педагог ходимлар учун алоҳида, якка тартибда ўтказиб борилади. Албатта, ўтказилаётган бу каби тадбирлар улкан тажриба мактаби вазифасини ўтаб, соҳада ўз ишининг устаси бўлган, илғор ходимлар етишиб чиқишига замин яратади.

Азиза Мадраҳимова