“Metodik mahorat kuni” va “Metodik mahorat soati” tadbirlari oʻtkazildi
Xabaringiz bor, keyingi yillarda maktabgacha taʼlim sohasiga taʼlimning eng dastlabki va asosiy boʻlagi sifatida qaralib, ushbu sohaga boʻlgan eʼtibor anchayin oʻsdi. Ayniqsa, maktabgacha taʼlim sohasida faoliyat yurituvchi kadrlarning salohiyati, ularning kasbiy tajriba va mahoratlarini oshirish masʼuliyatli vazifaga aylandi. Boisi, daraxtning kelajakda mustahkam ildiz otib, serhosil boʻlib, shoxlari toʻgʻri holatda oʻsishini istagan odam unga nihol paytidan boshlab toʻgʻri tarbiya va mehr beradi. Insoniyat kamoloti ham xuddi shunday murakkab masala. Shu sababdan ham yurtimizda maktabgacha va maktab taʼlimiga boʻlgan eʼtibor davlat siyosati darajasida.
Oʻzbekiston Respublikasi Prezidentining 2024-yil 30-sentyabrdagi “Maktabgacha taʼlim sifati va samaradorligini yanada oshirish boʻyicha qoʻshimcha chora-tadbirlar toʻgʻrisida”gi Farmonida belgilangan vazifalar ijrosini taʼminlash maqsadida 2024-yil 8-noyabr kuni Oʻzbekiston Respublikasi Maktabgacha va maktab taʼlimi vazirligining hamda 2024-yil 15-noyabr kuni Qoraqalpogʻiston Respublikasi Maktabgacha va maktab taʼlimi vazirligining buyruqlari qabul qilingan edi. Ushbu hujjatlar asosida 2025-yil 1-yanvardan boshlab, maktabgacha taʼlim tashkilotlari pedagog xodimlari uchun malaka oshirishning “Metodik mahorat kuni” va “Metodik mahorat soati” tadbirlari joriy etilishi nazarda tutilgan.
Yuqorida tilga olingan tegishli Farmon va buyruqlarning ijrosini taʼminlash maqsadida Amudaryo tumanida ham tadbirlar tashkil qilinmoqda. “Metodik mahorat soati” va “Metodik mahorat kuni” tadbirlari tashkil qilinadigan tayanch maktabgacha taʼlim tashkilotlari etib tumandagi 5- va 40-sonli davlat maktabgacha taʼlim tashkilotlari belgilab olingan boʻlib, ularga ushbu DMTT metodistlari Albina Yesnazarova hamda Gulchehra Yuldashevalar trener-mentor etib tayinlangan.
Yaqinda mazkur DMTTlarida ikkita guruhda “Metodik mahorat kuni” tadbirlari boʻlib oʻtdi. Ushbu tadbirga Qoraqalpogʻiston Respublikasi maktabgacha va maktab taʼlimi vazirligi mutaxassisi Shamshet Mamutov, tuman maktabgacha va maktab taʼlimi boʻlimi boshligʻi Yalgʻash Shomurotov, boʻlimning maktabgacha taʼlim tashkilotlari faoliyatini muvofiqlashtirish boʻlimi metodisti Saule Patullayeva, Maktabgacha taʼlim faoliyatini muvofiqlashtirish shoʻʼbasi metodisti Shahnoza Qlicheva hamda tumanimizdagi davlat maktabgacha taʼlim tashkilotlarining 52 nafar direktor oʻrinbosarlari hamda yetakchi pedagoglari ishtirok etdi.
“Metodik mahorat kuni” va “Metodik mahorat soati” tadbirlarining asosiy vazifasi soha boʻyicha ilgʻor tajribalarni MTTlariga joriy etish, pedagog xodimlarga zamonaviy pedagogik va innovatsion taʼlim texnologiyalarini oʻzlashtirish uchun sharoit yaratish, pedagog xodimlarning mustaqil taʼlim olishi va ilgʻor pedagogik tajribalar oʻrganishini tashkil etish, pedagog xodimlarni yangi metodikalar bilan tanishtirish, ularga oʻzaro tajriba almashish va hamkorlik qilish imkoniyatini yaratish va shu kabi qator yoʻnalishlardan iborat.
Shuningdek, “Metodik mahorat kuni” tadbirlari doirasida yanvar-may oylari oraligʻida, belgilangan haftalarning seshanba kunlarida trener-mentorlar tomonidan MTTlari direktor oʻrinbosarlarining kasbiy mahoratini oshirish uchun maqsadli tayyorlash boʻyicha seminar, trening, mahorat darslari va mustaqil taʼlim tadbirlarini oʻtkazib borish ham rejalashtirilgan.
“Metodik mahorat kuni” oʻquv dasturining har bir mavzularida bolalarni rivojlantiruvchi 5ta sohalar qamrab olinib, oʻquv dasturi asosida mavzuga mos interfaol mashqlarni bajartirish, didaktik materiallarni qoʻllash texnologiyalari, mavzuga mos oʻyinlarni oʻtkazish metodikalari, bolalar uchun sheʼr va qoʻshiqlar ishtirokchilarga oʻrgatilib boriladi.
Shuningdek, metodik mahorat soatlari direktor oʻrinbosarlari tomonidan, maktabgacha taʼlim guruhlarida taʼlim-tarbiya jarayonini kuzatish, reflektiv amaliyot hamda pedagoglar uchun malaka oshirish tadbirlari oʻtkaziladigan soatlar hisoblanib, har bir tashkilotdagi pedagog xodimlar uchun alohida, yakka tartibda oʻtkazib boriladi. Albatta, oʻtkazilayotgan bu kabi tadbirlar ulkan tajriba maktabi vazifasini oʻtab, sohada oʻz ishining ustasi boʻlgan, ilgʻor xodimlar yetishib chiqishiga zamin yaratadi.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
