Фахрийларни эъзозлаш – миллий қадриятларимизнинг ёрқин ифодаси

Мамлакатимизда 14 январь – Ватан ҳимоячилари куни муносабати билан юртимизнинг барча ҳудудларида ватанпарварликка бағишланган тадбирлар, фахрийлар ҳолидан хабар олиш ва ёшлар билан учрашувлар ташкил этилмоқда. Бу кун Миллий Армиямизнинг куч-қудратини намоён этиш билан бирга, Ватан тинчлиги ва халқ осойишталигини таъминлаш йўлида жонбозлик кўрсатган инсонларни қадрлаш, ёш авлодни ватанпарварлик руҳида тарбиялашга алоҳида эътибор қаратилади.

Амударё туманида ҳам мазкур сана муносабати билан қатор учрашувлар ташкил этилди. Туман Мудофаа ишлари бўлими бошлиғи, майор Шуҳрат Маматов ҳамда Ўзбекистон “Ветеран” жангчи-фахрий ногиронлар бирлашмаси Қорақалпоғистон Республикаси бўлими Амударё тумани вакиллари Б.Жуманиёзов, О.Хўжаниёзов ва Ш.Саидбоев Торёп маҳалла фуқаролар йиғинида яшовчи фахрий Бисенбай Утегенов ҳолидан хабар олдилар.

Фахрий билан самимий суҳбат давомида унинг ҳаёти ва фаолияти, ёш авлодни тарбиялашдаги ҳиссаси юксак баҳоланди. Учрашувда Бисенбай Утегеновга “Ёшларни ватанпарварлик руҳида тарбиялаш учун” медали ва эсдалик совғалари тантанали равишда топширилди.

Шундан сўнг, фахрийлар Босув маҳалла фуқаролар йиғинида яшовчи собиқ жангчи Саидов Фарҳод хонадонига ташриф буюрди. Ташриф давомида Фарҳод Саидовнинг Ватан тинчлиги йўлида қилган хизматлари эътироф этилиб, унга ҳам “Ёшларни ватанпарварлик руҳида тарбиялаш учун” медали ва эсдалик совғалари топширилди.

Ушбу учрашувлар давомида фахрийлар ёшларга ўзларининг ҳаётий тажрибалари, Ватан ҳимояси йўлида кечган хизмат йиллари ҳақида ҳикоя қилиб бердилар. Тадбир давомида ёшлар билан самимий мулоқотлар ўтказилиб, уларнинг Ватанга садоқат, мардлик ва жасорат каби хислатларини юксалтириш бўйича маслаҳатлар берилди.

Мазкур учрашувлар 14 январь – Ватан ҳимоячилари кунини нишонлаш тадбирларининг бир қисми бўлиб, улар нафақат фахрийларни қадрлаш, балки ёш авлодни ватанпарварлик руҳида тарбиялаш йўлида муҳим қадам бўлиб хизмат қилади.

Шоҳзод Қурбонбоев