Бир гуруҳ қишлоқ хўжалиги соҳаси фидойилари тақдирланди

Ўзбекистон Республикаси Президентининг 2017 йил 9 октябрдаги “Фермер, деҳқон хўжаликлари ва томорқа ер эгаларининг ҳуқуқлари ва қонуний манфаатларини ҳимоя қилиш, қишлоқ хўжалиги экин майдонларидан самарали фойдаланиш тизимини тубдан такомиллаштириш чора-тадбирлари тўғрисида”ги Фармонига мувофиқ соҳада фидойилик билан меҳнат қилаётган фермерларни, соҳа мутахассисларини рағбатлантириш йўлга қўйилган эди. Ҳужжат асосида “Илғор фермер”, “Меҳнаткаш деҳқон” ва “Намунали томорқачи” кўкрак нишонлари таъсис этилиб, мамлакатимизда қишлоқ хўжалиги тармоғини ривожлантириш ишларига муносиб ҳисса қўшган соҳа ходимларининг меҳнати муносиб эътироф этиб келинмоқда.

13 январь куни Амударё тумани ҳокимлигининг мажлислар залида туманда қишлоқ хўжалиги соҳасида самарали фаолият олиб бораётган бир гуруҳ фермер ва деҳқон хўжаликлари раҳбарлари, томорқачилар тақдирланди.

Тадбирда туман ҳокими Собир Хўжаметов сўзга чиқиб, сўнгги йилларда мамлакатимизда аграр соҳа ривожи йўлида олиб борилаётган кенг кўламли ислоҳотлар хусусида сўз юритди. Туман ҳокими ўз нутқида давлатимиз раҳбари ташаббуси билан Қорақалпоғистон Республикасида қишлоқ хўжалиги ривожини янги босқичга олиб чиқиш борасида яратилаётган мислсиз имкониятлар ҳамда шарт-шароитлар хусусида тўхталди ҳамда улардан унумли фойдаланиб, янги ютуқ ва муваффақиятларга эришиш йўлида фермерлар, деҳқонлар ва томорқачиларга омад ва муваффақиятлар ёр бўлишига талакдош бўлди.

Тадбирда мамлакатимиз қишлоқ хўжалиги соҳасини ривожлантириш, унинг иқтисодий қудратини ва экспорт салоҳиятини юксалтириш, халқимизнинг ризқ-рўзи ва фаровонлигини, озиқ-овқат хавфсизлигини таъминлаш, ерларнинг мелиоратив ҳолатини яхшилаш ишларига муносиб ҳисса қўшиб келаётган, қишлоқ хўжалигининг пахтачилик, ғаллачилик, боғдорчилик, узумчилик, сабзавот-полизчилик, чорвачилик, балиқчилик, паррандачилик, асаларичилик ва бошқа йўналишларида самарали фаолият кўрсатаётган туманимиздаги бир гуруҳ фермерлар меҳнати эътироф этилди.

Замонавий технологиялардан унумли фойдаланаётган ҳамда қишлоқ хўжалиги маҳсулотлари етиштиришда юқори ҳосилдорликка эришаётган, уларни қайта ишлаш, сақлаш, тайёрлаш ва экспорт қилиш ишларида салмоқли натижаларни қўлга киритаётган, кўп тармоқли фаолиятни йўлга қўйган, моддий-техник базаси мустаҳкам, тажрибали 17 нафар илғор фермер хўжаликлари раҳбарларига “Илғор фермер” кўкрак нишони топширилди.

Шунингдек, қишлоқ хўжалиги маҳсулотлари ишлаб чиқаришда юксак натижаларга эришаётган, зарур агротехник тадбирларга риоя этган ҳолда ажратилган ер участкаларидан самарали ва оқилона фойдаланиб, аҳолига арзон ва сифатли маҳсулотларни етказиб бериш, уларни белгиланган сифат стандартлари талаблари асосида сақлаш ва экспорт қилиш ишларига муносиб ҳисса қўшиб келаётган бир гуруҳ деҳқонларнинг ҳам фидойи меҳнатлари эътироф этилди.

Илғор маҳаллий ва хорижий тажрибаларни пухта ўзлаштириб, замонавий инновацион технологияларни амалиётга жорий этаётган, экин майдонлари унумдорлигини ошириш борасида салмоқли ишларни амалга ошираётган 5 нафар миришкор деҳқон хўжаликлари раҳбарларига ва аъзоларига “Меҳнаткаш деҳқон” кўкрак нишони топширилди.

Бундан ташқари, шахсий томорқа ер участкаларидан самарали ва оқилона фойдаланиб, қишлоқ хўжалиги маҳсулотларини ишлаб чиқаришда юксак натижаларга эришаётган, соҳага замонавий инновацион технологияларни жорий этган ҳолда экологик ва органик тоза, арзон ва сифатли маҳсулотларни етиштириш ҳамда ички бозорни улар билан барқарор таъминлаш, янги серҳосил навларни кўпайтириш ишларига муносиб ҳисса қўшаётган, деҳқончилик маданияти ва сир-асрорларини пухта эгаллаган, шунингдек, жамоат ишларидаги фаоллиги билан аҳоли ўртасида алоҳида ҳурматга сазовор бўлган 16 нафар томорқа ер эгалари “Намунали томорқачи” кўкрак нишони билан тақдирланди.

Биз ҳам меҳнатлари эътироф этилган илғор фермерлар, меҳнаткаш деҳқонлар ва намунали томорқачиларни ушбу ютуқлари билан табриклаб, туманимиздаги барча қишлоқ хўжалиги соҳаси фидойиларининг навбатдаги қишлоқ хўжалиги йилини ҳам мўл ҳосил, юксак хирмон ва юқори даромад билан якунлашларига тилакдошмиз.

Чарос Арслонова, туман ҳокимлигининг Ахборот хизмати раҳбари.