Bir guruh qishloq xoʻjaligi sohasi fidoyilari taqdirlandi

Oʻzbekiston Respublikasi Prezidentining 2017-yil 9-oktyabrdagi “Fermer, dehqon xoʻjaliklari va tomorqa yer egalarining huquqlari va qonuniy manfaatlarini himoya qilish, qishloq xoʻjaligi ekin maydonlaridan samarali foydalanish tizimini tubdan takomillashtirish chora-tadbirlari toʻgʻrisida”gi Farmoniga muvofiq sohada fidoyilik bilan mehnat qilayotgan fermerlarni, soha mutaxassislarini ragʻbatlantirish yoʻlga qoʻyilgan edi. Hujjat asosida “Ilgʻor fermer”, “Mehnatkash dehqon” va “Namunali tomorqachi” koʻkrak nishonlari taʼsis etilib, mamlakatimizda qishloq xoʻjaligi tarmogʻini rivojlantirish ishlariga munosib hissa qoʻshgan soha xodimlarining mehnati munosib eʼtirof etib kelinmoqda.

13-yanvar kuni Amudaryo tumani hokimligining majlislar zalida tumanda qishloq xoʻjaligi sohasida samarali faoliyat olib borayotgan bir guruh fermer va dehqon xoʻjaliklari rahbarlari, tomorqachilar taqdirlandi.

Tadbirda tuman hokimi Sobir Xoʻjametov soʻzga chiqib, soʻnggi yillarda mamlakatimizda agrar soha rivoji yoʻlida olib borilayotgan keng koʻlamli islohotlar xususida soʻz yuritdi. Tuman hokimi oʻz nutqida davlatimiz rahbari tashabbusi bilan Qoraqalpogʻiston Respublikasida qishloq xoʻjaligi rivojini yangi bosqichga olib chiqish borasida yaratilayotgan mislsiz imkoniyatlar hamda shart-sharoitlar xususida toʻxtaldi hamda ulardan unumli foydalanib, yangi yutuq va muvaffaqiyatlarga erishish yoʻlida fermerlar, dehqonlar va tomorqachilarga omad va muvaffaqiyatlar yor boʻlishiga talakdosh boʻldi.

Tadbirda mamlakatimiz qishloq xoʻjaligi sohasini rivojlantirish, uning iqtisodiy qudratini va eksport salohiyatini yuksaltirish, xalqimizning rizq-roʻzi va farovonligini, oziq-ovqat xavfsizligini taʼminlash, yerlarning meliorativ holatini yaxshilash ishlariga munosib hissa qoʻshib kelayotgan, qishloq xoʻjaligining paxtachilik, gʻallachilik, bogʻdorchilik, uzumchilik, sabzavot-polizchilik, chorvachilik, baliqchilik, parrandachilik, asalarichilik va boshqa yoʻnalishlarida samarali faoliyat koʻrsatayotgan tumanimizdagi bir guruh fermerlar mehnati eʼtirof etildi.

Zamonaviy texnologiyalardan unumli foydalanayotgan hamda qishloq xoʻjaligi mahsulotlari yetishtirishda yuqori hosildorlikka erishayotgan, ularni qayta ishlash, saqlash, tayyorlash va eksport qilish ishlarida salmoqli natijalarni qoʻlga kiritayotgan, koʻp tarmoqli faoliyatni yoʻlga qoʻygan, moddiy-texnik bazasi mustahkam, tajribali 17 nafar ilgʻor fermer xoʻjaliklari rahbarlariga “Ilgʻor fermer” koʻkrak nishoni topshirildi.

Shuningdek, qishloq xoʻjaligi mahsulotlari ishlab chiqarishda yuksak natijalarga erishayotgan, zarur agrotexnik tadbirlarga rioya etgan holda ajratilgan yer uchastkalaridan samarali va oqilona foydalanib, aholiga arzon va sifatli mahsulotlarni yetkazib berish, ularni belgilangan sifat standartlari talablari asosida saqlash va eksport qilish ishlariga munosib hissa qoʻshib kelayotgan bir guruh dehqonlarning ham fidoyi mehnatlari eʼtirof etildi.

Ilgʻor mahalliy va xorijiy tajribalarni puxta oʻzlashtirib, zamonaviy innovatsion texnologiyalarni amaliyotga joriy etayotgan, ekin maydonlari unumdorligini oshirish borasida salmoqli ishlarni amalga oshirayotgan 5 nafar mirishkor dehqon xoʻjaliklari rahbarlariga va aʼzolariga “Mehnatkash dehqon” koʻkrak nishoni topshirildi.

Bundan tashqari, shaxsiy tomorqa yer uchastkalaridan samarali va oqilona foydalanib, qishloq xoʻjaligi mahsulotlarini ishlab chiqarishda yuksak natijalarga erishayotgan, sohaga zamonaviy innovatsion texnologiyalarni joriy etgan holda ekologik va organik toza, arzon va sifatli mahsulotlarni yetishtirish hamda ichki bozorni ular bilan barqaror taʼminlash, yangi serhosil navlarni koʻpaytirish ishlariga munosib hissa qoʻshayotgan, dehqonchilik madaniyati va sir-asrorlarini puxta egallagan, shuningdek, jamoat ishlaridagi faolligi bilan aholi oʻrtasida alohida hurmatga sazovor boʻlgan 16 nafar tomorqa yer egalari “Namunali tomorqachi” koʻkrak nishoni bilan taqdirlandi.

Biz ham mehnatlari eʼtirof etilgan ilgʻor fermerlar, mehnatkash dehqonlar va namunali tomorqachilarni ushbu yutuqlari bilan tabriklab, tumanimizdagi barcha qishloq xoʻjaligi sohasi fidoyilarining navbatdagi qishloq xoʻjaligi yilini ham moʻl hosil, yuksak xirmon va yuqori daromad bilan yakunlashlariga tilakdoshmiz.

Charos Arslonova, tuman hokimligining Axborot xizmati rahbari.